Nyamasheke: Abagore basabwe gukoresha ikoranabuhanga mu ihererekanya ry’ amafaranga
Amakuru

Nyamasheke: Abagore basabwe gukoresha ikoranabuhanga mu ihererekanya ry’ amafaranga

NTAWITONDA JEAN CLAUDE

March 23, 2023

Guverineri w’Intara y’Uburengerazuba Habitegeko François, ari kumwe na Guverineri wungirije wa Banki Nkuru y’u Rwanda (BNR) Soraya Hakuziyaremye, bari mu Karere ka Nyamasheke aho bakoranye inama n’abagore bahagarariye abandi mu matsinda yo kubitsa no kugurizanya muri gahunda yo kubakangurira gukoresha ikoranabuhanga kuri telefoni mu ihererekanya ry’amafaranga.

Iyo gahunda yo gukangurira abagore gukoresha ikoranabuhanga mu kubitsa, kwizigama, kugurizanya no kwishyurana izibanda mu Turere twa Nyamasheke na Nyaruguru turi ku kigero cyo hasi nk’uko ubushakashatsi bwakozwe mu 2020 bwabigaragaje.

Guverineri wungirije wa BNR Hakuziyaremye, yasobanuye ko abagore bakoresha ikoranabuhanga mu bijyanye n’amafaranga bakiri bake, abashishikariza kubyitabira.

Ati: “Abagore bakoresha telefoni mu Rwanda bageze kuri 84% ariko muri bo abakoresha ikoranabuhanga rya Mobile Money ni 55%, ibi bigaragaza ko gukoresha iri koranabuhanga mu bagore bikiri hasi akaba ari yo mpamvu y’ubu bukangurambaga”.

Guverineri Habitegeko yasobanuriye abo bagore bari mu nama ko ari ukubitsa kimwe no kwizigama biba bifite umutekano iyo bikozwe mu buryo bw’ikoranabuhanga.

Ati: “Kubitsa no kugurizanya amafaranga hakoreshejwe uburyo bw’ikoranabuhanga, ayo mafaranga aba atekanye kurushaho aho kuyashyira mu dusanduku cyangwa kuyabitsa umuntu”.

Banki Nkuru y’u Rwanda ku bufatanye na Minisiteri y’Ubutegetsi bw’Igihugu, Minisiteri y’Uburinganire n’Iterambere ry’Umuryango na Sosiyete z’itumanaho MTN na Airtel, iteganya kuzagera ku bagore bagera ku 15.000 bo mu Turere twa Nyamasheke na Nyaruguru bitarenze Gashyantare 2024.

Ku ruhande rw’abagore bahagarariye amatsinda yo kubitsa, kwizigama no kugurizanya, bavuze ko uwo ari umukoro bagiye kwitaho bakegera bagenzi babo bakabashishikariza gukoresha ikoranabuhanga mu rwego rw’imari.

Niyizurugero Felix wo mu Karere ka Ngororero kuri twitter we yagize ati: “Ni ingenzi cyane gukomeza kwigisha abaturage bacu by’umwihariko abafite aho bahurira no gucunga amafaranga ya bagenzi babo, gukoresha ikoranabuhanga rya Mobile money kugira ngo ayo mafaranga yabo arusheho kubikwa ahantu hafite umutekano”.

Uhereye ibumoso ni Hakuziyaremye Soraya, Habitegeko Francois na Mukamasabo Appolonie
Abahagarariye amatsinda biyemeje ko bagiye gukangurira bagenzi babo kwitabira gukoresha ikoranabuhanga mu ihererekanya ry’amafaranga ( Foto Akarere ka Nyamasheke)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA