Perezida Kagame yijeje inyungu nyinshi mu migenderanire y’Afurika na Karayibe
Amakuru

Perezida Kagame yijeje inyungu nyinshi mu migenderanire y’Afurika na Karayibe

NTAWITONDA JEAN CLAUDE

April 16, 2022

Perezida wa Republika y’u Rwanda Paul Kagame, yagaragaje uburyo kunoza ububahirane bw’umugabane w’Afurika n’Ibirwa bya Karayibe (Caribbean region) bitanga amahirwe menshi mu guharanira iterambere ry’ibihugu byo mu turere twombi.

Yabigarutseho kuri uyu wa Gatandatu taliki ya 16 Mata 2022, mu ruzinduko rw’akazi rw’umunsi umwe yagiriye mu Gihugu cya Barbados nka kimwe mu bigize Ibirwa bya Karayibe, nyuma yo kuva mu ruzinduko rw’iminsi itatu yagiriye muri Jamaica guhera ku wa Gatatu w’iki Cyumweru.

Perezida Kagame akigera mu Murwa mukuru Bridgetown, yakiriwe na Minisitiri w’Ububanyi n’Amahanga n’Ubucuruzi bwo hanze y’Igihugu Jerome Xavier Walcott. Muri uru runzinduko Perezida Kagame yahuye n’abayobozi batandukanye barimo Perezida w’icyo Gihugu Sandra Mason nyuma anagirana ibiganiro na Minisitiri w’Intebe Mia Amor Mottley.

Ni ibiganiro byabimburiye isinywa ry’amasezerano y’ubufatanye hagati y’u Rwanda na Barbados, agamije kwimakaza ubutwererane bukozwe ku buryo burambye

Perezida Kagame yagaragaje ko Afurika na Karayibe bihuriye kuri byinshi bitakurwaho no kuba ibice byombi bitegeranye ku ikarita y’Isi. Perezida w’u Rwanda kandi asanga hari ibyihutirwa byatuma abatuye Afurika na Karayibe barushaho kwegerana no gukorana.

Mu kiganiro n’abanyamakuru cyakurikiye ibiganiro, Perezida Kagame yagize ati: “U Rwanda na Barbados ni ibihugu bitandukanyijwe n’intera nini cyane ariko hari imbogamizi duhuriyeho hari n’ubunararibonye butandukanye twasangira. Ni muri urwo rwego twumva twegeranye.  Tugiye gushakisha inzira zifatika zo kurushaho kwimakaza ubutwererane hagati y’ibihugu byacu byombi mu bihe biri imbere.”

Abajijwe inyungu zitezwe mu bufatanye bw’impande zombi, Perezida Kagame yagize ati: “Ndemeza ko hari inyungu nyinshi mu baturage b’ibihugu byacu, Akarere ndetse n’Umugabane w’Afurika mu gihe batihuje gusa na Barbados ahubwo na Karayibe yose… Icya mbere tugomba gukora ni ugushyiraho ubwo buryo no gushoboza abatuye muri Karayibe gutembera bakajya mu Rwanda cyangwa se ibindi bice by’Afurika n’Abanyafurika bakaza ino, ubwo rero tugomba kureba ikibazo cya Visa hagakurwaho iyi ntambamyi, tugashobora kubaka uru rujya n’ uruza twumva ko twese dukenerana, twagirirana akamaro, hari byinshi twakora nk’ubucuruzi, n’ibindi… Ariko dukeneye gushyira mu bikorwa duhereye ku by’ibanze. Mbere ya byose harimo gushyira abantu ubutumwa tuti, kuki bitashoboka ko twarushaho gukorana bya hafi?”

Perezida Kagame yakomoje ku ruhare rutazibagirana rwa Barbados mu Nama ya Loni yiga ku ihindagurika ry’ibihe yabaye ku nshuro ya 26 (COP26), no mu Nteko Rusange y’Umuryango w’Abibumbye y’ubushize kuko iri mu bihugu byashyize ahabona ikibazo cy’ubusumbane mu mikorere n’imiyoborere y’Isi, bisaba gukorera hamwe mu kubishakira ibisubizo.

Yakomeje agira ati: “Nk’umwe mu bayoboye Komisiyo y’Umuyoboro Mugari w’Itumanaho mu guharanira Iterambere Rirambye, nashimishijwe cyane no kwakira Minisitiri w’Intebe nka Komiseri Mushya mu mwaka ushize. Ndifuza nanone kwifatanya mu byishimo na Guverinoma ndetse n’abaturage ba Barbados kuba baranyuze neza mu rugendo rwo kwimukira muri Repubulika.”

Yasoje asaba Barbados gufatanya n’u Rwanda mu kubakira ku nama  ya mbere Ihuza Afurika n’ibihugu bya Karayibe (CARICOM-Africa) yabaye muri Nzeri 2021 mu gukomeza gushyira ku murongo gahunda z’ingenzi no kwagura ubutwereranze hagati ya Karayibe n’Afurika.

Minisitiri w’Intebe Mia Amor Mottley, yavuze ko Barbados yishimiye cyane kwakira Perezida Kagame n’itsinda ryaje rimuherekeje, aboneraho gushimangira intambwe ishimishije ubuyobozi bwagejeje ku Rwanda mu gihe cy’imyaka isaga 20 ishize.

Yavuze ko impinduka zabaye mu Rwanda nyuma y’amateka ashaririye igihugu cyanyuzemo zatimye u Rwanda rurushaho kuba inyenyeri imurikira amahanga yose, n’urugero rwiza ku bikwiye gukorwa mu guharanira iterambere rifite intego.

Yakomoje ku buryo u Rwanda rugaragaza umwihariko mu kubyaza umusaruro inyungu z’ubumenyi n’ikoranabuhanga, bikaba biri mu bituma amahanga akomeza kugirira icyizere iki gihugu mu rugendo rwo kurushaho kubaka iterambere rishingiye ku ikoranabuhanga.

Yakomeje yifuriza ibyiza ubuyobozi n’abaturage b’u Rwanda muri iki gihe bagiye kwizihiza isabukuru y’imyaka 60 u Rwanda rubonye ubwigenge.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA