Perezida Kagame yasabye gushyira imbere urubyiruko mu  iterambere ry’ikoranabuhanga
Amakuru

Perezida Kagame yasabye gushyira imbere urubyiruko mu  iterambere ry’ikoranabuhanga

NTAWITONDA JEAN CLAUDE

June 6, 2022

Perezida wa Repubulika y’u Rwanda Paul Kagame, yasabye amahanga gushyira urubyiruko ku ruhembe rw’imbere mu rugendo rwo kugeza ikoranabuhanga rigezweho kuri bose.

Umukuru w’Igihugu yabigarutseho kuri uyu wa Mbere taliki ya 6 Kamena 2022, ubwo yafunguraga ku mugaragaro Inama Mpuzamahanga yiga ku Iterambere ry’Ikoranabuhanga mu Itumanaho yitezwe kugeza ku ya 16 Kamena.

Iyo nama iri mu zikomeye ku Isi ibaye ku nshuro ya munani ariko ikaba ari yo nshuro ya mbere ibereye ku mugabane w’Afurika, iragira iti: “Kugeza itumanaho aho ritaragera mu guharanira iterambere rirambye.”

Ni inama itanga amahirwe yihariye yo gutegura inzira n’uburyo bushya bwo gushimangira ubufatanye mu kwagura ihuzanzira ry’imiyoboro y’itumanaho ndetse no gutegura ibisubizo bishya by’ikoranabuhanga bigeza ibihugu ku Ntego z’Iterambere Rirambye (SDGs).

Perezida Kagame yavuze ko gihe Isi yose iharanira kugera ku iterambere ry’ikoranabuhanga rihendukiye buri wese,  urubyiruko rukwiye gushyirwa imbere.

Yakomeje agira ati: “Kugeza ubu, urubyiruko ni rwo rukoresha ihuzanzira ry’imiyoboro y’itumanaho kurusha abandi mu miryango yacu, ariko ibyo binasobanuye ko ari bo bahura n’ingorane z’ibibazo by’umutekano w’ikoranabuhanga n’amakuru bwite kurusha abandi.”

Yavuze ko mu kurinda ibyago bishobora kugwira urubyiruko rukoresha ikoranabuhanga, mu mwaka ushize u Rwanda rwemeje  itegeko ku mutekano w’ibijyanye n’ikoranabuhanga n’amakuru bwite y’umuntu mu kurema ikirere cyoroshya imikoreshereze y’ikoranabuhanga ku barikoresha n’abikorera.

Perezida Kagame yashimangiye ko nubwo hari impinduka zagaragaye mu iterambere ry’ikoranabuhanga rigezweho, hakiri ubusumbane bukabije mu mikoreshereze yaryo mu bihugu bikiri mu nzira y’amajyambere n’ibyateye imbere.

Yagize ati:Ubwo busumbane buramutse budakuweho, iterambere rizakomeza kwiyongera gusa mu bice bike byo ku Isi mu gihe ahandi hose rikomeza kugenda biguru ntege. Imibare irivugira ubwayo: hejuru ya kimwe cya gatatu cy’Isi yose ntikiragezwaho umuyoboro wa internet ndetse umubare munini ni abagore mu bihugu bikiri mu nzira y’amajyambere.”

Yavuze ko inshingano zo gutegura ahazaza h’ubukungu bushingiye ku ikoranabuhanga no guharanira ko nta n’umwe usigara inyuma, ari iza buri wese, kuko nta kigo  na kimwe, umuryango cyangwa Igihugu gifite ubushobozi bwo kubikora cyonyine.

Ati: “Bityo dukwiye kwimakaza ubufatanye bwa Leta n’abikorera mu kongera ingano y’abagerwaho na serivisi z’ikoranabuhanga no kongerera ubumenyi mu by’ikoranabuhanga abatishoboye.”

Yavuze ko nubwo icyorezo cya COVID-19 cyasabye ibihugu ikiguzi kiremereye, kimwe mu by’ingenzi byakozwe ngo ni ukugaragaza ububasha bw’ikoranabuhanga nk’igikoresho cyo guharanira kwigira, guhererekanya ubumenyi no guteza imbere ubukungu. Ati: “Ntabwo twakwemera ko ayo mahirwe adupfira ubusa.”

WTDC ni inama ihurije hamwe abayobozi, ba rwiyemezamirimo, ibigo biharanira impinduka muri sosiyete, abenjenyeri, impuguke mu gushyiraho politiki, abanyeshuri, abacuruzi ndetse n’abandi bafatanyabikorwa batandukanye bagamije gushaka ibisubizo biganisha ku kugeza ikoranabuhanga kuri bose.

Umunyamabanga Mukuru w’Ikigo Mpuzamahanga cy’Itumanaho (ITU)  Houlin Zhao, yavuze ko Umuryango w’Abibumbye wiyemeje gukora ibishoboka byose mu gushyigikira urugendo rwo kugeza ikoranabuhanga ku bo ritarageraho.

Iyi nama yabanjirijwe n’indi ihuza urubyiruko (Generation Connect Global Youth Summit) yabaye hagati y’italiki ya 2 kugeza ku ya 4 Kamena, igamije kwimakaza ikoranabuhanga mu itumanaho mu gisekuru gishya cy’urubyiruko. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA