Ngororero: Minisitiri Mbabazi yibukije ko ubutwari budasaba imyaka  
Amakuru

Ngororero: Minisitiri Mbabazi yibukije ko ubutwari budasaba imyaka  

NTAWITONDA JEAN CLAUDE

March 20, 2022

Minisitiri w’Urubyiruko n’Umuco Mbabazi Rosemary, yibukije ko ubutwari budasaba kuba ukuze ahubwo ko bisaba kugira umutima wo gukunda igihugu no kukitangira.

Yabikomojeho mu muhango wo kwibuka intwari z’i Nyange zashyizwe mu cyiciro cy’‘Intwari z’Imena’.

Abanyeshuri b’i Nyange banze kwitandukanya ubwo abacengezi bateraga ishuri ryisumbuye ry’i Nyange riherereye mu karere ka Ngororero, mu ijoro ryo ku wa 18 rishyira 19 Werurwe 1997.

Abacengezi basabye abanyeshuri bigaga mu mwaka wa Gatandatu kwitandukanya abahutu bakajya ukwabo n’abatutsi bakajya ukwabo, banga kwitandukanya. Ni nako byagenze abacengezi bageze mu mwaka wa Gatanu.

Minisitiri Mbabazi avuga ko kuba abana barashoboye kwanga kwitandukanya ahubwo amahitamo yabo akabaganisha ku bunyarwanda, ni gihamya cy’uko abana b’i Nyange ari intwari.

Yagize ati “Ubutwari ntibusaba imyaka, abana b’i Nyange banze kwitandukanya bakurikije ibyiswe amoko.

Kuba abana barashoboye kurwanya ikibi bagashyigikira ubunyarwanda, ni ikemeza ko ari intwari.

Abanyeshuri b’inyange badusigiye umurage wo guhangana n’ikibi ahubwo ugashyigikira ikiza”.

Izi ntwari zahaye umukoro abakiri bato mu kubaka ubunyarwanda bwari bwarashegeshwe n’abakoze Jenoside.

Mbabazi agaragaza ko amasomo y’ingenzi abana b’i Nyange basize, ari uguhuza abanyarwanda, guhora ushakisha icyunga abanyarwanda kuko hari byinshi abashaka kubatanya bashingiraho.

Akomeza agira ati: “Andi masomo twakura ku banyeshuri b’i Nyange ni ugushyigikira isano muzi Abanyarwanda dusangiye, kurwanya ikibi ugashyigikira ikiza”.

Ubutwari ni indagagaciro igaragarira mu buzima bw’umunyarwanda. Ubutwari nko gukunda Igihugu byagaragajwe n’aba bana b’i Nyange.

Ashimira ababyeyi bareze abanyeshuri b’i Nyange kuko ngo ntibari kubishobora hatarimo inyigisho zo mu muryango.

Yasabye abiga muri iri shuri gusigasira ubutwari bw’abatabarukiye i Nyange.

Ashimangira ko Abacengezi batsinzwe kuko icyo bari bagamije ni ukwica no kurimbura, baratsinzwe!

“Ubumwe bw’Abanyarwanda bwaratsinze, ukuri kwaratsinze, ubunyarwanda bwashoye imizi nta na kimwe twageraho tudashyize hamwe”.

Sindayiheba Phanuel, warokokeye mu gitero cy’abacengezi akaba ari na Perezida w’Ishyirahamwe ry’Abanyeshuri barokokeye i Nyange ‘Association Komeza Ubutwari’ ashimira ubuyobozi bukuru bw’igihugu burangajwe imbere na Perezida Paul Kagame kuko ngo hari byinshi byarahindutse.

Icyo gihe nta tumanaho ryabagaho, avuga ko Mujawamahoro Chantal amaze kwicwa n’Abacengezi byasabye iminsi irenze 3 kugira ngo ababyeyi be bo mu karere ka Nyamasheke bamenye ko yatabarutse.

Mu buhamya bwe yagize ati “Imyaka 25 irashize twibuka ko mu ijoro 18 abacengezi bateye iri shuri basaba ko abahutu bajya ukwabo n’abatutsi bakajya ukwabo.

Njye nigaga mu mwaka wa Gatandatu ariko nibuka ko indangagaciro y’ubunyarwanda ari yo twashyize imbere.

Byadusabye imyaka 3 kugira ngo uyu murage mwiza utangire gusibanganya umubi”.

Umwaka wa Gatandatu n’uwa Gatanu harimo abanyeshuri 47. Abacengezi bahise bicamo abanyeshuri 6, undi na we yitabye Imana nyuma kubera ingaruka z’ibikomere.

Sindayiheba avuga ko hari undi munyeshuri witabye Imana azize urupfu rusanzwe.

Abanyeshuri 39 basigaye bakomeje kwiga amashuri yisumbuye n’amakuru, ubu babarizwa mu nzego nkuru z’ubuyobozi, abandi barikorera.

Ashimira ko bagenzi be nyuma y’ibyo byose byabaye abanyeshuri bashyizwe mu kiciro k’Intwari z’Imena abandi basigaye bagashyiraho Ishyirahamwe ribahuza ryitwa ‘Komeza Ubutwari’.

Ubuyobozi bw’akarere ka Ngororero bushimira abanyeshuri b’i Nyange ko bagaragaje umutima w’ubutwari ntagereranywa bakitanga.

Nkusi Christophe, Meya wa Ngororero, yagize ati: “Aba bana bagaragaje umutima ukomeye, bagaragaje umusaruro w’ubuyobozi bwiza butari bwakamaze igihe kinini”.

Guverineri w’intara y’Iburengerazuba, Habitegeko François, ashimangira ko aya ari amateka atanga inyigisho zikomeye.

Ati: “Nkuramo ibyinshi ariko igikomeye cyane nuko ubutwari butagombera imyaka.

Abana bari bato cyane. Ntabwo bari abantu bakuru ariko bikanyereka inyigisho nziza imyaka mike Jenoside ihagaritswe tugatangira urugendo rwo gusimbuza inyigisho mbi z’amacakubiri, abana babyumise vuba”.

Ubutwari bw’abana b’i Nyange banze kuvuga ubwoko bwabo, ni urugero rw’uko “Ndi umunyarwanda” ishoboka.

Abana bigaga ku ishuri ryisumbuye ry’i Nyange banze kuvuga ubwoko bwabo igihe bari batewe n’abacengezi tariki 18/3/1997.

Bahisemo guhamya ko ari “Abanyarwanda” bigaragaza ko Abanyarwanda bashobora kugaruka ku isano ibahuza y’Ubunyarwanda.

Ishuri ryisumbuye ry’i Nyange riri mu cyahoze ari Komini Kivumu muri Perefegitura ya Kibuye, ubu ni mu Karere ka Ngororero mu Ntara y’Iburengerazuba.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA