Nyamasheke:  Abarokotse Jenoside yakorewe Abatutsi 89 bemerewe amatungo magufi
Imibereho

Nyamasheke:  Abarokotse Jenoside yakorewe Abatutsi 89 bemerewe amatungo magufi

BAHUWIYONGERA SYLVESTRE

April 18, 2024

Abavuka mu Murenge wa Nyabitekeri, Akarere ka Nyamasheke bakajya gutura ahandi, baremeye abarokotse Jenoside yakorewe Abatutsi 84 batishoboye amatungo magufi n’Ubuyobozi Umurenge bwemerera ayo matungo abandi batanu bose hamwe bagera kuri 89.

Ni igikorwa cyakozwe mu rwego rwo gukomeza kuba hafi abarokotse Jenoside yakorewe Abatutsi muri iki gihe cy’iminsi 100 yo kwibuka ku nshuro ya 30 abazize iyo Jenoside.

Ukwigize Juvénal uhagarariye itsinda ryakoze iki gikorwa, yabwiye Imvaho Nshya ko icyo gikorwa biyemeje gukora gifite agaciro ka miliyoni eshatu z’amafaranga y’u Rwanda.

Yavuze kandi ko icyo gikorwa bagikoze mu rwego rwo kurushaho gushimangira ubumwe n’ubudaheranwa bwabo, akishimira ko abavuka muri uyu Murenge, abarokotse Jenoside yakorewe Abatutsi n’abatarahigwaga, bafatanyiriza hamwe gukusanya inkunga, bagafasha cyane cyane abarokotse b’icyahoze ari Segiteri Mukoma, ubu ni mu Kagari ka Mariba, Umurenge wa Nyabitekeri.

Ati: “Twababajwe cyane n’ababyeyi n’abavandimwe bacu basizwe iheruheru na Jenoside yakorewe Abatutsi natwe abenshi muri twe yadukozeho mu buryo bukomeye cyane, ariko tukagira amahirwe yo kujya guhaha hirya no hino tukagira icyo turonka.

Dusanga ari ngombwa gusubiza amaso inyuma mu bihe nk’ibi bikomye byo kwibuka abacu bazize Jenoside yakorewe Abatutsi, twajya kubibuka ntitugende imbokoboko, ahubwo abatishoboye bayirokotse tukagira icyo tubashyira.”

Yavuze ko bahisemo kubaha amatungo magufi kuko mu myaka yashize babahaga imyambaro n’ibiribwa bakabona bihita bishira ababihawe ntibagire urwibutso basigarana, muri iyi myaka 2 ikurikirana basanga amatungo magufi yarushaho gutanga umusaruro, cyane cyane ko abenshi bakuze, badashoboye inka, ariko bakeneye icyo gukuraho ifaranga gihoraho.

Avuga ko ubushize bari batanze  amatungo magufi 40 y’agaciro k’amafaranga 1.600.000, kandi ko abenshi agenda abungukira, cyane cyane ko hari ayatangiye kubyara, akavuga ariko ko igihango bafitanye kidashingiye gusa ku matungo baboroza.

Ati: “Igihango dufitanye na bo si ariya matungo tuboroza gusa. Ni no kubereka ko turi kumwe tubakunda, tubakomeza, ngo bakomeze bihangane, bahangane n’ubuzima busharira barimo, cyane cyane ko abenshi bari bafite abagombaga kuba babitaho ubu barababura, akaba ari inshingano zacu kubazirikana no kubahumuriza.”

Avuga ko bashaka gutera intambwe,mu myaka iri imbere bakazagira n’abo baremera inka n’abo bubakira, agashimira abitanze bose ngo aba batishoboye babone aya matungo, uburyo gahunda yo kwibuka no kuremera bayigize iyabo.

Bigirimana Samuel, umwe mu bahawe aya  matungo, yabwiye Imvaho Nshya ko byabashimishije cyane kubona abana babo bagiye guhahira hirya no hino mu gihugu no hanze yacyo babibuka bakaza kubafata mu mugongo, ko aya matungo bazayabyaza umusaruro mwinshi kuko bari bayakeneye cyane.

Ati: “Mu by’ukuri twanezerewe cyane kubona abana bacu badukorera igikorwa nk’iki cy’ingirakamaro mu bihe nk’ibi twibuka abacu bazize Jenoside yakorewe Abatutsi. Si ubwa mbere bagikora. Baduhaye amatungo meza y’icyororo. Twiteguye kuyafata neza,akazatanga umusaruro ushimishije, mu myaka iri imbere tukazaba natwe tworoza abandi.”

Uhagarariye Ibuka mu Murenge wa Nyabitekeri Rudahunga François, avuga ko  ari igikorwa bakiriye neza cyane nka Ibuka, ko kuba n’Umurenge wongeyeho andi matungo atanu byarushijeho kubashimisha cyane nk’abahagarariye abarokotse.

Ati: “Ni igikorwa twakiriye neza cyane nka Ibuka. Gufata mu mugongo uwarokotse Jenoside ni umuco mwiza cyane tubashimira kuko si ubwa mbere babikoze kandi umusaruro bitanga uba ushimishije cyane. Iyo babona ababitaho kuriya, bituma bumva atari bonyine, bafite abari mu cyimbo cy’ababo babuze. Natwe dukurikirana ko amatungo nk’ariya bayafata neza, ngo abagirire koko akamaro abayabahaye baba babifuzaho.”

Umuyobozi w’Akarere ka Nyamasheke wungirije ushinzwe imibereho myiza y’abaturage, Mukankusi Athanasie, na we yagaragaje ko yishimiye iki gikorwa asaba n’abandi bavuka mu yindi Mirenge baba ahandi kugera ikirenge mu cy’aba ba Nyabitekeri, bagafata mu mugongo abarokotse baho batishoboye.

Ati: “Uretse na bo ubwabo amatungo hafi 90 yinjiye mu Kagari kamwe ni inyungu ikomeye cyane ku Karere kose. Ifumbire azatanga, ibizera muri uwo murima wafumbiwe neza si bariya bonyine bizabatunga, bizatunga n’abandi. Bakomereze aho, nibiba ngombwa n’uriya mubare bawurenze  bitewe n’ubushobozi bwabo, kuko ni igikorwa cy’ubumuntu cyagombye gukorwa na buri wese.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA