Nyabihu: Bisi zivanga n’abarema isoko rya Vunga ritagira gare
Imibereho

Nyabihu: Bisi zivanga n’abarema isoko rya Vunga ritagira gare

Imvaho Nshya

October 15, 2023

Abagana n’abakorera muri Santere y’ubucuruzi ya Vunga mu Murenge wa Shyira, Akarere ka Nyabihu; bavuga ko babangamiwe no kuba bategera imodoka mu muhanda kubera nta gare bagira, aho imodoka  cyane ko  ziba ziparitse mu muhanda cyangwa zikivanga n’abarema isoko ku munsi waryo.

Kuba iyi santere y’ubucuruzi itagira gare kandi abayigana baturuka mu bice binyuranye by’Intara y’Amajyaruguru n’iy’Iburengerazuba ngo ni ibintu bituma harangwa umutekano muke nk’uko Nsanzimfura Ibrahim wo mu Karere ka Nyabihu abivuga.

Yagize ati: “Kuba nta gare muri iyi santere y’ubucuruzi ya Vunga tugira ni kimwe mu bituma hano rimwe na rimwe dukunze guhura n’impanuka ubundi tugahora mu makimbirane n’abanyabiziga. Rwose aha hantu tubonye gare byadufasha kandi gare koko ikaba yanatanga imirimo, aho Ikigo cyo gutwara abagenzi cyagira ibiro tukajya tubonamo akazi ndetse n’ubucuruzi kuko abagenzi muri gare bakenera  aho bagura nk’amazi”.

Niyorugero Jean d’Amour utwara abagenzi mu muhanda Musanze-Vunga, avuga ko kuba nta gare bagira ari ikibazo gikomeye cyane.

Yagize ati: “Kuba nta gare tugira hano bidutera igihombo kinini cyane, nk’ubu ku munsi w’isoko usanga dushwana na Polisi ngo twaparitse nabi kubera nyine imodoka zivanga n’abaremye isoko ugasanga byabaye akavuyo kuko ujya guparika ugasanga umucuruzi yatanditseho inyanya kuko aho duparika hafatanye n’isoko, kandi imodoka zigenda ziyongera umunsi ku wundi, dukeneye rwose ko hano hubakwa gare”.

Kuba muri Vunga hakenewe gare bishimangirwa na Mukandayisenga Antoinette, Umuyobozi w’Akarere ka Nyabihu.

Yagize ati: “Gare ya Vunga irakenewe ubu turimo turashaka ahantu yakubakwa mu minsi iri imbere, kuko burya iriya gare izaba yakira abantu baturutse henshi nubwo ari ko bisanzwe bigenda, ubu hahuriramo abantu bava mu Karere ka Nyabihu bajya i Musanze ndetse bava banerekeza Muhanga, urumva rero ko gare ikenewe bashonje bahishiwe rero kuko iki kibazo kirimo kwigwaho”.

Gare ya Vunga ikoreshwa n’abaturutse bo mu Turere twa Musanze-Ngororero- Muhanga na Nyabihu baje kurema isoko abandi baje kwivuza ku Bitaro bya Shyira.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA