Nyamasheke: Abarobaga bitemewe batewe n’abitwaje intwaro gakondo
Imibereho

Nyamasheke: Abarobaga bitemewe batewe n’abitwaje intwaro gakondo

Imvaho Nshya

October 25, 2023

Ba rushimusi batatu  barobaga rwihishwa mu Kiyaga cya Kivu mu mazi yo mu Kagari ka Gitwa, Umurenge wa Gihombo mu Karere ka Nyamasheke batewe n’abagizi ba nabi bitwaje intwaro gakondo, bituma umwe mu barobaga arohama none kugeza n’ubu umurambo we nturaboneka.

Bivugwa ko n’abagabyeho ibitero bari batatu na bo bitwaje imipanga, ingashya n’amabuye bikaba bikekwa ko bashakaga kubambura isambaza bari bamaze kuroba.

Abo barobaga babikanze bahita biroha mu mazi, ariko babiri baroga bavamo bariruka ariko umwe we aheramo.

Umunyamabanga Nshingwabikorwa w’Akagari ka Gitwa Ntibazirikana Déo, yabwiye Imvaho Nshya ko ahagana saa mbiri z’ijoro zo ku wa 23 Ukwakira, ari bwo Nziyumvira Eliphas w’imyaka 37, Ndikumana Théophile wa 18 na Ndayishimiye Patrick wa 23, bagiye mu kiyaga cya Kivu kuroba mu buryo butemewe kuko muri aya mezi 2 uburobyi muri iki kiyaga bwahagaritswe kugira ngo utwana tw’isambaza dukure.

Muri iryo joro bari mu bwato buto bakoreshaga bafite imitego y’amafi itatu itemewe yo mu bwoko bwa Kaningini.

Bagiye kurangiza ngo bajyane isambaza imusozi, ni bwo bagiye kubona amabandi atatu yitwaje intwaro yabagezemo aje kubatwara iyo mitego n’isambaza barobye.

Abo babiri barokotse ni bo bahamagaye Umukuru w’Umudugudu na we amenyesha irondo riza gufata ayo mabandi kuri ubu akaba afungiwe kuri Sitasiyo ya RIB ya Gihombo.

Ntibazirikana yagize ati: “Ubusanzwe iyo ba rushimusi bari mu Kivu, hari igihe amabandi nk’ayo aba yabacunze, akabambura imitego n’isambaza  barobye, hakaba ubwo barwana bagakomeretsanya bakanicana, ariko abahuye n’ibyo bibazo iyo  ntawakomeretse cyangwa ngo ahasige ubuzima barabiceceka. Ubu rero kubera ko umwe bamubuze, kubiceceka byarabananiye bo ubwabo bitangira amakuru.”

Babiri barokotse na bo bafashwe bajyanwa kuri RIB mu gihe iperereza rikomeje, na ho uwabuze we akaba akomeje gushakishwa.

Abarobyi bavuga ko ikibazo cya ba rushimusi bangiza utwana tw’amafi n’ibiyakomokaho mu Kivu muri aka Karere gikomeye cyane, by’umwihariko muri ibi bihe uburobyi buhagaze, nyamara abantu bakabona isambaza zikomeza gucuruzwa ku bwinshi nta nkomyi.

 Ibi bibaye nyuma y’ijoro rimwe gusa mu Murenge wa Kagano muri aka Karere hafatiwe abandi ba rushimusi 12 n’imitego 31 bakoreshaga, Umuyobozi w’Ihuriro ry’Amakoperative y’abarobyi Ndagijimana Elias, akavuga ko hamaze gufatwa umubare munini wa ba rushimusi muri iyi minsi n’imitego yabo.

Ikibazo cy’urugomo kihakomoka na cyo ntikibura kuko uko bamwe baroba abandi baba babacunze ngo babambure imitego n’isambaza barobye, hakaba ubwo bivamo imirwano ikomeye igeza no ku bwicanyi, cyangwa kurohama kwa bamwe muri bo nk’uko byagendekeye aba.

Kuba kandi harimo za moteri z’Ihuriro ry’abarobyi zirinda umutekano wo mu mazi, Ndagijimana avuga ko hatabura ababacunga bakaroba rwihishwa.

Umuyobozi w’agateganyo w’Akarere ka Nyamasheke Muhayeyezu Joséph Désiré, yabwiye Imvaho Nshya ko iki ari ikibazo gikomeye cyane, ariko bakomeje guhangana na cyo.

Ati: “Turakomeza kurwanya iyi ngeso twivuye inyuma kuko igaragara, binaturutse ku mateka y’uburobyi aho mbere barobaga uko bishakiye nta mategeko abagenga bakoreraho. Aho Leta ibihereye umurongo hakomeza kugaragara abinangira bakaroba mu buryo butemewe, biteza  uwo mutekano muke. Turakora ibishoboka byose bicike, bayoboke uburobyi bwemewe.”

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA