Perezida Kagame yanyuzwe n’uko indwara y’umusinziro yacitse mu Rwanda
Amakuru

Perezida Kagame yanyuzwe n’uko indwara y’umusinziro yacitse mu Rwanda

NTAWITONDA JEAN CLAUDE

June 23, 2022

Perezida wa Repubulika y’u Rwanda Paul Kagame, yanyuzwe n’amakuru yatanzwe n’Umuyobozi Mukuru w’Ishami ry’Umuryango w’Abibumbye ryita ku Buzima (OMS) Dr. Tedros Adhanom Ghebreyesus washimiye u Rwanda kuba rwarabashije kurandura indwara y’umusinziro izwi nanone nk’indwara yo guhondobera.

Iyo ndwara y’umusinziro nyafurika (Human African Trypanosomiasis) ni imwe mu  ndwara zititaweho uko bikwiye (NTDs) zikoreza umutwaro uremereye urwego rw’ubuvuzi ku mugabane w’Afurika n’ibindi bice bitandukanye by’Isi.

Imibare itangwa na OMS igaragaza ko iyo ndwara yagiye igabanyuka mu bihugu byinshi nubwo hari aho ikigaragara kandi ikaba yica n’abantu. Iyi ndwara yiganje cyane cyane mu turere tumwe tw’Afurika yo munsi y’Ubutayu bwa Sahara, ikaba yugarije abaturage bakabakaba miliyoni 70 mu bihugu 36.

Mu mwaka wa 2010 yahitanye abantu bagera ku 9,000 umubare ukaba wari wagabanyutse ugereranyije n’abantu 34,000 yahitanye mu 1990. Mu mwaka wa 2020, muri Afurika hatangajwe abantu 663 banduye iyo ndwara ikwirakwizwa n’isazi ya Tsetse.

Ahantu hatatu h’ingenzi yigeze kuba icyorezo mu mateka ya vuba ubwa mbere ni muri Uganda no mu Kibaya cya Repubulika Iharanira Demokarasi ya Congo kuva mu mwaka 1896 kugeza 1906; ubwa kabiri ni hagati ya 1920 na 1970 mu bihugu byinshi by’Afurika.

Mu ijambo yagejeje ku bitabiriye Inama Mpuzamahanga yiga kuri Malariya na NTDs yabereye i Kigali kuri uyu wa Kane, Dr. Tedros yifatanyije n’u Rwanda kwishimira intambwe imaze guterwa mu rwego rw’ubuzima irimo no kuba iyo ndwara yo guhondobera yararanduwe burundu mu gihugu.

Yagize ati: “Nyuma y’Ikinyarwanda cyanjye gishya ndashimira Perezida Kagame wantumiye ndetse akaba yakiriye iyi nama y’ingenzi cyane. Ndamushimira kandi intambwe imaze guterwa mu guhangana na Malariya mu Rwanda, ndamushimira ko indwara y’umusinziro nyafurika yaranduwe mu Rwanda, ndabashimira kandi kuba mugeze ku rwego ruri hejuru mu gukingira icyorezo cya COVID-19.

Perezida Kagame yashimiye Tedros ku bw’iyo nkuru nziza yasangije abitabiriye iyo nama yateraniye gufata ingamba zihamye zigamije kurandura Malariya n’indwara zose zititaweho uko bikwiye.

Yagize ati: “Nishimiye ko OMS imaze kwemeza ko indwara y’umusinziro nyafurika yaranduwe burundu mu Rwanda. Ariko turacyafite byinshi byo gukora. Niba hari icyo COVID-19 yatwigishije ni uko twese hamwe binyuze mu bikorwa biteguwe kandi biyobowe neza, twagera kuri byinshi biruseho.”

Perezida Kagame yaboneyeho gushima abayobozi batandukanye bitabiriye Inama y’Abakuru b’Ibihugu na Guverinoma bitabiriye iyo nama yiga ku ngingo ikomeye yo guhangana n’ibibazo by’ubuzima ku Isi, anashima ko abo bayobozi bahujwe no kwemeza Itangazo rya Kigali ku kurandura indwara zititaweho uko bikwiye (Kigali Declaration on neglected tropical diseases (NTDs).

Ati: “Ayo masezerano hamwe na gahunda ya OMS yo kurwanya indwara zititaweho uko bikwiye bitarenze mu mwaka wa 2030, biraduha umurongo w’ibikorwa usobanutse.”

Igikomangoma (Prince) cy’u Bwongereza Charles, na we yashimye uburyo abayobozi bahuriye hamwe biga ku ngingo ijyanye no kwita ku buzima, imwe mu zigize umurunga w’inyabutatu w’imibereho ya muntu, iyo bijyaniranye no kwita ku mubumbe ndetse no guharanira iterambere ry’ubukungu rirambye.

Yavuze ko iyi nama ibaye mu gihe Isi yose ihanganye n’imihindagurikire y’Ikirere ikomeje kongera umurego mu guha urwaho ikwirakwizwa ry’indwara ya malariya mu bice by’Isi bitari byarigeze biyimenya.

Yagize ati: “Ubushakashatsi bwa vuba, bugaragaza ko ubushyuhe bw’Isi buramutse bukomeje kwiyongera bukagera kuri dogere selisiyusi 3.7 mu mpera z’iki kinyejana, abatuye mu bice byibasirwa na malariya n’indwara y’umusinziro bakwiyongeraho miliyari 4.7.”

Yakomeje yemeza ko atazahwema gushyigikira ubufatanye bw’ibihugu mu guhangana n’indwara ya malariya ku Isi, ku buryo izaba yaranduwe bitarenze mu mwaka wa 2030. Yaboneyeho no gushima Itangazo ryemejwe uyu munsi kuko agiye gufasha kwihutisha ibikorwa byo kurwanya izo ndwara byari byaradindijwe n’icyorezo cya COVID-19.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA