Ntibinyorohera guteganya intambara- Perezida Kagame avuga kuri RDC
Amakuru

Ntibinyorohera guteganya intambara- Perezida Kagame avuga kuri RDC

NTAWITONDA JEAN CLAUDE

July 8, 2022

Perezida wa Repubulika y’u Rwanda Paul Kagame yongeye kuvuga ko yishimiye ko ibiganiro yagiranye na Perezida wa Repubulika Iharanira Demokarasi ya Congo Felix Antoine Tshisekedi Tshilombo, bahujwe na Perezida w’Angola João Manuel Gonçalves Lourenço, byagenze neza ashimangira ko nta n’umwe ushishikajwe n’intambara cyangwa umwuka mubi uri hagati y’ibihugu byombi.

Mu kiganiro n’umunyamakuru wa France 24 Marc Perelman, abajijwe ku kuba mbere y’uko ku wa Gatatu Perezida Tshisekedi yari yatangaje ko hashobora kuvuka intambara ihuza RDC n’u Rwanda, Perezida Kagame yavuze ko abangamirwa no kuvuga ku ntambara kandi atoroherwa no kuyiteganya.

Yagize ati: “Njye ntibijya binyorohera kuvuga ku ntambara. Nabibonye mu kinyamakuru Financial Times, ariko njye ndakubwira ko bitanyorohera kandi sinihutira guteganya intambara cyangwa ngo nyitegereze; Reka ibyo tubishyire ku ruhande. Impamvu twari muri Angola, ni uguharanira ko ubwumvikane buke buhari bukemurwa binyuze mu bwumvikane bwa gicuti bitanyuze mu ntambara.”

Perezida Kagame yaboneyeho kuvuga ko yizeye ko imyanzuro yafatiwe i Luanda ku wa Gatatu taliki ya 6 Nyakanga itabaye amasigaracyicaro, avuga ko intambwe yo kuganira yari ingenzi ariko idahagije mu gihe ibyavuzweho bidashyizwe mu bikorwa.

Yanakosoye abavuga ko Abakuru b’Ibihugu byombi basinyanye amasezerano yo guhagarika intambara, agira ati: “Mu ntambara hari impande nyinshi ziba zirimo. Kuvuga ibijyanye no guhagarika intambara bireba impande zihanganye, ni ukuvuga M23 n’abo barimo kurwana ari bo FARDC.” Aha yashimangiraga ko u Rwanda rutari mu mpande zikwiye kuba zisinya amasezerano.

Abajijwe icyo avuga ku kuba Leta ya RDC idahwema kwamagana ubushotoranyi bw’u Rwanda ndetse bikaba byaranashimangiwe n’Ambasade ya Leta Zunze Ubumwe z’Amerika muri icyo gihugu, Perezida Kagame yagize ati: “Iteka ntungurwa n’uko mu gihe cy’intambara wenda tuvuge muri RDC, abantu bihutira gushinja u Rwanda ariko bahisemo guceceka [nkeka ko baba babigambiriye] ku kibazo cya FDLR imaze imyaka 25 hariya. Iyo wumvise abantu bavuga ibyo bintu ni nkaho u Rwanda ari rwo ruteza ibibazo byose, rwagiye muri RDC rutangira intambara n’ibindi.

Nta n’icyo bavuga ku bisasu biraswa ku butaka bwacu n’ingabo za Congo, baraceceka kuri FDLR zinjiye mu Majyaruguru y’igihugu mu 2019 zikica abaturage. Niba tuvuga ku bushotoranyi, ni gute ufata umwanzuro wo kuroha ibisasu hanze y’umupaka wawe? Iyo ufite abantu benshi bafitanye ibibazo, ugakomeza kwibanda kuri umwe ugaragaza ko ari we ufite ikibazo, ni wowe uba ufite ikibazo, si abo urimo gushinja…”

Perezida Kagame yongeye gushimangira ko M23 atari ikibazo cy’u Rwanda, kuko abayigize atari Abanyarwanda kandi ngo nta n’icyo u Rwanda rubakeneyeho. Yavuze ko inshuro nyinshi ubuyobozi bwa Congo bwasobanuriwe amateka y’abo baturage bavuga ururimi rw’Ikinyarwanda kandi ari Abanyekongo, ariko usanga babyirengagiza.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA