Musanze: Barifuza ko inkangara zashyirwagamo imyanda zongera kugarurwa mu mujyi
Imibereho

Musanze: Barifuza ko inkangara zashyirwagamo imyanda zongera kugarurwa mu mujyi

NGABOYABAHIZI PROTAIS

April 20, 2024

Abagana n’abaturiye umujyi wa Musanze bibabaza aho inkangara (pubelles) zari zarashyizwe ku mihanda zigamije gushyirwamo imyanda zagiye, ku buryo babura aho bata imyanda, bakaba basaba inzego bireba gushakira umuti iki kibazo.

Gahunda yo kugira imijyi icyeye ni imwe mu zibungabunga ibidukikije, bityo hatekerejwe gahunda y’uko mu mijyi yose yo mu Rwanda hajya haba ahantu hashyirwa nka bimwe mu bikoresho byakoreshejwe igihe umuntu ari ku rugendo akaba yajugunyamo igikoresho yakuyemo ibyo yari amaze gukoresha nk’amacupa, udukarito n’ibindi.

ariko kugeza ubu rero inkangara zashyizwe mu mujyi wa Musanze hasigaye ngerere kuko ngo zimwe zagiye zibwa n’abashombabyuma.

Ndahayo Eurade wo mu Murenge wa Muhoza yagize ati: “Twibaza kuri ubu mu mujyi wacu wa Musanze twibaza impamvu nta pubeli zirimo kandi ugendwa n’abantu benshi buri Sibo yari ifite nibura pubeli imwe ariko kubera ko ziri ku mihanda abashombabyuma bagiye baziba bakajya kuzicuruza mu byuma bishaje twifuza ko iki kibazo Akarere kagikemura”.

Mukamugema Jeannine we asanga bidakwiye ko umujyi ubura za pubeli kandi hakoreshwa utuntu twinshi cyane cyane nk’ibiribwa bipfunyitse, akaba yifuza ko nibura hakubakwa za  kiyosike nibura zajya zikingwa aho kugira ngo bajye bahora biba ziriya nkangara bazijyana mu byuma bishaje.

Yagize ati: “Turifuza ko hano hashyirwa inkangara zishyirwamo imyanda kuko hari ubwo umuntu ashaka kujugunya nk’agacupa akabura uko abigenza ni bwo uzasanga mu miferege yo mu mujyi wacu zuzuye amasashi, ibicupa, ibikarito n’ibindi. Ibi rero bihindanya isura y’uyu mujyi kandi ubona ko hagendwa na bamukerarugendo b’ingeri zose cyane ko ari n’umujyi wa kabiri mu Rwanda.”

Ubuyobozi bw’Akarere ka Musanze bwo butangaza ko kuri ubu hari gukorwa inyigo y’umushinga ugamije gushyira za pubeli muri uriya mujyi nk’uko Nsengimana Claudien yabitangarije Imvaho Nshya.

Yagize ati: “Ubu turimo gukora inyigo ku buryo muri uyu mujyi wa Musanze hazajyamo za pubeli zizajya zishyirwamo imyanda; kimwe na kiyosike zizajya zigishirizwamo ibijyanye n’isuku cyane nko mu nkengero z’umujyi, muri Kinigi … uturutse muri za Gahunga ku buryo umuntu azajya yinjira mu mujyi amaze kumenya niba adakwiye kujugunya ibishishwa by’imineke mu nzira, hari moto zizaba ziriho pubeli zizajya zigenda zishyirwamo imyanda.”

Umushinga wo gushyira za poubeli mu mujyi wa Musanze biteganyijwe ko uzatangira mu Ukwakira 2024, aho nibura nko muri  metero 50 ngo hazaba hari inkangara yo gushyiramo imyanda.

Ku mihanda nta pubeli zikiharangwa

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA