Nyabihu: Abafatanyabikorwa basabwe “kureba kure”
Imibereho

Nyabihu: Abafatanyabikorwa basabwe “kureba kure”

Imvaho Nshya

March 25, 2022

Abafatanyabikorwa mu iterambere ry’Akarere ka Nyabihu basabwe kurushaho kunoza ibyo bakora no kubyongera mu bwiza no mu bwinshi kugira ngo barusheho kwiteza imbere,kuzamura umuturage n’Igihugu muri rusange.

Ibi babisabwe muri iki cyumweru cyahariwe isuzumabikorwa ry’ibikorwa by’abafatanyabikorwa barimo abikorera ,imiryango itegamiye kuri Leta Nyarwanda ndetse niri mpuzamahanga  ikorera muri aka Karere aho basuwe bakerakana ibyo bakora, imbogamizi bagihura nazo n’ibindi bitandukanye.

Umuyobozi w’akarere ka Nyabihu wungirije ushinzwe ubukungu akaba na Visi perezida w’Ihuriro ry’abafatanyabikorwa JADF-Nyabihu Habanabakize Claude n’itsinda yari ayoboye basura koperative Vunga Coffee mu Murenge wa Shyira yashimye urwego bamaze kugeraho abasaba kurushaho kongera ibyo bakora mu bwiza no mu bwinshi.

Yavuze ko ibimaze kugeraho ari byiza bizamura abagize koperative n’imiryango yabo,abaturanyi bayo n’igihugu muri rusange ariko abasaba gukorana n’abandi bafatanyabikorwa kuko byabafasha kuzamura urwego rwabo.

Yaragize ati: “Twasuye abafatanyabikorwa benshi bakorera mu Karere kacu iyo urebye usanga ibyo bakora bibatunze ndetse bikagirira akamaro abantu benshi ariko umusaruro wabyo ukwiye kurushaho kuzamuka ukagera kuri benshi,kugira ngo bigerweho bisaba imbaraga nyinshi bisaba ko bareba kure bakongera ibyo bakora mu bwiza no mu bwinshi.”

Yakomeje agira ati:” Nka Vunga Coffee turabasaba kongera hegitari bahingaho ikawa,bakongera ibiti ariko bagashaka uko batoranya abanyamuryango bafite ubuso bwinshi bagategura ingendoshuri ahantu hatandukanye bamaze gutera imbere kubarushaho bakigiranaho,barasabwa gukorana n’ibigo by’imari kuko byabafasha kubona ubushobozi bikaborohera gushira mu bikorwa ibyo bateganya bakagura uruganda kugera naho na bo bakwikorera ikawa aho kuyitunganya gusa.”

Ubuyobozi bwa Koperative Vunga Coffee igizwe n’abanyamurynago bagera kuri 181 ,yatangiye mu mwaka wa 2007 bafite ibikorwa bifite agaciro ka miliyoni 80 harimo n’uruganda rutunganya ikawa; yemeza ko abahinzi n’abakozi bakorana bamaze kwiteza imbere aho bashoboye kwigeza ku bintu by’ingenzi byabafasha kwiteza imbere.

Zimwe mu mbogamizi bafite harimo kubura ubushobozi bwabafasha guhinga ikawa,kuyitunganya kugeza inyowe n’abakiliya ibintu abona bituma batunguka nkuko bikwiye bagakora bakorera abandi bashoramari.

Uwimana Daphrose, Umuyobozi wa Koperative Vunga Coffee, yagize ati: “Iyo urebye ubona tumaze kwiteza imbere ariko turacyabura ubushobozi kuko usanga inyungu nyinshi iva mu buhinzi no gutunganya ikawa itwarwa n’abatugurira umusaruro tubonye uko twayitunganyiriza kugeza inyowe byatuma twunguka kurushaho,turasaba ubuyobozi kuduha amahirwe.

Ikindi usanga twigeze guhura n’ibiza bituma dusubira inyuma kuko imirima yacu yahuye n’inkangu bituma duhomba umwa ushize hafi miliyoni 5 gusubira ku murongo byagiye bituvuna,gusa natwe mu rwego rwo kwishakamo ibisubizo twagiriwe inama yo kugana ibigo by’imari no gushaka abafatanyabikorwa ngo bidufashe kurushaho kwiteza imbere.”

Twizerimana Goreti ni umukozi utoranya ikawa muri Vunga Coffee, iherereye mu Mudugudu wa Kaziratara,,Akagari ka Kanyamitana, mu Murenge wa Shyira, Akarere ka Nyabihu. Amaze imyaka itatu akora nyakabyizi aho ngo mbere yari mu bukene bukabije ariko aho aziye muri koperative byatumye azamuka yiteza imbere n’umuryango we.

Agira ati: “Inyungu nyibona kuko mfite akazi ka buri munsi kamfasha gutunga umuryango,kwibonera mituweli, ibikoresho b’abana n’ibindi kandi byose bikomoka ku kazi dukora kampemba amafaranga 1000 ku munsi. Gusa yongerewe byatuma turusaho kwiteza imbere,twakora cyane kuko akazi kaba ari na ko kari kwiyongera.”

Pasiteri Twizerimana Ildephonse Perezida wa JADF Inkingi Nyabihu igizwe n’imiryango Nyarwanda avuga ko cyari kigamijwe ari ukugenzura imikorere y’abafatanyabikorwa cyane ko ibyinshi byahungabanyijwe na COVID-19 harebwa imbogamizi bahuye na zo no kurenba ibyo bakoze byarishimiwe n’abafatanyabikorwa.

Agira ati: “Hari ibikorwa bari bafite bitakozwe nk’uko bikwiye  twabagiriye inama yo kwihutisha ibyadindijwe na COVID-19 ngo bazibe icyuho no tubasura twarebeye hamwe imbogamizi bahuye na zo ngo twiga n’icyakorwa muri ibi bihe by’icyorezo, ,hakozwe ibintu byinshi bitari biteganyijwe hari aho bakoze ibitari bipanze ariko kuganira nabo byadufashije kubona ishusho no kurebera hamwe icyakorwa n’ubujyanama.”

Muri iyi gahunda y’isuzumabikorwa ry’ibikorwa by’abafatanyabikorwa mu iterambere ry’Akarere ka Nyabihu hasuwe ibikorwa by’ubuhinzi n’ubworozi hasurwa amakoperative atandukanye ari mu Mirenge igize Akarere,hasurwa ibikorwa byegereye Parike y’Ibirunga, hasurwa imiryango itegamiye kuri Leta haganirizwa abakozi n’abagenerwabikorwa harebwa aho byabakuye n’aho bibagejeje.

Ihuriro ry’abafatanyabikorwa mu Iterambere ry’Akarere ka Nyabihu JADF Inkingi Nyabihu rigizwe n’imirynago itegamiye kuri Leta Nyarwanda 42 n’iri mpuzamahanga 17 n’amadini 37, ibigo bya Leta Byegerejwe abaturage 8 gusa no muri iri suzumabikorwa hasuwe n’ibikorwa by’abikorera PSF.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA