Perezida Kagame n’Umuyobozi wa UNICEF baganiriye ku hazaza h’abana
Amakuru

Perezida Kagame n’Umuyobozi wa UNICEF baganiriye ku hazaza h’abana

NTAWITONDA JEAN CLAUDE

April 3, 2022

Ku wa Gatandatu taliki ya 2 Mata 2022, Perezida wa Repubulika y’u Rwanda Paul Kagame, yakiriye Umuyobozi Nshingwabikorwa w’Ishami ry’Umuryango w’Abibumbye ryita ku bana (UNICEF) ku Isi Catherine M. Russel, uri mu ruzinduko rw’iminsi itatu rwatangiye ku wa Gatanu.

Perezida Kagame na Catherine Russell, bagiranye ibiganiro ku mishinga ya UNICEF iri gushyirwa mu bikorwa n’indi iteganyijwe gukorwa mu gihe kizaza yose igamije guharanira ubuzima n’imibereho myiza by’abana b’Abanyarwanda.

Nyuma yo guhura na Perezida Kagame, Catherine Russel yagize ati: “Byari iby’agaciro gakomeye guhura na Nyakubahwa Perezida Paul Kagame tukaganira ku ruhare rw’intangarugero rw’u Rwanda kuzamura abakiri bato binyuze muri gahunda ya Generation Unlimited. Niteguye gufatanya namwe mu kunoza imibereho y’abana, imirire, uburere n’uburezi. Ngushimiye ubuyobozi bwawe bufite icyerekezo!”

Muri urwo ruzinduko rwa mbere akoreye ku mugabane w’Afurika kuva yahabwa izo nshingano muri Gashyantare uyu mwaka, Madamu Catherine Russell, yanahuye anagirana ibiganiro n’abayobozi bo ku rwego rwo hejuru muri Guverinoma y’u Rwanda barimo na ba Minisitiri batandukanye.

Nanone kandi uyu muyobozi yasuye umushinga Twige Neza Dutsinde uterwa inkunga na UNICEF mu ishuri rya GS Mukarange riherereye mu Karere ka Kayonza mu Ntara y’Iburasirazuba, aho amashuri yashyiriweho gukemura ibibazo byihariye akomeje kugira uruhare rukomeye mu kugabanya ibibazo byo gusoma, kwandika n’imibare.

Yaherekejwe n’abayobozi batandukanye barimo Rose Rwabuhihi ukuriye Gender Monitoring Office (GMO), Umuyobozi Mukuru Wungirije w’Umuryango Imbuto Foundation Geraldine Umutesi, Umuyobozi ushinzwe uburezi muri Imbuto Foundaton Clement Kabiligi n’Umunyamabanga wa Leta muri Minisiteri y’Uburezi Ushinzwe Amashuri Abanza n’Ayisumbuye Gaspard Twagirayezu.

Umushinga Twige neza Dutsinde ugamije guharanira ko abana badatsinda neza mu cyiciro cya kabiri cy’amashuri abanza babona ubufasha bw’inyunganizi mu myigire yabo kugira ngo babashe gutera intambwe igana ku myigire itanga umusaruro.

Perezida Kagame yakiriye muri Village Urugwiro Madamu Catherine M. Ruse

Madamu Catherine Russel aranasura Urugo Mbonezamikurire ruherereye ku Isoko rya Rwamagana rifasha abacuruzi bo muri iryo soko mu gukurikirana imikurire n’uburere bw’abana babo.

Kuri iki Cyumweru, arasoza uruzinduko rwe yerekeza mu gihugu cy’abaturanyi cya Repubulika Iharanira Demokarasi ya Congo (RDC) mbere yo gusubira i New York muri Leta Zunze Ubumwe z’Amerika.

Catherine M. Russel yagiye ku buyobozi bwa UNICEF guhera taliki ya 1 Gashyantare 2022, akaba yari abaye umugore wa kane uyoboye uwo muryango mu myaka 75 ishize. Uyu mugore yitezweho kuzana impinduka zijyanye no guhanga udushya muri politiki igamije kubaka ubushobozi bw’abantu batereranywe mu bice bitandukanye ku Isi, harimo na gahunda zitanga umusaruro wo ku rwego rwo hejuru mu kurinda abagore n’abakobwa by’umwihariko ahabaye intambara n’ibindi biza karemano.

Mbere yo gukora izo nshingano, hagati y’umwaka wa 2020 n’uwa 2022, Russel yakoraga muri Guverinoma ya Leta Zunze Ubumwe nk’Umunyamabanga wa Perezida n’Umuyobozi ushinzwe abakozi mu Biro by’Umukuru w’Igihugu (White House)

Muri izo nshingano, yahurije hamwe ibibazo bibangamira abagore bikigaragara muri Politiki mpuzamahanga ya USA, ahagararira igihugu cye mu bihugu birenga 45 ndetse akorana na guverinoma z’amahanga, imiryango mpuzamahanga, na sosiyete sivile. Yabaye ku ruhembe rw’imbere mu kubaka Gahunda Mpuzamahanga ya mbere ya USA igamije kongerera ubushobozi abakobwa b’abangavu.”

Mbere y’umwaka wa 2020, Madamu Russel yakoze nk’Umunyamabanga wungirije wa Perezida muri White House ku buyobozi bwa Perezida Barack Obama, Umujyanama Mukuru ku bibazo by’abagore ku rwego mpuzamahanga muri Komite ya Sena ishinzwe Ububanyi n’Amahanga.

Madamu Catherine Russel yaganiriye n’abana bo kuri Groupe Scholaire GS Mukarange

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA