Perezida Kagame yasabye gutegura isoko ry’inkingo zikorewe muri Afurika
Amakuru

Perezida Kagame yasabye gutegura isoko ry’inkingo zikorewe muri Afurika

NTAWITONDA JEAN CLAUDE

May 11, 2022

Mu gihe uyu munsi inkingo zikorerwa muri Afurika zikwirakwizwa ku mugabane ziri munsi ya 1%, Umuryango w’Afurika Yunze Ubumwe (AU) ufite intego yo kwikorera hejuru ya 60% by’inkingo zikwirakwizwa mu bihugu bitandukanye bigize uyu mugabane.

Perezida wa Repubulika y’u Rwanda Paul Kagame, yavuze ko mu gihe hakomeje imishinga yo kugeza inganda z’inkingo n’indi miti muri Afurika, hakwiye gutegurwa isoko ry’ibyo bicuruzwa hakiri kare kugira ngo bitazarangira bikozwe ku bwinshi ariko bikabura isoko.

Perezida Kagame yabigarutseho ku wa Kabiri taliki ya 10 Gicurasi 2022, ubwo yitabiraga inama y’abagize Biro y’Inteko Nkuru ya AU n’Abakuru b’Ibihugu byatoranyirijwe kubakwamo inganda zikora inkingo n’indi miti muri Afurika.  

U Rwanda, Senegal, na Ghana ni byo bihugu byiteze kubona ikoranabuhanga rigezweho ry’inganda zizazanwa muri za kontineri (BioNTainers) guhera mu mpera z’uyu mwaka ku bufatanye n’Ikigo BioNTech, zigatangira gutanga umusaruro mu rwego rwo gushimangira ukwigira kw’Afurika mu rwego rw’ubuvuzi.

Buri ruganda muri zo ruzatangira rufite ubushobozi bwo gukora doze zigera kuri miliyoni 50, kandi izo nganda ntizizakora inkingo za COVID-19 gusa kuko zizajya zikora n’iz’izindi ndwara zirimo Malariya, VIH/SIDA n’Igituntu.

Perezida Kagame yavuze ko ikorwa ry’inkingo zikenewe kandi zifite ireme zishobora guhangana ku isoko mpuzamahanga, ari urugendo ruhenze, ari na yo mpamvu izo nkingo zikwiye kubonerwa isoko rihagije mu rwego rwo kurushaho gushyigikira ukwigira kw’Afurika mu buvuzi.

Yagize ati: “Guharanira ko izo nkingo zigurishwa, zikwirakwizwa ndetse zigakoreshwa mu bihugu byacu, ni urundi rwego rw’ibibazo bikeneye gutekerezwaho binyuze mu nzira zikwiye. Dukeneye inama ku bufatanye bwo gukorera inkingo ku mugabane w’Afurika, mu bijyanye no gukora ibicuruzwa bifatika bikenewe ku isoko.”

Yakomeje ashimangira ko nanone kandi ari ingenzi ko inzego zishinzwe gukusanya no gukwirakwiza inkingo nka COVAX, GAVI n’izindi, zitangira guha agaciro izakorewe muri Afurika.

Ati: “Urugero, dushobora gufatanya gushyiraho imikorere yumvikana itanga icyizere cy’uko inkingo zikorewe ku mugabane w’Afurika zizabona isoko; ibyo bizashoboka mu gihe inganda zikora inkingo zishobora gukorera hamwe, ndetse zigahangana n’indi ku biciro no ku ireme.”

Ibyo ngo byagerwaho gusa hongerewe imbaraga mu bugenzuzi bugamije gukora inkingo n’imiti bifite ireme n’ububasha bwo guhangana n’ibikorerwa ku yindi migabane.

Yasabye ubufatanye mu guharanira ko Ikigo Nyafurika gishinzwe Ubuziranenge bw’Imiti (AMA) gikora mu buryo busesuye.

Ibyo na byo bizajyana no gushyira imbaraga mu bukangurambaga bugamije guhindura imyumvire y’abatuye Isi ku bikorerwa muri Afurika bishobora gutakarizwa icyizere bitewe gusa n’isura itari yo abantu bafite kuri uyu mugabane.

Ati: “Ndifuza ko twakorera hamwe tugafatanya n’abafatanyabikorwa bacu b’ingenzi tudatinze, mu gutegura ahazaza hongera amahirwe y’ishoramari mu kwagura ubushobozi bwo gukorera inkingo muri Afurika.”

Perezida Kagame yashimye Umuyobozi wa AU akaba na Perezida wa Senegal Macky Sall n’abandi banyacyubahiro bitabiriye iyo nama barimo na Perezida w’Afurika y’Epfo Cyril Ramaphosa na we wasabye ko iki kibazo cy’isoko ry’inkingo zikorewe muri Afurika cyatangira gushakirwa umuti mu maguru mashya.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA