Abanyamusanze biyongereye ku barimo aba Huye, Ngoma, Muhanga, Karongi na Nyagatare bahawe ibyishimo bisendereye n’abahanzi, umunani; Ross Kana, Amalon, Kivumbi King, Marina, Chriss Eazy, Davis D, Kenny Sol na Bushali ari bo bahanzi bari kuzenguruka muri ibi bitaramo.

Muri uyu mwaka, muri buri gace igitaramo kigezemo, hatumirwa umwe mu bahanzi begukanye irushanwa rya Primus Guma Guma Super Star (PGGSS) ryaterwaga inkunga na Primus.

Kuri iyi nshuro uwataramiye i Musanze ni Gatsinzi Emery wamamaye mu muziki nka Riderman, wegukanye Primus Guma Guma Super Star ya 2013.

Kimwe no mu tundi Turere iri serukiramuco ryanyuzemo abahanzi b’i Musanze na bo bahawe  umwanya muri iki gitaramo berekana impano zabo. Bamwe mu bagiye ku rubyiniro barimo Hirwa Meylo ukora injyana ya Hip hop akaba yaramamaye cyane mu ndirimbo nk’Inkovu z’ibihe yakoranye na Deeflo ndetse na Joshari, Ayo mahirwe yakoranye na Mico The Best. Ian Vanga umuhanzi ukiri muto ukunzwe mu ndirimbo Cunga Sana na we yahawe umwanya ku rubyiniro.

Nk’uko bimaze kumenyerwa, Amalon ni we wabanje ku rubyiniro, hakurikiraho Ross Kana, Marina, Kivumbi, Bushali na Kenny Sol mbere y’uko Riderman wegukanye PGGSS mu 2013 ahabwa iminota 30 yo gususurutsa abatari bake bari muri Stade Ubworoherane.

Riderman akigera ku rubyiniro yabanje gusaba ikaze ndetse abakunzi b’umuziki bamwemerera ko bayimuhaye, ahita atangira kubaririmbira “Horo” akurikizaho “Karibu Nyumbani” yafatanyije n’abandi bahanzi mu 2020, “Mambata” ya 2019 na “Warikiniraga” ya King James yasubiyemo   “Romeo & Juliet” yakoranye na Dream Boyz mu 2018 na “Niko nabaye”  n’izindi.

Nyuma yaho ni bwo Davis D na Chriss Eazy bataramiye abitabiriye iki gitaramo, na bo bakoresha iminota igera kuri 30 nk’uko biba biteganyijwe.

Igitaramo cya karindwi ari cyo kizasoza ‘MTN Iwacu Muzika Festival 2026’ kizabera i Rubavu ku wa Gatandatu utaha, tariki ya 1 Kanama 2026.

Muri Kamena 2019 ni bwo hateguwe bwa mbere iri serukiramuco rya Iwacu Muzika rigamije kumenyekanisha umuziki w’abahanzi Nyarwanda, ritegurwa na East African Promoters (EAP).

Ni iserukiramuco ryatangijwe ku mugaragaro n’uwari Minisitiri wa Siporo n’Umuco, Nyirasafari Espérance, mu gitaramo cyabereye mu Karere ka Musanze ariko mu Kinigi.

Uwo mwaka ryabereye mu ruhame kugeza risorejwe i Kigali, ariko mu myaka ibiri yakurikiyeho ryabaye hakoreshejwe ikoranabuhanga, ritambuka kuri Televiziyo Rwanda kubera icyorezo cya COVID-19.

Mu 2023, MTN Iwacu Muzika Festival yongeye kubera mu ruhame, iba inshuro ebyiri, abahanzi banyuranye baririmba muri ibyo byiciro byombi birimo iby’ab’umuziki ugezweho n’abaririmba injyana gakondo.

Ibi bitaramo bya “Iwacu Muzika Festival’ bitegurwa na East African Promoters (EAP) ku bufatanye na MTN Rwanda, Primus ndetse by’umwihariko muri uyu mwaka hiyongereyemo BPR Bank Rwanda Plc.

Ba uwa mbere mu kumenya amakuru agezweho!!!