Ngororero: Mu bibazo 169 byashyikirijwe urwego rw’Umuvunyi 146 byarakemutse
Imibereho

Ngororero: Mu bibazo 169 byashyikirijwe urwego rw’Umuvunyi 146 byarakemutse

Imvaho Nshya

October 5, 2023

Yankurije Odette, Umuvunyi Mukuru wungirije ushinzwe gukumira ibibazo bijyanye na ruswa n’akarengane, yagiriye uruzinduko rw’akazi mu Karere ka Ngororero kuri uyu wa 5 Ukwakira ashima uburyo bakemura ibibazo by’abaturage.

Yashyimye aho ako Karere kageze mu gukemura ibibazo by’abaturage, nyuma yo kugaragaza ko mu bibazo 169 byashyikirijwe Urwego rw’Umuvunyi mu kwezi kwa Nzeri 2022, 146 muri byo byakemutse.

Yagize ati: “Turashimira ubuyobozi bw’Akarere uburyo bushyira imbaraga mu gukemura ibibazo by’abaturage. Tuzakomeza ubufatanye kugira ngo hakumirwe inkomoko yabyo nyirizina”.

Muri ibyo bibazo 169 byagejejwe ku Rwego rw’Umuvunyi, ibibazo 23 ni byo bitarakemuka, kandi na byo birimo gushakirwa ibisubizo birambye.

Ibibazo bitarakemuka byiganjemo ibyerekeye ingurane ahubatswe ibikorwa remezo by’amashanyarazi, ibibazo by’abaturage bafite ubutaka bwanditseho Leta, ibibazo byo gusaba ubufasha n’ibibazo byo gukurikiranirwa imanza zikiri mu nkiko.

Umuyobozi w’Akarere ka Ngororero Nkusi Christophe, yasobanuye ingamba zifashishijwe mu gukemura ibibazo by’abaturage harimo ishyiraho ry’itsinda ryihariye ryashyizweho n’Akarere rishinzwe gukurikirana ikemurwa ry’ibibazo abaturage bageza ku Karere.

Ati: “Mu gukemura ibibazo by’abaturage twashyizeho gahunda ya ‘Egera umuturage umutege amatwi umukemurire ibibazo’. Iyi gahunda yatanze umusaruro kuko imirongo y’ababaza mu Nteko z’Abaturage yaragabanyutse. Turashimira Urwego rw’Umuvunyi rukomeje kutuba hafi mu gukemura ibibazo birenze urwego rw’Akarere no gukora ubuvugizi ku birenze ubushobozi bwacu”.

Habayeho kungurana inama kugira ngo ibibazo bitarakemuka bibonerwe ibisubizo uba n’umwanya wo kureba uburyo bwo gukumira aho bikunda guturuka.

Urwego rw’Umuvunyi rwashimye intambwe yatewe n’Ubuyobozi bw’Akarere mu gukemura ibibazo by’abaturage runizeza ubuvugizi ku bibazo bireba ibindi bigo bya Leta.

Abitabiriye inama basabwe gukomeza ubufatanye mu gukemura ibibazo by’abaturage.

Yankurije Odette, Umuvunyi Mukuru wungirije ushinzwe gukumira ibibazo bijyanye na ruswa n’akarengane

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA