Nyamasheke: Gihombo: Urubyiruko rwashiriye mu mijyi kuko ho nta mirimo ruhabona
Amakuru

Nyamasheke: Gihombo: Urubyiruko rwashiriye mu mijyi kuko ho nta mirimo ruhabona

BAHUWIYONGERA SYLVESTRE

March 19, 2024

Abaturage b’Umurenge wa Gihombo, Akarere ka Nyamasheke, bavuga ko bafite impungenge z’urubyiruko rukomeza kubacika rwigira mu mijyi, umurenge ugasigaramo abasaza n’abakecuru gusa batagifite imbaraga, bakavuga ko rubabwira ko biterwa n’uko ntacyo rwahaba rukora, kuko rutahabonaimirimo yinjiza amafaranga.

Ni Umurenge unagaragaramo ubutaka bwinshi budahingwa, abawutuye bakavuga ko nta kindi gikorwa cy’iterambere gihari cyakurura urubyiruko.

Ngo uretse umuhanda wa kaburimbo Kivu belt gusa, nta soko, nta santere y’ubucuruzi ikomeye, nta gakiriro, nta mishinga yinjiza amafaranga mu baturage ihari na VUP iha akazi bake cyane ugereranyije n’abagakeneye.

Bimenyimana Jean w’imyaka 71 avuga ko umusore cyangwa inkumi barangije kwiga ayisumbuye na kaminuza, umaze gukura ufite ingufu zagombye kuzamura Umurenge, abo wawusangamo ari mbarwa.

Ati: “Rwose ubuyobozi bukwiye kutwigira iki kibazo kitoroshye. Ushobora kugenda ibilometero nka 3 ubona abasaza n’abakecuru gusa, n’ibisambu bidahinze cyangwa hahinze agace gato. Abayobozi usanga baza kudukangurira gukoresha ubutaka bwose bukabyazwa umusaruro,bakirengagiza ko  nka njye w’iyi myaka nta mbaraga nkigira, abakabuhinze baraducitse bakigendera.”

Hari n’abavuga ko byumvikana kuko no kubaguma iruhande, cyane cyane ab’abakobwa, ntacyo bakuraho n’utuvuta two kwisiga, nta santere z’ubucuruzi zihagaragara zihari bikururira bamwe mu biyobyabwenge n’inda zitateganyijwe, bikaba ibibazo kuruta ibisubizo.

Bimenyimana Jean avuga ko igihe cyose uyu Murenge uzaguma uko umeze ubu nta rubyiruko bazabona

Izabiriza Dinah avuga ko habonetse imikorere, imishinga iha akazi urubyiruko ikaze, urangije akabona icyo akora, batabaho batagira n’umusore ushobora kubasiriza urukwi cyangwa guheka umurwayi cyangwa umugore uri ku nda.

Ati: “Nk’ubu ubuyobozi buherutse kutubwira ko muri uyu Murenge wacu hagiye kubakwa Umudugudu w’icyitegererezo, hakazanakorwa imihanda bikazaha urubyiruko akazi aho buri wese azajya akorera amafaranga 2000 ku munsi.

Ababa iyo hose batagira akazi twabatumyeho baragaruka, bategereza iby’uwo Mudugudu baraheba, tuza kumva ngo wajyanywe i Rubavu, bisubirirayo n’impunngenge z’amatike bagujije. Nk’abo se twabagarura?’’

Umukobwa w’imyaka 20 uvuga ko agihari kubera amashuri, na we yabwiye Imvaho Nshya ko atinze kuyarangiza ngo yigendere, kuko ubuzima buri mu Murenge wa Gihombo bugoye urubyiruko cyane, ari umurenge ukennye cyane, ukeneye kwitabwaho byihariye.

Uyu mukobwa w’imyaka 20 avuga ko na we narangiza kwiga azigendera kuko ntacyo yaguma aho ahakora

Ati: “Ahandi twumva ngo nibura hari icyayi umuntu yajya gusoroma, aha ntikihaba. Twumva ngo urangije imyuga abona aho akorera hamuha amafaranga, aha ntihahaba. Amashanyarazi ahenshi ni nk’ibishirira nta ngufu afite ngo nibura dushyushye imitwe turebe icyatuzamura. None se aho kwirirwa urebana mu maso n’ababyeyi, mupfa ubusa, ntiwajya kugwa iyo batakureba? Ni yo mpamvu twigendera. Nta mpinduka biragoye kuhaguma.’’

Umuyobozi w’Akarere ka Nyamasheke wungirije ushinzwe iterambere ry’ubukungu, Muhayeyezu Joseph Désiré yemera ko iki kibazo gihari no mu yindi Mirenge bakibona, ariko gishingiye ku mpamvu z’ingenzi zirimo ibikorwa by’amajyambere bidahagije, imyumvire.

 Ati’: “Turubwira ariko ko n’ibyo gukorera mu Karere bihari, uwajya mu buhinzi n’ubworozi yakora akabona amafaranga, ko bose batazabona ibiro bakoramo. Tukarusaba guhindura imyumvire, rukabyaza umusaruro amahirwe ahari kuko n’iyo mu mijyi rwirukankira hari igihe ruba ntacyo ruhakora.”

Avuga ko hashakishwa uburyo ibikorwa remezo, nk’amazi, amashanyarazi afite ingufu, imihanda myiza biboneka, amahirwe y’ibigega by’iterambere nka BDF byabaguriza bakayamenyeshwa, imishinga y’iterambere ikahagera, rugahindura cyane cyane imyumvire yo kumva ko ruzahabwa byose, ko n’icyuya cyarwo ari ngombwa ngo rugire icyo rugeraho.

Avuga ko mu bitekerezwa harimo gushishikariza abikorera gushora imari mu mishinga myinshi y’iterambere mu Karere no gushyira ingufu mu mahirwe ahari aruha akazi.

TANGA IGITECYEREZO

  • Toyota
    March 20, 2024 at 8:35 am Musubize

    Arikonge abobasaza baransetsa nonese bumvako abanababo bazakomeza kubaba iruhande ? Mwaba sasazamwe ibintunkibyo mugemubivamo kuko icyo urubyiruko rukeneye ni iterambere (develpoment)

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA