Perezida Kagame yanyuzwe n’inganda z’inkingo zibonetse vuba muri Afurika
Amakuru

Perezida Kagame yanyuzwe n’inganda z’inkingo zibonetse vuba muri Afurika

NTAWITONDA JEAN CLAUDE

February 16, 2022

Kubaka inganda zikora inkingo n’indi miti ku mugabane w’Afurika bibonwa nk’intambwe ikomeye igiye guhindura mu rwego rw’ubuzima rusange. Ubwo iyo nkuru yatagazwag bwa mbere ko mu Rwanda, muri Gahana na Senegal hagiye kubakwa izo nganda, byabaye nk’inzozi kuri bamwe abandi bakeka ko ari umushinga uzafata imyaka n’imyaniko .

Kuri ubu ntibikiri amagambo, umushinga wabarirwaga nibura imyaka itatu ugiye gushyirwa mu bikorwa bitarenze muri uyu mwaka, bitewe n’ikoranabuhanga rishya ryifashishijwe mu kubakira izo nganda mu makontineri (BioNTainers), bikazasaba kuzitereka ahabugenewe zigahita zitangira kubyazwa umusaruro.

Perezida wa Repubulika y’u Rwanda Paul Kagame, yavuze ko uretse abashidikanyaga hari n’abumvaga ko bitazashoboka kubaka innganda z’inkingo muri Afurika, mu ijambo yagejeje ku bitabiriye inama yiga ku kuringaniza ikwirakwizwa ry’inkingo ku mugabane yabereye i Marburg, mu Budage kuri uyu wa Gatatu taliki ya 16 Gashyantare 2022.

Perezida Kagame yagize ati: “Guhuza imikorere y’inganda ni intambwe ikomeye mu ikoranabuhanga, nkuko ubwacu tubyiboneye. Byoroheje ikorwa ry’inkingo mu bihugu, aho, mu mwaka ushize wonyine abenshi babyumvaga nk’ibidashoboka.”

Yakomeje avuga ko gahunda yo gukorera inkingo ku mugabane w’Afurika itajyanye n’ibyabaye kera, ahubwo yerekeye ejo hazaza kuko hashobora kwaduka ikindi cyorezo. Ati: “Ariko ubutaha tuzihuta birushijeho kandi zaba twitegure neza, kubera ubu bufatanye bukomeye buri hagati ya BioNTech n’Afurika.”

Yavuze ko amahitamo yo kohereza bwa mbere iryo koranabuhanga ritanga gisubizo kirambye muri Afurika ari ikimenyetso gikomeye cy’uko rishobora no kwihutisha guhanga udushya mu bihugu bitandukanye by’Afurika.

Yanashimangiye ko ubwitange bw’Ikigo BionTech buri ku rwego ruhanitse, rutari rwitezwe muri Afurika. Ati: “Kandi Tuzirikana icyo bisobanuye.”

Yanashimangiye kandi ko u Rwanda rwiyemeje gusigasira ubu bufatanye no gutanga umusanzu warwo mu guharanira ko ubufatanye bwa BionTech n’ibihugu by’Afurika butanga umusaruro kandi mu buryo burambye.

Ati: “Ariko nta n’umwe wabikora wenyine. Mbere na mbere, turimo gukorana na Ghana na Senegal, Umuryango w’Afurika Yunze Ubumwe (AU), by’umwihariko n’inzego zirimo Africa CDC na AUDA NEPAD, biyoboye Ikigo gishinzwe Ubuziranenge bw’imiti muri Afurika (AMA). Abayobozi b’icyubahiro bayoboye iki gikorwa barahari hano kandindagira ngo mbashimire.”

Perezida Kagame yashimye abayobozi batandukanye barimo Umuyobozi Mukuru wa BioNTech Uğur Şahin ndetse na Özlem Türeci ukuriye ubuvuzi muri icyo kigo yagize uruhare mu ishingwa ryacyo.

Yanashimye kandi Perezida wa Komisiyo y’Umuryango w’Ubumwe bw’u Burayi Ursula von der Leyen, ubuyobozi bw’Ishami ry’Umuryango w’Abibumbye ryita ku Buzima (OMS) Mu Ikigo Mpuzamahanga cy’imari, Banki y’u Burayi y’Ishoramari Umuryango kENUP Foundation n’umuyobozi wayo Holm Keller.

Umukuru w’u Rwanda yasoje azaba ubufatanye bwa buri wese mu gutuma uyu mushinga utanga umusaruro binyuze mu gukora vuba kandi buri wese yitanga uko ashoboye.

Buri ruganda rwa BionTainers rwitezweho kuzaba rukwiye kuri metero kare 800  aho ruzashyirwa hose, rukaba rugizwe na kontineri 12 zigabye mu byiciro bibiri, ahavangiwrwa imiti n’ahatunganyirizwa inkingo

BioNTech yatahuye ko gutegura no gukora inkingo za mRNA bishobora gukorerwa icyarimwe, hanyuma icyiciro cyo kuzishyira mu macupa no kuzibika bigakorwa n’abanyagihugu.  

Buri ruganda mu zizubakwa mu Rwanda, Ghana na Senegal ruzaba rufite ubushobozi bwo gukora doze zigera kuri miliyoni 50 n’uko byashimangiwe na Uğur Şahin, kandi izo nganda ntizizakora inkingo za COVID-19 gusa kuko ruzatanga n’iz’izindi ndwara zirimo malaria, VIH/SIDA n’igituntu.  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA