Nyamagabe: Abaturage bashimira Ubuyobozi bwiza bubashyira ku isonga
Imibereho

Nyamagabe: Abaturage bashimira Ubuyobozi bwiza bubashyira ku isonga

NYIRANEZA JUDITH

February 10, 2024

Abaturage bo mu Karere ka Nyamagabe by’umwihariko abatuye mu Mudugudu w’Icyitegererezo wa Tare, bashima ko Ubuyobozi bwiza imvugo yabwo ari yo ngiro, bwabashyize ku isonga.

Babitangaje ubwo basurwaga na Minisitiri w’Ubutegetsi bw’Igihugu MINALOC, Jean Claude Musabyimana yasuraga Umudugudu w’Icyitegererezo wa Tare utuyemo imiryango 56.

Abawutuyemo bishimira ko batujwe neza bagakurwa ahashoboraga gushyira ubuzima bwabo mu kaga, bakaba bashimira ubuyobozi bibitaho.

Minisitiri Musabyimana yasabye abatuye muri uyu Mudugudu w’Icyitegererezo gufata neza inzu bubakiwe kandi bagahindura imyumvire bajyana abana babo ku ishuri.

Yagize ati: “Izi nzu muzifate neza, ni inzu mwubakiwe mukurwa ahatari heza, none mushishikarire kujyana abana ku ishuri, muhindure imyumvire mugambiriye kwiteza imbere.”

Yabizeje ko Leta izakomeza kwita ku batishoboye kurusha abandi binyuze muri gahunda zitandukanye nka VUP n’izindi.

Muri uyu Mudugudu w’Icyitegererezo wa Tare, Minisitiri Musabyimana ari kumwe n’Abayobozi batandukanye basuye Urugo Mbonezamikurire y’abana bato.

Yanasuye urugo mbonezamikurire rw’abana bato

Nyuma yasuye Umurenge wa Buruhukiro ukungahaye ku buhinzi aganira n’abaturage bawo ndetse n’abo mu mirenge bihana imbibe nk’uwa Musebeya na Mushubi, ubwo yari amaze gusura ibikorwa by’ubuhinzi, abashimira uburyo bagenda banoza ubuhinzi n’ubworozi bakiteza imbere.

Muri uyu Murenge bashimira Leta kubera ishwagara n’izindi nyongeramusaruro begerejwe, ubu bihagije mu biribwa by’umwihariko ibirayi, ibigori n’ingano. Banahinga icyayi ndetse bakorora bigezweho.

Minisitiri Musabyimana yagize ati: “Ndabashimira imbaraga mushyira mu bikorwa by’ubuhinzi n’ubworozi ariko ndanabasaba kwirinda amakimbirane mu miryango n’ibindi byose byabangamira iterambere ryanyu kandi mukajyana abana banyu mu Ishuri.”

Yashimiye abaturage b’uyu Murenge uburyo bakomeje kwiteza imbere babikesha gukora ubuhinzi n’ubworozi neza.

Ashishikariza abayobozi b’Inzego z’ibanze gushyira imbaraga mu gukemura ibibazo by’abaturage kugira ngo iterambere ryabo rirusheho kwihuta.

Minisitiri Musabyimana yasabye abaturage kwitegura no kuzitwara neza muri gahunda zitandukanye ziteganyijwe muri uyu mwaka zirimo kwibuka ku nshuro ya 30 abazize Jenoside yakorewe Abatutsi mu 1994, amatora n’izindi.

Ikindi yabasabye ni ugushyira imbaraga muri gahunda zo kurandura ubukene, kugira uruhare mu gusigasira umutekano wabo n’ibyabo; kwitabira kwibaruza muri Sisitemu y’imibereho y’ingo no kureba amakuru y’ingo zabo bifashishije ikoranabuhanga (*195#;),

Kujyana abana bose ku ishuri, kurandura ibibazo by’amakimbirane mu miryango.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA