Paris: Bucyibaruta “watsembye Abatutsi” i Gikongoro yatangiye kuburanishwa
Amakuru

Paris: Bucyibaruta “watsembye Abatutsi” i Gikongoro yatangiye kuburanishwa

NTAWITONDA JEAN CLAUDE

May 9, 2022

Kuri uyu wa Mbere taliki ya 09 Gicurasi 2022, Bucyibaruta Laurent w’imyaka78 yabaye Umuyobozi ukomeye wa mbere ugejejwe imbere y’ubutabera bw’u Bufaransa akurikiranyweho ibyaha bya Jenoside yakorewe Abatutsi, bikaba bitanga icyizere cy’uko n’abandi bagicumbikiwe muri icyo gihugu batazatinda kuryozwa ibyo bakoze mu Rwanda mu myaka 28 ishize.

Uyu munsi ni bwo Bucyibaruta yitabye Urukiko rw’i Paris, bikaba byitezwe ko urubanza rwe ruzamara amezi abiri aho ruzitabirwa n’abatangabuhamya basaga 100 barimo abarokotse Jenoside yakorewe Abatutsi bazategerwa indege bakajya mu Bufaransa cyangwa bagatangira ubuhamya bwabo ku ikoranabuhanga ry’amashusho (videoconference).

Urubanza rwa Bucyibaruta rubaye urwa kane ruburanishijwe n’inkiko zo mu Bufaransa rurebana n’Abanyarwanda bakekwaho Jenoside yakorewe Abatutsi bari barahungiye ku butaka bw’icyo Gihugu. Abandi ni Muhayimana Claude wari umushoferi wa Guest House wakatiwe imyaka 15, Ladislas Ntaganzwa wari Burugumesitiri wa Komini Nyakizu wakatiwe burundu na Pascal Simbikangwa wari umusirikare wakatiwe imyaka 25 y’igifungo.

Ubushinjacyaha bwagaragaje ko Bucyibaruta akurikiranyweho icyaha cya Jenoside, ubufatanyacyaha muri Jenoside n’ibyaha byibasiye inyoko muntu, bishobora kuzamuhesha igihano cy’igifungo cya burundu nibiramuka bimuhamye.

Bivugwa ko Bucyibaruta yari umwe mu bayoboye inama zitandukanye zateguriwemo imigambi yo gutsemba Abatutsi barimo n’abasaga 40,000 biciwe i Kibeho. Hari n’ibikorwa bitandukanye abatangabuhamya bavuga ko we yigiriyemo uruhare ari na we ubiyoboye.

Mu mezi abiri ari imbere, biteganyijwe ko Bucyibaruta azaba ahanganye n’ikirego agomba kwisobanura ku rupfu rw’abasaga 100,000 bazize Jenoside yakorewe Abatutsi.

By’umwihariko, Bucyibaruta yitezweho kuzatanga ibisobanuro ku buryo yakoresheje uburyarya akemeza Abatutsi ko abaha ubuhungiro mu Ishuri ry’Imyuga rya Murambi, abizeza ko nibahagera bazaba barinzwe babona ibyo kunywa n’ibyo kurya bifuza, kugeza ubwo n’abari bihishe bose bagiyeyo bikarangira biciwe hamwe.

Ku wa 12 Mata 1994 mu masaha y’igitondo ni bwo Abatutsi yari yabeshye ko bazarindwa yohereje abasirikare n’abajandarume bo kubica ntihagira n’uwo kubara inkuru urokoka.

Urukiko nanone ruzasuzuma uruhare rwa Bucyibaruta mu bwicanyi bwakorewe abanyeshuri b’Abatutsi bigaga ku Ishuri rya Marie Merci i Kibeho, bwakozwe taliki ya 7 Gicurasi 1994. Azanabazwa kandi ubwicanyi bwakorewe imfungwa z’Abatutsi zarimo n’abapadiri batatu biciwe muri Gereza ya Gikongoro.

Abunganira Bubyibaruta mu by’amategeko bavuga ko icyifuzo cyabo ari uko uru rubanza rwateshwa agaciro kuko rwadindijwe mu myaka 22 ishize yose ku mpamvu zitumvikana. Icyo kirego ngo ni kidakunda biteguye kuburana basaba ko yarekurwa.

Bucyibaruta yatuye mu Bufaransa guhera mu mwaka wa 1997, akaba yari amaze igihe kinini akurikiranwa n’ubutabera ari hanze, kuri ubu akaba afite ikibazo cy’ubuzima kizajya gituma urubanza rudashobora kuba rwarenza amasaha 7 ku munsi.

Ni nyuma y’aho ku ya 31 Gicurasi 2000 yahamagajwe n’inzego z’ubugenzacyaha ahita anafungwa by’agateganyo mu gihe cy’amezi atandatu ari na yo yasoje akarekurwa ijisho rimuriho. Nyuma y’imyaka 22 ishize, kuri ubu yagarutse mu rukiko aho agomba kuryozwa ibyaha ashinjwa kugira ngo ubutabera burusheho guhabwa abazize Jenoside n’abayirokokeye i Gikongoro.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA