Perezida Kagame yishimiye Yubile y’imyaka 70 y’Umwamikazi Elizabeth II
Amakuru

Perezida Kagame yishimiye Yubile y’imyaka 70 y’Umwamikazi Elizabeth II

NTAWITONDA JEAN CLAUDE

June 5, 2022

Umwamikazi w’u Bwongereza Elizabeth II w’imyaka 96 y’amavuko, abaye uwa mbere wo mu nzu y’ibwami muri icyo gihugu wizihije Yubile y’imyaka 70 amaze ku ngoma (Platinum Jubilee).

Kwizihiza yubile y’iyo myaka byabaye mu mpera z’iki cyumweru mu Bwongereza hose no mu Muryango w’ibihugu bikoresha Icyongereza (Commonwealth) hakozwe ibirori byo kwifatanya n’umuryango w’Umwamikazi Elizabeth II mu byishimo.

Ibirori byatangiye kwizihizwa ku wa Kane taliki ya 2 kugeza kuri Iki Cyumweru taliki ya 5 Kamena 2022, aho amamiliyoni b’abaturage yagaragaye mu mihanda, ahabera ibirori no mu bindi bice bitandukanye, aho bamwe bahisemo no kuzana ibyo kunywa no kurya ku mihanda y’Ubwami bw’u Bwongereza ngo buri wese uyinyuramo arye anywe nta mpagarara.

Perezida wa Repubulika y’u Rwanda Paul Kagame, ni umwe mu bayobozi n’abanyacyubahiro batandukaye ku Isi bifatanyije n’u Bwongereza muri ibyo birori, yoherereza Umwamikazi ubutumwa bumushimira ko yitangiye gukora inshingano ze neza mu myaka 70 amaze ku ngoma.

Yagize ati: “Nifatanyije n’Umwamikazi Elizabeth II ku munsi wa Yubile twishimira n’ubwitange bwamuranze ku ngoma ye mu myaka 70 ishize. Mu gihe u Rwanda rwiteguye kwakira CHOGM 2022 (Inama y’Abakuru b’Ibihugu na Guverinoma bihuriye muri Commonwealth), twiteguye gushimangira ubucuti n’ubufatanye mu Muryango wa Commonwealth.”

Uyu munsi, Umwamikazi Elizabeth II yatangaje ko yakozwe ku mutima n’imigendekere myiza y’ibirori byakozwe mu bice byose by’u Bwongereza. Mu butumwa yatangaje nyuma yo kwitabira ibirori byabereye i London, yavuze ko nubwo atagize amahirwe yo kubana na buri wese mu bateguye cyangwa bitabiriye ibyo birori, umutima we wari kumwe na bo aho babikoreye hose.

Yagize ati: “Nubwo ntageze ahabereye ibirori byo kwizihiza imyaka yanjye maze ku ngoma, umutima wanjye wabanye namwe mwese.”

Mu birori yitabiriye byabereye mu ngoro y’ibwami ya Buckingham i London, Umwamikazi Elizabeth II yari agaragiwe n’abana be, abuzukuru n’abuzukuruza. Yavuze ko yanyuzwe n’ubugwaneza, umunezero, n’umutima w’ubumuntu yabonye mu bantu mu minsi ine y’ibirori.

Ati: “Iyo bigeze ku buryo bwo kwizihiza imyaka 70 maze ndi Umwamikazi wanyu, nta gitabo cy’amabwiriza cyashyiriweho kubahirizwa. Ni wo muhango wa mbere ubaye. Ariko nashimishijwe ndetse nakozwe ku mutima n’uko abantu benshi bagiye ku mihanda bishimira Yubile y’imyaka maze ku ngoma.”

Yavuze ko akomeje guharanira gukorera abaturage b’u Bwongereza n’Isi yose mu bushobozi bwe bwose, ashyigikiwe n’umuryango we. Ati: “Nizeye ko ubu bumwe mwagaragaje buzakomeza kubungabungwa mu myaka myinshi iri imbere. Ndabashimiye mbikuye ku mutima ku byiza mwanyifurije n’uruhare mwagize muri ibi birori byuje umunezero.”

Kwizihiza Yubile y’Abami ni umuco umaze imyaka myinshi mu Bwami bw’u Bwongereza kimwe no kwizihiza ubukwe bwabo, amasabukuru bavutseho ndetse n’umuhango wo kwambikwa ikamba. Bikorwa hacanwa igishyito ku nkingi ndende (beacon) nk’ikimenyetso cy’ubumwe mu kwizihiza uwo munsi mu buryo butandukanye.

Icyo gishyito gikoreshwa nk’uburyo bw’itumanaho, cyahindutse uburyo burambye bwo kugaragaza ubumwe mu Bwongereza batuye mu mijyi itandukanye, mu bihugu ndetse no ku yindi migabane ari na cyo kimenyetso nyamukuru kigaragaza ukwishimana n’abo mu ngoro y’ibwami.

Mu 1897, ibyo bishyito byacanwe mu kwizihiza Yubile y’imyaka 60 Umwamikazi Victoria yari amaze ku ngoma. Mu 1977, mu 2002 no mu 2012 na bwo hacanwe ibyo bishyito mu kwizihiza Yubile y’imyaka 25, iy’imyaka 50, n’iy’imyaka 60 y’Umwamikazi Elizabeth, kimwe n’Isabukuru ye y’amavuko y’imyaka 90.

Mu birori byo mu mpera z’iki cyumweru hacanwe imuri zisaga 1,500 mu Bwongereza hose, mu rwego rwo kwifatanya n’umuryango w’ibwami kwishimira Yubile mu bice birimo Ibirwa bya Channel, Isle of Man n’ubutaka bw’u Bwongereza buri ku yindi migabane.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA