Nyamasheke: Abasore 2 bavukana baguye mu bwiherero barapfa
Amakuru

Nyamasheke: Abasore 2 bavukana baguye mu bwiherero barapfa

BAHUWIYONGERA SYLVESTRE

March 22, 2024

Ntakirutimana Modeste w’imyaka 23 na murumuna we Havugimana Venutse w’imyaka 20 babaga iwabo mu Mudugudu wa Amizero, Akagari ka Rushyarara, Umurenge wa Karambi, Akarere ka Nyamasheke, baguye mu bwiherero bombi barapfa ubwo umuto yajyaga kugerageza gukuramo mukuru we wari wabuguyemo mbere.

Umunyamabanga Nshingwabikorwa w’Akagari ka Rushyarara, Nsengumuremyi Jean Pierre yatangarije Imvaho Nshya ko ibi byago byabaye mu masaha y’umugoroba yo ku wa 4 tariki ya 21 Werurwe,  ubwo uriya musore mukuru yajyaga mu bwiherero ikofi yari afite mu mufuka w’ipantalo ikagwamo, akuraho ibiti ngo ayikuremo, amanukira ku twobo ababucukuye bamanukiragamo babucukura, kuko twari twarasibamye, twaranoroshye cyane atunyereraho agwamo.

Gitifu ati: “Ntawamenye amasaha nyirizina yagwiriyemo, ikizwi ni uko yari yiriwe mu rugo akora akazi gasanzwe ari wenyine, ku mugoroba yitegura kujya aho akora ku ruganda rw’icyayi rwa Gatare, ruri muri aka kagari.

 Se yari yagiye mu kazi k’amanywa kuri uru ruganda, nyina amaze igihe arwariye mu bitaro bya Kibogora, murumuna we yari yagiye mu kazi ke, utwana duto twagiye kwiga.”

Gitifu avuga ko yaguyemo abura umutabara hafi aho, akomeza guhiritiramo, murumuna we avuye mu kazi ke yari yiriwemo, ageze mu rugo yumva ikintu gihiritira mu bwiherero, agiye kureba yumva ni mukuru we uhiritiramo, atarashiramo umwuka, amanuka ajya kumukuramo na we agwamo.

Uyu muyobozi akomeza avuga ko akigwamo mukuru we umwuka wari ushize yanagezemo hasi, uyu muto na we atangira guhirita cyane, gaze iba mu bwiherero yamuzabiranyije, atavuga, umugore wahanyuze na we yumva ikintu gihiritira mu bwiherero, agiye kureba asanga ni uwo musore, mu maso hagaragara ataratebera neza mu bwiherero.

Ati: “Umugore yahise atabaza  ubwo hari habaye mu ma saa kumi na 45, turahagera n’abaturage benshi n’inzego z’umutekano, twumva akigonga umwuka utaramushiramo, bagerageza gushyiramo urwego rwo aruzamukireho ruba ruto,bashyizemo igiti imbaraga ze zo kugifata ngo azamuke zirabura.

 Baziritse umuntu n’umugozi ukomeye ngo amanukiremo amufate babazamurane bombi n’umugozi agezemo na we gaze iramushika avuza induru baramuzamura, undi agenda atebera bamubura, umwuka urinda ushira.”

Avuga ko hafashwe icyemezo cyo gusenya no gucukura ubwo bwiherero bwareshyaga na metero hagati ya 12 na 15, icyo gikorwa kirangira mu ma saa mbiri z’ijoro imirambo ibonetse, ikofi yo ikomeza kubura.

Imirambo yombi yajyanywe ku kigo nderabuzima cya Cyivugiza muri iryo joro, muri iki gitondo ni bwo hari hateganyijwe kuganirwa niba bayijyana mu bitaro bya Kibogora cyangwa niba hafatwa umwanzuro wo kuyishyingura.

Umusore mukuru apfuye yiteguraga gushyingirwa mu minsi ya vuba, kuko yari amaze kuzuza inzu  yaranasabye, mu mpera z’uku kwezi cyangwa mu gutaha yitegura gusezerana imbere y’ubuyobozi na murumuna we akaba umusore wirwanagaho ashakisha ubuzima.

Uru rupfu rukaba rwateye akababaro gakomeye cyane mu baturanyi babo bari babazi nk’uko na byo bivugwa n’uyu muyobozi.

TANGA IGITECYEREZO

  • Toyota
    March 22, 2024 at 3:40 pm Musubize

    Nihanganisije umuryango wababuze ababo ariko reta ndetse namatorero nabavandimwe barebeko bafasha abasigaye urugero reba mamawabo arimubitaro rone ahuye nikindikibazo cyo gupfusha abasore babiri yewe ufite ibibazo ntabura ibindi gose umuryango wasi gaye ukwiye ubufasNihanganisije umuryango wababuze ababo ariko reta ndetse namatorero nabavandimwe barebeko bafasha abasigaye urugero reba mamawabo arimubitaro rone ahuye nikindikibazo cyo gupfusha abasore babiri yewe ufite ibibazo ntabura ibindi gose umuryango wasi gaye ukwiye ubufasha.

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA