Nyabihu: ‘Ingetura’ zikomeje guhungabanya umutekano w’abaturage

Nyabihu: ‘Ingetura’ zikomeje guhungabanya umutekano w’abaturage

Imvaho Nshya

October 26, 2023

Abaturage bakorera n’abagana santere y’ubucuruzi ya Jenda mu Karere ka Nyabihu, bavuga ko insoresore zizwi ku izina ‘ry’Ingetura’ zikomeje kubahungabanyiriza umutekano, babambura, bakina urusimbi.

Basaba Ubuyobozi bw’Akarere ko bwabafasha gukemura iki kibazo bufatira ibihano izo nsoresore.

Maniragaba Martin ni umwe mu baturage bakorera muri santere y’ubucuruzi ya Jenda, yagize ati: “Iyi santere yacu ibangamiwe n’insoresore z’imburamukoro zirirwa hano zikina urusimbi, harimo n’abashumba bitwaza imihoro n’inkoni, banatwambura amatelefone, bafata ku ngufu, mbese ibikorwa bibi byose uzi bibaho. Reka rero nk’abagore barabambura bamwe bakabafata ku ngufu, abacuruzi bo hano barigura kugira ngo batabica”.

Maniragaba akomeza avuga ko inzego z’umutekano zikwiye kubihagurukira.

Ati: “Hano nta matara yo ku mihanda no ku nzu bamwe nta yo bashyiraho, ibi bikaba ari kimwe mu bitanga icyuho bagapfumura inzu nyinshi kubera umwijima, ubundi nabwo Polisi yabafata bugacya  bagarutse; ibi rwose bibera hano wagira ngo ni mu kindi gihugu, abitwa ngo ni abashumba n’Ingetura baratumara”.

Umuyobozi w’Akarere ka Nyabihu Mukandayisenga Antoinette, avuga ko izo nsoresore zizwi, ariko ko batazihanganira ko abo bose b’imburamukoro bakomeza guhohotera abaturage.

Umuyobozi w’Akarere ka Nyabihu Mukandayisenga Antoinette

Yagize ati: “Ntabwo tuzajenjekera abo bose bagamije kurya utwa rubanda, no guhungabanya umutekano, ubu turimo turakorana na Polisi ndetse na RIB kugira ngo abo bose bafatwe by’intangarugero. Ikindi ni uko hagiye gukazwa amarondo no gushyira amatara ku mihanda no ku nzu z’ubucuruzi hose”.

Mu karere ka Nyabihu ku masantere y’ubucuruzi henshi hakunze kumvikana insoresore zihungabanya umutekano nko muri santere ya Mukamira no muri Bigogwe hari abiyise ngo ni ‘Abajama’, none hakubitiyeho n’abiyise ‘Ingetura’ bose barakubita bakanakomeretsa.

Iki kibazo inzego z’umutekano zikaba zivuga ko zigiye kugihagurukira ku buryo kitazongera kuhagaragara ukundi, ikindi ni uko n’abaturage basabwe gutanga amakuru kuri izo mburamukoro zirirwa zibuza abantu amahoro.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA