Nyagatare: RIB yasobanuye ibihano bihabwa abasambanyije abana
Imibereho

Nyagatare: RIB yasobanuye ibihano bihabwa abasambanyije abana

Imvaho Nshya

October 4, 2023

Urwego rw’Igihugu rw’Ubugenzacyaha, RIB ku bufatanye n’Inzego z’ibanze mu Karere ka Nyagatare mu Ntara y’Iburasirazuba, rurimo gusobanurira abaturage ibyaha bihabwa abasambanyije abana, serivisi zitangwa na Isange One Stop Center n’uko barwanya ihohoterwa rishingiye ku gitsina.

Ni ubukangurambaga bwatangiriye mu Kagari ka Nyamirembe mu Murenge wa Gatunda ku wa Mbere tariki 02 Ukwakira 2023, burasoza kuri uyu wa Gatatu tariki 04 Ukwakira 2023.

Nsabimana Habuni Jean Paul, Umuyobozi Mukuru muri RIB ushinzwe Isange One Stop Center, avuga ko icyaha cyo guhohotera abangavu cyahagurukiwe n’inzego zose.

Asobanura ko uwasambanyije umwana ahabwa igihano cya burundu mu gihe yasambanyije utarangeje imyaka 14 byaviriyemo ingaruka z’ubumuga cyangwa indwara zidakira.

Amategeko ateganya ko uwasambanyije umwana akanamugira umugore, na we ahanishwa igihano cy’igifungo cya burundu.

Ubukangurambaga bwatangijwe na RIB bugamije gukangurira abaturage kwitabira serivisi za Isange kugira ngo habeho gukumira no kugabanya ibi byaha muri aka Karere ka Nyagatare.

RIB isobanura ko ubukangurambaga bugamije kumenyekanisha serivisi za Isange One Stop Center no gukumira ibyaha bikomoka ku ihohoterwa rishingiye ku gitsina n’irikorerwa abana.

Uretse gusambanya umwana, ngo ashobora no gukorerwa ihohoterwa rikorerwa ku mubiri nko gukubita no gukomeretsa, irikorerwa ku gitsina no kwangiza imyanya ye ndangagitsina.

Hari n’ihohoterwa rikorerwa mu mitekerereze nshenguramutima nko guhoza ku nkeke uwo mwashakanye ndetse n’ihohoterwa rishingiye ku mitungo.

Murekatete Juliet, Umuyobozi w’Akarere ka Nyagatare wungirije ushinzwe imibereho myiza y’abaturage, yagaragaje ko mu Karere ka Nyagatare bafite Isange One stop center yo ku bitaro bya Nyagatare n’iyo ku bitaro bya Gatunda.

Yagize ati “Abaturage begerewe kugira ngo berekwe impamvu ari ngombwa kuyigana ku muntu wahohotewe kugira ngo babashe gufashwa vuba na bwangu.”

Avuga ko mu mezi abiri ashize mu Karere ka Nyagatare habarurwa abana benshi bahohotewe kandi ko igiteye impungenge ari uko ababahohotera badafatwa.

Murekatete Juliet, Umuyobozi w’Akarere ka Nyagatare wungirije ushinzwe imibereho myiza y’abaturage

Ukwezi kwa Nyakanga kwarangiye abana 71 basambanyijwe by’umwihariko abari munsi y’imyaka 19.

Ni mu gihe abari munsi y’imyaka 17 basambanyijwe bagera kuri 21.

Muri Kanama abasambanyijwe ni 98 barimo 28 bari munsi y’imyaka 17. Bivuze ko mu mezi abiri ashize abana 218 basambanyijwe.

Ubuyobozi bw’Akarere ka Nyagatare bugaragaza ko hakiri imbogamizi zo kutabona abasambanya abana ngo bashyikirizwe ubutabera.

Ati: “Ibi bituruka ku mpamvu ebyiri zirimo guhishirwa n’imiryango y’abana baba basambanyijwe.

Icya kabiri abana na bo barabahishira ku buryo iterabwoba abo bana bashyirwaho rituma batabavuga.

Ikindi gihatse byose ni ibiyobyabwenge, aho bituma abenshi babinywa basambanya abana”.

Abakozi ba RIB bakiriye bimwe mu bibazo by’abaturage bakorewe ihohoterwa

Isange One Stop Center yatangiye mu mwaka 2009 nyuma y’uko bigaragaye ko ibyaha by’ihohoterwa rishingiye ku gitsina n’irikorerwa abana byiyongeraga ndetse n’abarikorewe ntibabone ubutabazi bw’ibanze n’ubutabera buboneye.

Kuri ubu Isange ibarizwa mu bitaro 48 by’Uterere twose tw’Igihugu mu rwego rwo kugira ngo Leta irusheho gufasha abahohotewe kubona ubufasha bwihuse.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA