Ngororero: Ingengo y’imari ya 2023-2024 isaga miliyari 33 Frw
Amakuru

Ngororero: Ingengo y’imari ya 2023-2024 isaga miliyari 33 Frw

NTAWITONDA JEAN CLAUDE

July 2, 2023

Inama y’Inama Njyanama y’Akarere ka Ngororero yateranye ku ya 29 Kamena 2023 yemeje ingengo y’imari y’Akarere izakoreshwa mu mwaka w’ingengo y’imari 2023/2024 ingana na 33,819,392,408 z’amafaranga y’u Rwanda.

Ni ingengo y’imari yiyongereyeho 8,8% ugereranyije n’iyakoreshejwe mu mwaka 2022/2023 ingana na 31,079,173,143 z’amafaranga y’u Rwanda, ikaba yarakoreshejwe ku kigero cya 96% nk’uko byasoanuwe n’Umunyamabanga Nshingwabikorwa w’Akarere ka Ngororero, Bahizi Emmanuel.

Ibikorwa bizakorwa muri iyi ngengo y’imari yatowe bizibanda ku kuzamura imibereho myiza y’abaturage aho byihariye 71%, ibikorwa byo mu nkingi y’ubukungu bikaba bifite 16% naho imiyoborere myiza ikaba ku kigero cya 13%.

Ibikorwa byo guteza imbere uburezi bizatwara 16,336,316,377 z’amafaranga y’u Rwanda, harimo imishahara y’abarimu, kunganira ababyeyi kugaburira abana ku mashuri ndetse no kongera ibyumba by’amashuri cyane cyane ay’imyuga.

Mu buhinzi n’ubworozi hazibandwa mu kunganira abahinzi kubona ifumbire n’imbuto y’indobanure no gukoresha ishwagara. Hazakorwa amaterasi y’indinganire mu Mirenge yose igize Akarere ka Ngororero ibikorwa by’ubuhinzi bikazatwara angana na 2,100,410,133 z’amafaranga y’u Rwanda.

Mu bikorwa remezo  hazakorwa igice cya mbere cy’Umuhanda Gatumba-Gashubi -Ndaro ureshya na kilometero 45.6, hazasanwa  igice cya mbere cy’umuhanda  Muramba-Gitega-Rubagaba-Gashonyi-Munini.
 

Mu buzima hazubakwa igice cya mbere cy’Ikigo Nderabuzima cya Ntobwe mu Murenge wa Ndaro  kizatwara miliyoni magana atanu.

Kugeza amazi meza ku batuye Ngororero mu ngengo y’imari yatowe harimo amafaranga yo gukora imiyoboro y’amazi ya Mukingi-Kayebe-Kabyiniro mu Mirenge ya Bwira na Muhororo ireshya na Kilometero 26,8Km, Kinyamasuka-Nganzo mu Murenge wa  Muhanda  (20,8 Km) n’umuyoboro wa Kazibaziba muri  Kageyo  ungana na Kilometero 1,8.

Inama Njyanama yayobowe n’Umuyobozi wayo Nyiramasengesho Jeannette yanitabiriwe n’intumwa ya Minisiteri y’Imari n’Igenamigambi Murekumbanze Jean Damascene ushinzwe Politiki yo kwegereza abaturage ubushobozi, yasobanuye ko ingengo y’imari yateguwe ku bufatanye bw’Akarere na Minisiteri y’Imari n’igenamigambi hibandwa ku bitekerezo byatanzwe n’abaturage. 

Umuyobozi w’Inama Njyanama y’Akarere yasabye ubuyobozi bw’Akarere gukoresha neza ingengo y’imari.

Hakomeje kugaragazwa ko amafaranga y’imishahara yanganaga n’amafaranga y’u Rwanda 19, 041, 385, 849, naho 12, 037, 787, 294 yagiye mu bindi bikorwa bitandukanye by’iterambere. Avuga ko kugera taliki ya 29 Kamena 2023 bari bamaze gukoresha asaga 29, 837, 493,931.

Muri iyo nama hemejwe indishyi ikwiye ku mitungo y’abaturage bimuwe ahantu hatandukanye ku mpamvu z’inyungu rusange, hafashwe umwanzuro ko Akarere kazashyiraho amabwiriza yihariye ajyanye n’isuku n’isukura mu Karere ka Ngororero, hemejwe ahantu hatandukanye hazatuzwa imiryango yahuye n’ibiza mu Karere ka Ngororero.


Hashizweho amabwiriza agamije kunoza umwuga w’abatwara abagenzi n’imizigo ku magare no gukumira impanuka ziterwa n’ayo magare.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA