Musanze: Begerejwe amashyiga avuguruye nk’igisubizo cyo kurengera amashyamba
Imibereho

Musanze: Begerejwe amashyiga avuguruye nk’igisubizo cyo kurengera amashyamba

Imvaho Nshya

June 23, 2023

Abaturage batuye mu Karere ka Musanze, bishimiye amashyiga begerejwe agiye kubafasha mu kubungabunga amashyamba.

Ni amashyiga atangwa kuri nkunganire ya Leta bahabwa amashyiga avuguruye arondereza ibicanwa begerejwe mu kubungabunga ibidukikije n’imibereho myiza y’abaturage.

Ubwo hakorwaga ubukangurambaga mu baturage batuye mu Karere ka Musanze, kuri iyi gahunda ya Nkunganire yatangijwe na Leta y’u Rwanda binyuze mu bigo by’ingufu REG na EDCL kubufatanye  na  Banki y’Isi ibinyujije muri  Banki y’Amajyambere y’u Rwanda (BRD), abaturage bemeje ko iyo iyi gahunda itaza amashyamba aba ageze kure atemwa.

Bishimiye ko aya Mashyiga azabafasha kuzigama amafaranga bakoresha bagura ibicanwa, kugira isuku aho batekera n’ibindi kurengera amashyamba no gusigasira ubuzima bwabo.

Murekatete Solange umwe mu baturage batuye mu Karere ka Musanze yemeza ko ubwo babonye amashyiga arondereza inkwi bagiye guca ukubiri no kwangiza amashyamba.

Agira ati: “Izi mbabura batwetetse uko wakoresha urukwi rumwe ugahisha ibiryo, twakoreshaga inkwi nyinshi cyane ari na ko tujya mu mashya ba dutema mu kajagari,ariko izi mbabura ni cana rumwe, buradufasha kubungabunga amashyamba dufite ayacu cyangwa ya Leta. Ikindi ibyo twashoraga mu guteka byari byinshi ariko tugiye kunguka.”  

Ubuyobozi bw’Ikigo cy’Igihugu gishinzwe Ingufu REG/EDCL buvuga ko hakozwe ubushakashatsi bugaragaza ko gutekera ku mashyiga avuguruye bigabanya kwiyongera k’uburwayi bufata mu myanya y’ubuhumekero ndetse n’amaso.

Karera Issa, umukozi muri iki Kigo ukora mu gashami gashinzwe ibicanwa yemeza ko iyi Porogaramu yaje kugira ngo  umuturage abashe kubona amashyiga yizewe ashobora kurondereza ibicanwa no kurengera ibidukikije.

Agira ati: “Turi kwegereza abaturage amashyiga atagira imyotsi, iyi gahunda yaje kunganira gahunda zose zashizweho zo kurengera ibidukikije harimo amashyamba.

Harimo amashyiga arondereza ibicanwa kuri ubu bihenze, cyane ku hakoreshwa inkwi nyinshi, twemerera rwiyemezamirimo ushobora gutanga amashyiga arondereza ibicanwa  kugeza kuri 50%. Icyo dusaba abaturage ni ukubyaza umusaruro aya mahirwe bahawe.”

Karere Akomeza avuga ko bagikoresha ibyiciro by’ubudehe mu kunganira abaturage aho ari inkunga ikomeye kuba Leta yishyurira umuturage ku kigero cya 90% kumanura bitewe n’ikiciro arimo.”

Nizeyimana Etienne, Umuyobozi w’Ishami ry’Ibikorwa Remezo mu Karere ka Musanze, yemeza ko iyi gahunda iziye Igihe.

Agira ati: “Inyungu iyi gahunda izanye harimo kugabanya amafaranga abaturage batakazaga bagura inkwi,amakara n’ibindi, ni gahunda ije kurengera ubuzima hano iwacu kuko imyuka ihumanya iri kuba amateka bigomba kurangira burundu, ndetse n’amashyamba agiye gukomeza  abungabungwe neza cyane ni inyungu ku baturage no ku gihugu muri rusange.”

Ubuyobozi bw’iyi gahunda ya Nkunganire ku Mashyiga bwemeza ko imaze kugera ku ngo zigera ku bihumbi 100 ariko bagomba kuba bageze ku ngo 500.000 muri 2026.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA