Musanze: Umwana wari wabuze yasanzwe mu rugo rw’umuturanyi yapfuye
Amakuru

Musanze: Umwana wari wabuze yasanzwe mu rugo rw’umuturanyi yapfuye

Imvaho Nshya

October 11, 2023

Umwana w’imyaka ibiri n’igice witwa Iradukunda Aliane  wari mu kigero cy’imyaka ibiri n’igice yasanzwe mu rugo rw’umuturanyi yapfuye nyuma y’umunsi umwe aburiwe irengero.

Kuri uyu wa Gatatu 11 Ukwakira 2023 ni bwo umurambo we wasanzwe mu rugo rwa Nyiraruvugo, umuturanyi w’ababyeyi b’uwo mwana mu Kagari ka Gakingo, Umurenge wa Shingiro mu Karere ka Musanze.

Bamwe mu baturage bavuganye n’Imvaho Nshya muri ako gace, bavuga ko batunguwe n’urwo rupfu rw’umwana muto wazize amaherere.

Uzamukunda Cecile yagize ati: “Twari tumenyereye ko habaho za kaci, ariko noneho ibi bintu byo kwica n’abana noneho mu rugo rw’umuntu umubyeyi akaba yashobora kwica umwana wa mugenzi we ni ikibazo gikomeye. Ejo ni bwo twumvise Irankunda Eliezeri  nko  mu ma saa moya z’umugoroba atubwira ko umwana we yabuze. Twaryamye ariko bukeye nko mu ma saa yine ngo batoraguye umurambo kwa Nyiraruvugo natwe ibi bintu byatuyobeye gusa nahanwe ni ukuri”.

Shumbusho Eric we avuga ko impamvu akeka ko uriya mwana yaba yishwe n’abo kwa Nyiraruvugo ngo ni uko uriya muryango usanzwe uzwiho ubujura.

Yagize ati: “Nyiraruvugo hano twese tuzi ko yiba kandi kwa Irankunda bamaze iminsi bahibye, bikekwa ko ako kana kaba kababonye, cyane ko na Irankunda ubwe yabifatiye bamwiba. Natwe rero mu gihe cyo kwiba muri ruriya rugo ntabwo Nyiraruvugo tumushira amakenga, cyane ko umwana bamusanze mu rugo rwe yapfuye kandi yacukuye n’icyobo nkeka ko cyari  icyo kumuhambamo.”

Umunyamabanga Nshingwabikorwa w’Umurenge wa Shingiro Hanyurwabake Theoneste, na we ashimangira ko ayo makuru ari yo.

Yagize ati: “Ni byo koko umwana w’imyaka 2.5 Iradukunda Aliane, mwene Irankunda Eliezar na   Musabyeyezu Aline, yasanzwe mu rugo rw’umuturanyi wabo yapfuye, bivugwa ko yari yaburiwe irengero ejo ku wa 10 Ukwakira 2023. Umurambo wajyanywe gusumwa ku Bitaro bya Ruhengeri, abakekwa ari bo Nyiraruvugo Oliva w’imyaka 43 n’umwana we witwa Ndayishimiye Eric w’imyaka 16 bashyikirijwe Urwego rw’Igihugu rw’Ubugenzacyaha (RIB) ngo ibakoreho iperereza”.

Uyu muyobozi asaba abaturage kubana mu mahoro, no kwirinda icyatuma umuntu yica mugenzi we kuko ngo ubwicanyi bukurura umutekano muke, akomeza yihanganisha umuryango wabuze umwana.

Amakuru avuga ko bariya bakekwa ari bo Nyiraruvugo n’umuhungu we Ndayishimiye, bigeze gufatirwa mu rugo rwa Irankunda barimo kumwiba bikaba bikekwa ko yaba ari yo mpamvu bamwiciye umwana mu rwego rwo kwihimura dore ko ngo bahoraga bavuga ko bazamwereka.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA