Niger: UA ishyigikiye CEDEAO ku gukoresha imbaraga za gisirikare
Mu Mahanga

Niger: UA ishyigikiye CEDEAO ku gukoresha imbaraga za gisirikare

Imvaho Nshya

August 12, 2023

Perezida wa Komisiyo y’Umuryango w’Ubumwe bw’Ibihugu by’Afurika Moussa Faki yatangaje ko hari impungenge ku buzima bw’uwari Perezida wa Niger Mohamed Bazoum, wahiritswe ku butegetsi ku ya 26 Nyakanga 2023, akaba abona ko ari ngombwa ko hakoreshwa ingufu za gisirikare, kuko inzira y’ibiganiro yananiranye.

Muri iri tangazo rigenewe abanyamakuru, Moussa Faki Mahamat agaragaza ko ashyigikiye byimazeyo icyemezo Umuryango w’Ubukungu w’Ibihugu by’Afurika y’Iburengerazuba wafashe cyo ku ya 10 Kanama 2023, cyo gushyira mu bikorwa no kohereza ingufu ziharanira kugarura umutekano muri Niger.

Moussa Faki arasaba ko Mohamed Bazoum yarekurwa bidatinze kandi ahamagarira amahanga guhuriza hamwe imbaraga zayo mu kurokora ubuzima b’uwahoze ari Perezida wa Niger.

Nk’uko bikomeza bitangazwa na Radiyo Mpuzamahanga y’ u Bufaransa, Umuryango w’Ubumwe bw’Afurika (AU) ushyigikiye Umuryango w’ubukungu w’Ibihugu by’Afurika y’Iburengerazuba ku bijyanye n’ibibera muri Niger.

Ku ya 10 Kanama 2023, nyuma y’inama y’umuryango wo mu karere, Abakuru b’Ibihugu na Guverinoma ba CEDEAO bashyize bahurije hamwe ijwi ku gushyira ingufu mu gisirikare. Ibihano byashyizweho bigakomeza kandi bigomba gushimangirwa.


CEDEAO ivuga ko ibyihutirwa ari uguhagarika imidugararo.

Uyu muryango ariko wemeje ko washyizeho gahunda y’ibiganiro ngo ikibazo gikemurwe mu mahoro”, akaba ari umwanzuro ushyigikiwe n’Umuryango w’Afurika Yunze Ubumwe ku rwego rw’umugabane.


Moussa Faki Mahamat, abinyujije mu itangazo rigenewe abanyamakuru, ahamagarira abahiritse ubutegetsi guhagarika imidugararo vuba na bwangu nk’uko na CEDEAO yabisabye.

Abaperezida bo mu bice by’Afurika y’Iburengerazuba bakomeje ibihano kandi basobanura neza ko bashyigikiye inzira y’amahoro binyuze mu biganiro, ariko banategeka gutegura ingabo za gisirikare no kuzohereza hagamijwe kugarura demokarasi muri Niger.


Nk’uko byatangajwe na Perezida wa Cote d’Ivoire, Alassane Ouattara, ibihugu bigize uyu muryango byanzuye ko kugira ngo iki gikorwa gitangire vuba bishoboka, ko Côte d’Ivoire izatanga batayo igizwe n’abantu 850 kugeza ku 1100, kuri Niger na Benin by’umwihariko.

Moussa Faki asaba ko Mohamed Bazoum yarekurwa akanahamagarira Umuryango mpuzamahanga guhuriza hamwe ingufu ngo batabare ubuzima bw’uwo muperezida wahiritswe ku butegetsi.

CEDEAO yari yasabye ko Umuryango w’ubumwe bw’Afurika wemeza izi ntambwe zatewe. Ibi birakorwa ubu, bikazagira uburemere ndetse bikaba bikurikije amategeko ku rwego rw’akarere.


Ikindi kandi AU yamaganye imigirire mibi yakorewe Perezida Mohamed Bazoum. Umukuru w’igihugu cya Niger ufungiye mu rugo iwe mu n’umuryango we.

AU igira iti: “Biteye impungenge zikomeye ku bijyanye n’ifungwa rye kuko ririmo kumutesha agaciro cyane, rigira ingaruka ku buzima bwe”.

Yanditswe na NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA