Nyagatare:  Abakoze mu materasi bakangurirwa kuzuza imyirondoro neza bagahembwa
Amakuru

Nyagatare:  Abakoze mu materasi bakangurirwa kuzuza imyirondoro neza bagahembwa

NSHIMIYIMANA FAUSTIN

April 8, 2024

Abaturage bahawe imirimo yo guhanga amaterasi y’indinganire bakoreraga ku masite ari mu Mirenge ya Katabagemu, Rukomo, Mukama na Nyagatare bagera ku 6 000 bahawe akazi, 37 muri bo bavuga ko batarahembwa  basabwe kuzuza neza imyirondoro yabo ngo babone uko bahembwa.

Mu gihe cyo guhembwa cyarageze ntibabona amafaranga bakoreye, babajije impamvu babasubiza ko ari uko imyirondoro yabo yanditswe nabi.

Aba baturage bibaza ukuntu gukosora icyo kibazo byafata amezi 8 yose mu gihe bo badahwema guhura n’ingaruka zo kudahembwa bagasaba ko ubuyobozi bwabafasha bakishyurwa amafaranga yabo cyane ko imirimo yarangiye.

Mukabunani Rose yagize ati: “Twagiye ku karere kubaza ikibazo cyabayeho ariko kugeza n’ubu ntiturishyurwa. Twagiye twikopesha ibiryo byo gusigira imiryango yacu kugira ngo babone ikibatunga. Turabahamagara bakatubwira ngo twihangane bari kubikurikirana ariko twayobewe igihe bizakemukira. Ntitwihingiye cyangwa ngo dukore ibindi ngo abe ari byo bidutunze kuko twari mu materasi.”

Rwamwejo Jackson nawe yagize ati: “Twasize imiryango izi ngo tugiye gukorera amafaranga ariko dutahira aho. Ubu twafashe amadeni menshi mu mabutike, nta baturage batwizera ngo batuguriza nibura kuko badufata nka ba bihemu. Bigeze mu kwezi kwa kane tutarahembwa kandi abandi bayabonye mu kwezi kwa Nzeri 2023.”

Nduwayo Patrick yagize ati: “Batwatse nimero za konti n’iz’irangamuntu badushyira muri sisitemu turi ku masite ariko kugeza ubu ntituzi ikibazo cyabayemo gituma amafaranga adashyirwa kuri konti zacu. Nibaturenganure baduhe amafaranga twakoreye kuko biraduteza ubushobozi buke.”

Umuhuzabikorwa w’Umushinga CDAT (ari nawo wabakoreshaga iyo mirimo), Habumugisha Vedaste, yavuze ko impamvu hari abaturage batabonye amafaranga abandi bakayabona, byatewe n’abakoze amakosa bagatanga imyirondoro idahuye na konti zabo bikadindiza uburyo bwo kubaha amafaranga.

Yagize ati: “Abatarabona amafaranga batanze konti zo guhemberwaho zituzuye cyangwa se zitari zo. Bakoze amakosa ni yo mpamvu hari abo bakoranye benshi bayabonye ariko bo ntibayabone. Nibihangane turi kubafasha kugira ngo na bo bayabone vuba.”

Umuyobozi w’Akarere ka Nyagatare, Gasana Stephen yavuze ko ikibazo cy’abakoze mu materasi bakizi kandi bamaze gushyiraho itsinda rishinzwe kugikurikirana kugira ngo gikemuke byihuse.

Yagize ati: “Twafashe itsinda ry’abashinzwe gucunga umutungo w’Akarere na CDAT bajya mu nzego zose bakorana bareba amafaranga yagarutse. Ubwo rero ahari abaturage batishyuwe, abo bakozi bajya kuri site bakareba abatarishyuwe bakabandika ndetse bakabikosora.

Ubwo twakosoraga bwa mbere abaturage bakabona amafaranga, hagaragaye abandi bantu bavuga ko batabonye amafaranga nta n’amakuru bari bazi. Ubwo rero abasigaye nabo bari gufashwa kuko amafaranga arahari. Twizeye ko mu cyumweru kimwe bazaba bayabonye.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA