Nkunda u Rwanda n’Abanyarwanda- Pstr Rick Warren mu Kwibuka 28
Amakuru

Nkunda u Rwanda n’Abanyarwanda- Pstr Rick Warren mu Kwibuka 28

NTAWITONDA JEAN CLAUDE

May 30, 2022

Pasiteri Rick Warren, umwanditsi w’Ibitabo akaba n’umuvugabutumwa wamamaye mu ruhando mpuzamahanga, yahishuye urukundo akunda u Rwanda n’Abanyarwanda, aho yashimangiye ko ukurikije igihamya cya Pasiporo nyarwanda afite udashobora gutinya kumwita Umuntyarwanda.

Mu muhango wa mbere wo kwibuka ku rwego mpuzamahanga Jenoside yakorewe Abatutsi wabereye muri Leta ya Utah ya Leta Zunze Ubumwe z’Amerika mu mpera z’icyumweru gishize, Pstr Rick Warren yahishuye ko mu myaka 28 ishize, amaze gusura u Rwanda inshuro zisaga 50 ziganjemo izo yabaga yatumiwemo na Perezida wa Repubulika y’u Rwanda Paul Kagame.

Yagize ati: “Ndi inshuti y’u Rwanda n’Abanyarwanda bose. Nazindukiye mu Rwanda ndetse mpakorera inshuro zirenga 50 igihe cyose ntumiwe na Perezida wa Repubulika y’u Rwanda Paul Kagame, mu myaka 28 yose ishize. Nshobora kwemeza ko Ndi Umunyarwanda, ndetse na Pasiporo nyarwanda yanjye irabyemeza. Ni iby’igiciro kinini kuba ndi hano (muri Leta ya Utah) mu muhango mpuzamahanga wo kwibuka Jenoside yakorewe Abatutsi mu 1994.”

Pstr Rick Warren washinze Itorero “Saddleback Church” akaba yarananditse Igitabo kivuga ku kubaho ubuzima bufite intego kiri mu byakunzwe cyane kikagurwa n’abatagira ingano ku Isi, yagize uruhare rukomeye mu rugendo rw’isanamitima mu Rwanda binyuze mu ivugabutumwa n’ibikorwa bikubiye muri gahunda zitandukanye yatangije.

Ntiyahwemye kwifatanya n’ababuze ababo muri Jenoside yakorewe Abatutsi, abayirokotse n’Abanyarwanda muri rusange mu bihe bitandukanye by’umwihariko ibyo kwibuka aho yazanaga ubutumwa bw’ihumure kuri benshi.

Aha ni mu kwezi kwa Kanama 2013 ubwo Rick Warren yari mu Rwanda

Ku wa Gatanu, ni bwo Pstr Rick Warren yatanze ikiganiro kirambuye aho yagarutse ku bintu 12 yabashije kumenya ku birebana n’umubabaro, nyuma y’imyaka isaga 53 ishize ari mu murimo w’ivugabutumwa watumye agera mu bice bitandukanye by’Isi aho yagiye ahura n’abantu bahuye n’ubuzima bugoye cyane.

Muri abo yahuye na bo harimo n’Abanyarwanda barokotse Jenoside yakorewe Abatutsi baciye mu bihe bigoye cyane… Yamenyesheje abitabiriye uwo muhango ko nyuma y’ibibazo bikomeye kurusha ibindi, iyo umuntu agihumeka ubuzima buba bugomba gukomeza, ashishikariza buri wese kwegera abari mu kababaro bakabakomeza kuko ari wo muti w’ibanze ushobora kubakura ibuzimu ukabasubiza ibumuntu.

Umuhango wo kwibuka ku nshuro ya 28 Jenoside yakorewe Abatutsi wateguwe n’Ubuyobozi bw’Umuryango IBUKA-USA washinzwe mu mwaka wa 2020 nk’Ishami rya IBUKA, Umuryango nyarwanda uharanira Inyungu z’Abarokotse Jenoside yakorewe Abatutsi.  

Muri uyu muhango wamaze iminsi itatu guhera ku wa Gatanu taliki ya 27 Gicurasi, abarokotse Jenoside babonye umwanya wo gusangira ubuhamya ndetse banaganira ku rugendo rwo kwiyubaka, uruhare rwabo mu kubika no gusigasira amateka ya Jenoside yakorewe Abatutsi, ibiganiro byatanzwe n’impuguke ku ngingo zinyuranye zijyanye no guhangana n’ingorane zihari n’ibindi.

Ku munsi wa mbere, abitabiriye imbonankubone baturutse mu Rwanda no muri Leta zitandukanye za USA barahuye barasuhuzanya ndetse banafata umwanya wo kwibuka bacana urumuri rw’icyizere.

Ku munsi wakurikiyeho, hakozwe ibiganiro nyunguranabitekerezo bijyanye no kwigisha Jenoside icyo ari cyo, uko yakwirindwa n’uko bayirwanya, ibijyanye no guhakana no kuyipfobya, ubuhamya n’izindi ngingo zinyuranye. Mu masaha y’umugoroba habayeho ijoro ryo kwibuka.

Gahunda yo kwibuka ku Cyumweru yatangijwe n’Urugendo rwo kwibuka (Walk to Remember). Uyu muhango wacaga imbonankubone ku mbuga nkoranyambaga ndetse n’abantu bashoboraga kuwitabira bifashishije ikoranabuhanga aho babaga bari mu bice bitandukanye by’Isi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA