Umurambo w’umusore w’imyaka 31 witwaga Nkinzingabo Jean Baptiste wabaga mu Mudugudu wa Gikangaga, Akagari ka Gasovu, Umurenge wa Karambi, Akarere ka Nyamasheke, wasanzwe munsi y’ikiraro kiri ku mugezi wa Ryamunyu hakekwa ko yaba yanyereyeho yasinze nijoro akitura muri uwo mugezi akabura gitabara agapfa.

Muhayimana Donatille wamugezeho bwa mbere, yabwiye Imvaho Nshya ko hari mu ma saa moya n’igice z’igitondo agiye gusoroma ikawa, ageze kuri icyo kiraro, abana 2 bahahuriye bavuga basakuza ko babonye inkweto nshyashya zifunze z’umweru mu mugezi.

Na we arareba, yitegereje iruhande rw’imigano iteye kuri uwo mugezi abona umuntu uryamyemo yapfuye, umutwe uri mu mazi, amaboko ari ku nkengero z’umugezi, telefoni nziza nini iri iruhande rw’intoki, n’agacupa ka ‘Energy’ gapfundikiye karimo ikinyobwa atamenye niba ari iyo Energy cyangwa ikindi.

Anavuga ko inzego zibishinzwe zihageze, zimaze kumwubura yasanganywe akandi gatelefoni akambaye nk’ishapure mu ijosi. Amaguru yari ku kindi gice cy’inkengero z’akagezi, inkweto yari yambaye, rumwe rureremba mu mazi urundi ruri ku nkengero, ingofero yari ateze yaguye mu gice cy’umugongo.

Ati: “Ako kagezi kari ku rugabano rw’Umudugudu wa Bibungo, Akagari ka Kagarama, n’Umudugudu wa Mburabuturo, Akagari ka Gasovu. Nkibona uwo murambo sinagiye hasi ngo ndebe ko namenya nyirawo kuko ari kure, jye n’abaturage bahise bahagera twahagumye, mpamagara Umukuru w’Umudugudu n’abandi bayobozi baraza barareba.”

Yongeyeho ati: “Yari aryamye yubamye. Nta bikomere twabonaga. Icyo kiraro gikoze ku buryo mu mpande zacyo uhakandagiye nijoro utarebye neza, wasinze cyangwa warangaye wanyerera ukagwamo mu mugezi, tugakeka ko ari byo byamubayeho yasinze n’iyo nzoga akiyifite iri muri ako gacupa. Iperereza ry’ababishinzwe ni ryo rizatubwira ukuri kuko RIB yahise ihagera ikora akazi kayo, umurambo ujyanwa ku bitaro bya Kibogora.”

Avuga ko umuryango we uhageze, mukuru we yavuze ko batandukanye nka saa moya z’ijoro, kuko yari yamusuye iwe mu Kagari ka Gitwe, ntiyavuga niba yari yasinze cyangwa atasinze, avuga ko bakomezaga kuvugana kuri telefoni, mukuru we  agera ubwo amuvugisha yumva ntavuze ayoberwa ibyo ari byo. Mu gitondo akumva ko umurambo we bawusanze muri ako kagezi.

Umukozi w’Umurenge wa Karambi, ushinzwe imari n’ubutegetsi, Niyonizeye Claudine, avuga ko koko umurambo w’uyu musore bawubonye muri uwo mugezi, mukuru we akababwira ko yari yamusuye, agataha, bakagenda bavugana bikaza kugera igihe ntibikunde, mugitondo na we agahuruzwa nk’abandi bose ko murumuna we bamusanze mu mugezi yapfuye.

Ati: “Nubwo icyo kiraro giteye ku buryo unyuze ku mpande zacyo wagwamo, mukuru we akaba yatubwiye ko nyakwigendera yanywaga inzoga, ntatubwire niba batandukanye yasinze, akatubwira gusa ko batandukanye mu ma saa moya n’igice z’ijoro, tukaba tutazi igihe yagwiriyemo, ntitwakwemeza cyangwa ngo dukekeranye icyamwishe.”

Yasabye abaturage kureka kubivugaho byinshi bagategereza ikizava mu iperereza n’isuzuma rya muganga. Yaburiye abaturage banyura ku biraro babona bishobora kubateza ibibazo kubera kuba bidakoze neza, ko bajya bahanyura mu masaha ya kare bitegereza aho baca, kugira ngo n’uwahagirira ikibazo abe yatabarwa.

Ba uwa mbere mu kumenya amakuru agezweho!!!