Perezida Kagame yakebuye abayobozi bibagirwa buri gihe no mu bikomeye
Amakuru

Perezida Kagame yakebuye abayobozi bibagirwa buri gihe no mu bikomeye

NTAWITONDA JEAN CLAUDE

February 9, 2022

“Umuntu arakubwira ati nibagiwe. Ukamubaza uti ese wibagirwa buri gihe? Kwibagirwa birashoboka, abantu baribagirwa. Ariko wakwibagirwa buri gihe? Wakibagirwa mu bikomeye se? Ibintu bishobora gutuma abantu batakaza ubuzima, ukibagirwa?”

Perezida wa Repubulika y’u Rwanda Paul Kagame, yagarutse kuri ibyo bibazo mu ijambo yagejeje ku bayobozi batandukanye bitabiriye umuhango wo kwakira abayobozi bashya binjiye muri Guverinoma. Ni umuhango watambutse ku maradiyo n’amateleviziyo atandukanye mu Rwanda ndetse unakurikirwa ku mbuga nkoranyambaga ku wa Kabili taliki ya 8 Gashyantare 2022.

Umukuru w’Igihugu yabanje gushimira Minisitiri Dr. Ernest Nsabimana na Eng. Patricie Uwase bemeye kurahirira inshingano nshya bahawe muri Minisiteri y’Ibikorwa Remezo, abasaba gukora uko bikwiye izindi nshingano bahawe nk’uko babikoraga mu zo bari basanzwe bakora.  

Yakomeje avuga ko imirimo ikorwa mu nzego zitandukanye igamije kugeza u Rwanda ku rundi rwego rwisumbuye ku ho ruvuye ariko byose bigaterwa n’imikorere y’abayobozi, ubushobozi ndetse n’ubushake.

Perezida Kagame yavuze ko umuhango wo kurahiza abayobozi hagasubirwamo amagambo amwe agamije kubibutsa inshingano bikorwa buri gihe kandi n’abarahira bakaba bemera kuzuza inshingano ariko ngo iyo bigeze mu bikorwa n’umusaruro ubivamo bigaragara ko hari abatuzuza inshingano uko bazirahiriye.

Yanenze bamwe mu bayobozi usanga babusanya imvugo yabo n’ingiro, avuga ko kwibutsa inshingano bikorwa buri gihe kugira ngo abazifite bongere kwibuka uburemere bwazo, bityo batangire gukora ibyo badakora atari uko hari impamvu igaragara yumvikana yabibabujije.

Yakomeje agira ati: “Ibintu birapfa kuri wowe wibagiwe, cyangwa se wibanje. Mu byo watekerezaga byose ntabwo watekereje abantu ukorera, wihereyeho. Inyungu zabaye izawe, iby’abandi bazategereze… Wibanje, wabanje abo wita abawe, abandi Banyarwanda uko byagenda kose, ibyo bizaba biza nyuma. Ni ho ibintu bipfira, uburangare.”

Yatanze ingero z’ibikorwa Leta y’u Rwanda itegurira abantu batishoboye ishyizemo imbaraga nyinshi muri porogaramu zinyuranye, haba mu kububakira inzu cyangwa kubaha inka ngo bazitunge na zo zibatunge, ariko abayobozi bamwe bakabyifunga cyangwa ntibakurikirane uko byagenze kugeza igihe abaturage bazaremba bakabyivugira.

“[…] Amazu twabubakiye, bamwe yabaguye hejuru cyangwa se akagwa gusa kubera ko yabuze gikurikirana. Inka zagenewe guhabwa abaturage, ukazasanga abayobozi ni bo bazitwariye, abo bagombaga kuziha bagatahira ubusa ntihagire ikibageraho… abayobozi bakwiriye kuba bakurikirana ibyashyizwemo kugira ngo bifashe abaturage, ahantu bororera inka umuyobozi akaza akishyiriramo ize iz’abaturage zigapfa, zigashaka ahandi cyangwa se bakagomba kuzigurisha kuko badashobora kubona aho baziragira…”

Abayobozi bibukijwe ko bagomba kumenya no gukuraho ibigirira nabi abaturage

Perezida Kagame yasabye abayobozi guhora bakurikirana ubuzima n’imibereho y’abo bakorera kugira ngo batange ibisubizo ku bintu byaba bigirira nabi abaturage nk’uko barahirira gushyira inyungu z’abaturage ku isonga.

Yatanze urugero rw’abaturage yabonye batakamba ku mbuga nkoranyambaga ku kibazo cy’inyamaswa zirya inka z’abafte inzuri zegereye ishyamba rya Gishwati. Yatunguwe no kumva ko abayobozi bamwe bari bazi icyo kibazo cyahereye mu mwaka wa 2019, aho inka zisaga 50 zari zimaze kwicwa n’izo nyamaswa.

Ati: “Kubona abaturage batakamba kuri social media (imbuga nkoranyambaga) bavuga inyamaswa zabamariye amatungo hafi na Gishwati. Mbibonye ntelefona abayobozi bamwe, mpera ku b’umutekano mbaza abapolisi nti ibi bintu murabizi, mwabibonye? Aha hantu murahaba murakurikira? Bati twabibonye…, umuyobozi wese ntelefonnye akambwira ko bari babizi, ubwo bagatangira kumbwira ko noneho bagiye kubikora.”

Yakomeje avuga ko kumenya ko ibibazo bihari ariko ukaba utaragize icyo ubikoraho uri Minisitiri cyangwa umuyobozi wundi uwo ari we wese uba udashobanukiwe inshingano warahiriye.

“[…] Guhera mu mwaka wa 2019? Umbwiye ko ubizi ariko ntacyo ubikorera, wabimenyeye iki se? Cyangwa ubereye iki ku buyobozi? Uvuze ngo ntubizi, umuntu yakwibaza ati ariko uyu Muyobozi uba ahangaha utamenya ibintu biri mu gihugu bigirira nabi abaturage ubundi we abereyeho iki?”

Perezida Kagame yavuze ko ntacyo byaba bimaze kurahira bikaba umuhango gusa kuko abantu badaha agaciro indahiro barahiye, asaba buri wese ufite inshingano kwisuzuma akubahiriza ibiubiye mu byo yiyemeje gukora mu nyungu z’Igihugu.  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA