Ngoma: Agahinda k’uwasogongeye ku ngaruka zo gutakaza indangamuntu
Amakuru

Ngoma: Agahinda k’uwasogongeye ku ngaruka zo gutakaza indangamuntu

Imvaho Nshya

October 24, 2023

Indangamuntu akenshi kuyitunga wumva ari ibisanzwe ariko uwayitakaje ntabashe guhita ayibona ni we ubasha kumva neza uburemere bwo kutayigira.

Mukamana Agnes wo mu Kagari ka Cyasemakamba, Umurenge wa Kibungo mu Karere ka Ngoma, ni umwe mu Banyarwanda bahuye n’ingorane zo kubura indangamuntu, ndetse kubera kutamenya aho ahita abaza ikibazo cye bimuviramo kumara amezi arenga atanu atarabona uwamufasha kubona indi.

Yavuze ikibazo cyo kubura irangamuntu cyatumye asiragira mu Nzego z’ibanze ahereye mu Kagari, ku Murenge ndetse birangira akigejeje no ku Karere.

Yagize ati: “Maze amezi atanu nsiragira mu nzego zitandukanye nta gisubizo mbona. Uyu munsi Akarere nakagejejeho ikibazo cyanjye gihabwa umurongo kuko hari urwego rufite mu nshingano irangamuntu, kandi uburyo bagikemuye nizeye ko kizakemuka.

Kuba adafite irangamuntu yavuze ko bimugiraho ingaruka zitandukanye kuko hari ubwo abura serivisi ndetse no gukora ingendo.

Yakomeje agira ati: “Mu minsi ishize nari mfite urugendo ariko ndaruhagarika kuko nari ngiye kujya muri Tanzania. Narahombye kuko nari mfite umuryango wanjye nari ngiye gusura harimo n’abana banjye.”

Ubuyobozi bw’Akarere ka Ngoma bwakiriye ikibazo cye n’iby’abandi baturage ku wa Mbere tariki ya 23 Ukwakira, ubwo hizihizwaga Umunsi Mpuzabikorwa ugamije kumva no kwakira ibibazo byabo.

Abaturage batuye mu Karere ka Ngoma bishimiye ko ubuyobozi bukomeje kubegereza serivisi aho ibibazo bidakemuriwe ku rwego rumwe bikemurirwa mu rwisumbuye.

Kayinamura Jean Baptiste utuye mu Murenge wa Kazo ufite ikibazo cyo kuba atarahabwa ingurane y’ubutaka ahanyujijwe umuhanda, yagize ati: “Umuhanda uzagera mu Bugesera unyuze hano wanyuze mu isambu yanjye. Uyu munsi naje kubaza aho ikibazo kigeze gikemurwa kuko nkeneye amafaranga. Akarere kamfashije kwibutsa MINICOFFIN na RTDA nizeye ko biri mu nzira nziza.”

Umuyobozi w’Akarere ka Ngoma Niyonagira Nathalie, yavuze ko abaturage bafite uburenganzira bwo kugezwaho serivisi kuko abayobozi bakorera abaturage.

Yagize ati: “Dukorera abaturage ni yo mpamvu tubegereza serivisi kugira ngo twakire ibibazo n’ibitekerezo bafite, tugamije kubaha serivisi zose kandi ko inshingano zacu ari bo zireba tubarinda gusiragira, bagaherwa serivisi hamwe kandi zinoze.”

Ubuyobozi bw’Akarere ka Ngoma buvuga ko gahunda yo kwegereza ubuyobozi abaturage izakomeza, dore ko kuva mu kwezi k’Ugushyingo 2022 hashyizweho itsinda rishinzwe gukemura no gukurikirana ibibazo by’abaturage, aho abarenga 1,200 bamaze guhabwa izi serivisi kandi ibibazo bigakemuka mu buryo bunyuze mu mucyo.

Abakiriwe ku Biro by’Akarere ku wa Mbere,  bahawe serivisi zirimo gukemura ibibazo by’ubutaka, amakimbirane, urubyiruko rukeneye irangamuntu, serivisi z’irembo, imanza zaciwe ntibanyurwe, ibyangombwa byo kubaka, gusura serivisi zitangirwa mu Karere n’ikindi.

FAUSTIN NSHIMIYIMANA

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA