Perezida Kagame mu ruzinduko rw’iminsi 2 muri Zambia
Amakuru

Perezida Kagame mu ruzinduko rw’iminsi 2 muri Zambia

NTAWITONDA JEAN CLAUDE

April 4, 2022

Perezida wa Repubulika y’u Rwanda Paul Kagame, guhera kuri uyu wa Mbere yageze i Livingstone muri Zambia mu ruzinduko rw’iminsi ibiri rugamije kurushaho gushimangira umubano w’ibihugu byombi, cyane ko haza kubaho n’umwanya wo gusinya amasezerano arindwi y’ubutwererane mu nzego zitandukanye.

Inzego nkuru z’igihugu cya Zambia zimaze igihe mu myiteguro yo kwakira Perezida Kagame n’itsinda rimuherekeje muri uru ruzinduko, ndetse Perezida Hakainde Hichilema na Madamu Mutinta Hichilema baraye i Livingstone ari na ho umuhango wo kwakira Umukuru w’Igihugu cy’u Rwanda witezwe kubera.

Ibitangazamakuru byo muri Zambia bivuga ko indege itwaye Perezida Hichilema na Madamu we yaraye igeze ku Kibuga cy’Indege Mpuzamahanga cya Harry Mwaanga Nkumbula ahagana 13:10 mu masaha ya Zambia.

Nk’uko bigaragara muri gahunda yatangajwe n’Ibiro bya Minisitiri w’Intebe ikanashyikirizwa Ikigo cy’Igihugu gishinzwe serivisi z’itangazamakuru (ZANIS), Perezida Kagame yakiriwe kuri iki Kibuga cya Harry Mwaanga Nkumbula kuri uyu wa Mbere taliki ya 4 Mata 2022.

Abakuru b’Ibihugu byombi baraza kugirana ibiganiro byihariye mbere yo gukomeza basura Isumo rya Mosi-oa-Tunya.

Nyuma yaho byitezwe ko bakomereza uruzinduko ahitwa Sundowner aho biteganyijwe ko baza gusangirira ibya nimugoroba bari muri gari ya moshi.

Ku wa Kabiri taliki ya 5 Mata, Perezida Kagame, Perezida Hichilema na Madamu Mutinta, bazasura Pariki z’Igihugu nka Mukuni Big Five Safaris, Mosi-o- Tunya National Park maze bakomereze ku Mupaka no ku Kiraro cya Kazungula.

Mu masaha y’igicamunsi, Perezida Kagame ni bwo azagaruka mu Rwanda ahagurukiye ku kibuga cy’Indege mpuzamahanga cya Harry Mwaanga Nkumbula.

Minisitiri w’Ububanyi n’Amahanga n’Ubutwererane wa Zambia Stanley Kakubo, yemeje iby’uru ruzinduko rw’iminsi ibiri asobanura ko ibiganiro by’Abakuru b’Ibihugu byombi bizibanda ku ngingo zirebana n’inyungu ibihugu byombi bihuriyeho, izirebana n’Akarere ndetse n’izo ku rwego mpuzamahanga.

Ibyo biganiro byitezweho gukurikirwa n’isinywa ry’amasezerano arindwi y’ubufatanye hagati y’u Rwanda na Zambia mu nzego zitandukanye. Bitezwe kandi ko ayo masezerano azagira uruhare rukomeye mu kurushaho gushimangira umubano w’ibihugu byombi usanzwe uhagaze neza.

U Rwanda na Zambia bisangiye umubano ushingiye ahanini ku kuba ari ibihugu bisangiye indangagaciro n’ubwubahane, byiyongeraho inyungu z’ubukungu n’ishoramari ibihugu byombi bishobora kunganiranamo.

Minisitiri  Kakubo yagize ati: “Ibihugu byombi ntibyahwemye gukomeza kongerera imbaraga umubano wabyo binyuze mu kwishyurana mu ruzinduko rw’abayobozi bakuru ndetse no gushyiraho Komisiyo Ihoraho Ihuriweho (JPC) igamije gusuzuma no kongerera imbaraga ubutwererane mu nzego zirimo ububanyi n’amahanga, ubucuruzi n’inganda, ubukerarugendo, ubuhinzi, siporo, ubumenyi n’ikoranabuhanga, ikoranabuhanga n’itumanaho mu isakazamakuru, ubushakashatsi, uburinganire n’izindi nzego zitandukanye.”

Yongeyeho ko Zambia n’u Rwanda bikorana hagati yabyo, ku rwego rw’Akarere ndetse bikaba binashyigikirana ku rwego mpuzamahanga binyuze mu kuba byombi biri mu Muryango w’Abibumbye, bikaba bihuriye mu Muryango w’Ibihugu bikoresha Ururimi rw’Icyongereza (Commonwealth), Mu Muryango w’Afurika Yunze Ubumwe (AU), mu Muryango w’Ubucuruzi w’Ibihugu by’Iburasirazuba n’Amajyepfo y’Afurika (COMESA) ndetse no  mu Ihuriro ry’ Inama Mpuzamahanga ku Karere k’Ibiyaga Bigari (ICGLR).

Perezida wa Zambia Hichilema ashimangira ko gufatanya n’u Rwanda byongera amahirwe yo gukomeza kubyaza umusaruro amahirwe aboneka mu bucuruzi, ishoramari n’ubukerarugendo bikozwe hagati y’ibihugu by’Afurika binyuze mu Isoko Rusange ry’Afurika (AfCFTA), hagamijwe gushyigikira ubukungu bw’ibihugu n’inganda zo muri Afurika.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA