Myanmar yatangaje ko yahaye imbabazi imfungwa 4,335 zirimo n’uwahoze ari Perezida, Win Myint, wafunzwe nyuma yuko ahiritswe ku butegetsi mu 2021, mu gihe abandi boroherejwe ibihano barimo; abakatiwe urwo gupfa bahawe gufungwa burundu.

Izo mbabazi zemejwe n’iteka rya Perezida Gen Min Aung Hlaing, bikaba ari bimwe mu bikorwa  bya mbere akoze kuva yahirika ubutegetsi mu 2021, agatorerwa kuba Umukuru w’Igihugu ku wa 03 Mata 2026.

Mu bo yababariye harimo n’uwahoze ari umwunganizi mu mategeko wa Win Myint; Aung San Suu Kyi.

Televiziyo ya leta ya Myanmar, MRTV yatangaje ko Win Myint yahawe imbabazi hashingiwe ku mabwiriza yihariye y’Umukuru w’Igihugu.

Mu bandi bagabanyirijwe ibihano harimo; Abanyepolitiki bivugwa ko bari barafunzwe kubera impamvu za politiki n’Abanyamahanga 179, bazoherezwa mu bihugu byabo.

Izi mbabazi zitanzwe nyuma y’icyumweru kimwe gusa Gen Min Aung Hlaing arahiriye kuba Perezida nyuma yo kwemezwa nka Perezida n’Inteko Ishinga Amategeko ya Myanmar ku wa 03 Mata 2026.

Mu ijambo yagejeje ku baturage nyuma yo kurahirira kuyobora icyo gihugu Gen Min Aung yavuze ko Myanmar yasubiye mu murongo wa demokarasi kandi iri kugana ku hazaza heza nubwo hakiri imbogamizi.

Ni mu gihe umuryango uharanira uburenganzira bwa muntu muri icyo gihugu witwa ‘Assistance Association for Political Prisoners ‘watangaje ko abantu barenga 30,000 bafunzwe kubera ibyaha bya politiki kuva hahirikwa ubutegetsi   mu 2021.

Ba uwa mbere mu kumenya amakuru agezweho!!!