Nyamasheke: Umwana w’imyaka 5 yasanzwe mu mugezi yapfuye

Nyamasheke: Umwana w’imyaka 5 yasanzwe mu mugezi yapfuye

Imvaho Nshya

October 18, 2023

Umurambo w’umwana w’imyaka 5, witwaga Niyogushimwa Grâce wasanzwe mu mabuye y’uruzi rwa Kigoya mu Karere ka Nyamasheka yapfuye, bikekwa ko yaba yararohamye muri kamwe mu tugezi turi mu migende ishyira uwo mugezi munini, agerageza kukambuka nijoro asanga nyina.

Amakuru Imvaho Nshya ikesha Umunyamabanga Nshingwabikorwa w’Akagari ka Kigoya Hategekimana Jean Thierry, avuga ko uyu mwana yabanaga na sekuru na nyirakuru mu Mudugudu wa Ruganzu muri ako Kagari, kuko nyina yahamubyariye akamubasigira akajya gushaka umugabo hafi aho n’ubundi muri uwo Mudugudu, bakananiranwa, ngo akaba yibanaga n’abana 2 babyaranye.

Akomeza avuga ko ku wa Mbere tariki 16 Ukwakira 2023 imvura yiriwe igwa mu Mudugudu wa Museke, Akagari ka Kigoya, Umurenge wa Kanjongo mu Karere ka Nyamasheke,ariko sekuru na nyirakuru b’umwana bazindukiye mu mirimo, umwana yiriranwa na nyirarume.

Bigeze mu ma saa kumi n’ebyiri z’umugoroba, nyirarume amusiga mu rugo wenyine ajya kwahira ubwatsi bw’inyana, bityo umwana ashobora kuba yaragize irungu ryo gusigara wenyine, akumva ashaka gusanga nyina aho yakoreshaga iminota itarenga 15, akaba yaratembanywe n’utugezi twisuka muri uwo mugezi wa Kigoya.

Ati: “Nyirarume yaratashye abura umwana aricecekera, na sekuru na nyirakuru batashye ntibamubona, babaza uwo nyirarume ababwira ko yamusize yagaruka akamubura agakeka ko yasanze nyina, babajije mu baturanyi bababwira ko atahageze”.

 Yongeyeho ati: “Na bo ngo bibwiye ko yasanze nyina, bararyama. Mugitondo nyina ahazindukira aje kumureba mbere yo kujya mu mirimo, bamubwira ko bibwiraga ko ari we wamuraranye kuko bo batamuraranye.

Bagisigana bumva abaturage bari banyuze kuri uwo mugezi bajya mu mirimo baje bababwira ko babonye umurambo w’uwo mwana mu mabuye yo muri uwo mugezi”.

Bamwe mu bahaturiye kandi batangarije Imvaho Nshya ko iyo imvura ibaye nyinshi tukuzura twanatwara abatunyuzeho, cyane cyane abasinzi, 4 batuguyemo bagapfa umwaka mu myaka yashize.

Bongeyeho ko bishoboka kuba umwana yarahageze bunamaze kwira, yajya gusimbuka kamwe muri utwo tugende twari twuzuye, akakagwamo amazi akamutwara, akamuroha muri uwo mugezi munini wa Kigoya.

Gitifu Hategekimana avuga ko na bo nk’ubuyobozi bahurujwe bajya kureba bagasanga umwana yahagamye muri ayo mabuye hafi y’inkengero z’umugezi, yakomeretse mu mutwe, bikekwa ko ari amabuye yawo yari yamukomerekeje, anambaye agashati konyine, agakabutura katakimurimo, aryamiye urubavu rw’ibumoso.

Avuga ko uru rupfu asanga rwaraturutse ku burangare bw’uwari wamusigaranye,kuko kumusiga wenyine byaba byarabaye intandaro yo kwigendera no kugwa muri uwo mugezi, ko n’abamurera ubwo burangare babwemeye, bavuga ko babaha umurambo w’umwana wabo bakawushyingura, ko ntawe bashyiraho urubanza ngo yaba yamwishe.

Ku baturage bavugaga ko se w’umwana na we utuye aho hafi, yaba yaravuze ko umwana we yishwe kuko, igikomere yamubonanaga mu mutwe cyari kimeze nk’ikintu yakubiswe, agakeka ko ari ababa bamwishe muri ayo masaha bakamuta muri uwo mugezi cyangwa mu kagezi asanzwe anyuraho, mu gihe uwishwe n’amazi asanganwa ibikomere byinshi, Gitifu yabihakanye.

Yagize ati: “Sinemera ko byaba ari byo nubwo iperereza rya RIB n’isuzuma rya muganga ari byo byaduha ukuri kudashidikanywaho, ariko mu ishyingurwa ry’umwana ejo nimugoroba, ababyeyi be bombi bari bahari, nta magambo nk’ayo twumvise kandi natwe, nk’inzego z’ubuyobozi n’iz’umutekano twari duhari. Bavugaga ko na bo bemera ku umwana wabo yishwe n’amazi yatewe n’iyo mvura nyinshi, bakanemera ubwo burangare, iyo bagira izo ngingimira baba barabitubwiye.’’

Yasabye ababyeyi kwitwararika cyane muri ibi bihe by’imvura nyinshi, bakirinda gusiga abana bonyine ngo bagiye mu mirimo, kuko nk’uyu mwana w’imyaka 5 ubundi yagombye kuba ari kumwe n’abandi bana mu irerero, yaba ataribamo, na cyo kikaba ikibazo.

Yibukije ababyeyi ko bagomba kumenya abo babasigiye, batabagira bakabajyana aho kubasiga bonyine, kuko umwana nk’uwo ashobora no gutorongera bakamubura cyangwa agahitanwa n’abagizi ba nabi, cyangwa ikindi kibazo yanahurira na cyo mu rugo.

Bibaye mu gihe abaturage b’uwo Murenge bataribagirwa indi nkuru yababereye inshamugongo, aho umwana wo mu Kagari ka Kibogora n’ubundi muri uyu Murenge yasigwaga wenyine mu rugo n’ababyeyi be akaribwa n’ingurube ikamurangiza.

Umurambo wa Nyakwigendera wakuwe mu bitaro bya Kibogora kuri uyu wa Kabiri, tariki ya 17 Ukwikira uhita ushyingurwa.

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA