Perezida Kagame yongeye gutorerwa kuyobora AUDA- NEPAD
Amakuru

Perezida Kagame yongeye gutorerwa kuyobora AUDA- NEPAD

NTAWITONDA JEAN CLAUDE

February 4, 2022

Perezida wa Repubullika y’u Rwanda Paul Kagame, yatorewe kuyobora Komite Nyobozi y’Abakuru b’Ibihugu Ishami ry’Umuryango w’Afurika Yunze Ubumwe ryita ku Iterambere (AUDA-NEPAD), by’umwihariko rifite inshingano zo kongera ubushobozi bw’ibihugu by’ibinyamuryango ndetse n’imiryango ihuza uturere dutandukanye rw’Afurika.

Perezida Kagame yaherukaga gutorerwa kuyobora Komite Nyobozi  y’Abakuru b’Ibihugu na za guverinoma ku wa 8 Gashyantare 2020 i Addis Ababa, akaba yari asoje manda y’imyaka ibiri.

NEPAD ni ikigo gishinzwe kuyobora no gushyira mu bikorwa imishinga y’ingenzi y’iterambere ku rwego rw’uturere ndetse no ku rwego rw’umuganane w’Afurika wose, hagamijwe kwimakaza ubufatanye mu kugera ku Cyerekezo 2063, gikubiyemo inzozi z’Afurika zigomba gushyirwa mu bikorwa mu gihe gikwiye.

Perezida Kagame yatorewe izo nshingano mu nama yabaye hifashishijwe Ikoranabuhanga ku wa Gatatu taliki ya 2 Gashyantare 2022, yahuje Komite y’Abakuru b’Ibihugu na Guverinoma bihuriye muri NEPAD.  

Umukuru w’u Rwanda Kagame, nk’Umuyobozi w’iyo Komite, ni weyayoboye Inama yayo ibaye ku nshuro ya 39 ari na yo igenwamo  ubuyobozi bwa NEPAD.

Mu butumwa yagejeje ku bagize Komite, Perezida Kagame yagize ati: “Turi mu nzira nziza kuko Afurika ikomeje kuzamuka irenga ingorane zayo. Icyago cy’icyorezo cya COVID-19 kiracyari kumwe natwe, ariko iki cyorezo cyayoboye Afurika mu gufatirana amahirwe yo guharanira kwigira. Mfite icyizere cy’uko AUDA-NEPAD izakomeza kuza ku ruembe rw’imbere mu rugendo rw’iterambere ry’Afurika.

Perezida wa Repubulika Iharanira Deokarasi ya Congo (RDC) akaba n’Umuyobozi Mukuru w’Umuryango w’Afurika Yunze Ubumwe (AU) Félix Antoine Tshisekedi Tshilombo, na we yavuze ko nta kabuza abayobozi bagomba guharanira gushyira mu bikorwa icyerekezo 2063.

Yagize ati: “Tugomba guharanira ko tuzashyira mu bikorwa icyerekezo 2063 mu buryo bw’intangarugero, dufatanyije n’Imiryango y’Uturere n’abafatanyabikorwa mu iterambere mu kubaka Afurika dushaka.”

Yakomeje asaba abayobozi gukusanya ubushobozi no guharanira kwihutisha ukwihuza mu by’ubukungu ku mugabane, gukomera ku ntego biyemeje, gukoresha ikoranabuhanga, guhanga udushya ndetse no gushora imari mu kubaka ubushobozi bw’abaturage.

Ati; “Inama ya 39 ya Komite y’Abakuru b’Ibihugu na Guverinoma bihuriye muri NEPAD ni ingenzi cyane mu rugendo rwo guhuza ubukungu bwo ku mugabane.”

Avuga ku musaruro wa AUDA-NEPAD, Perezida wa Komisiyo ya AU Moussa Faki Mahamat, yavuze ko icyo kigo kuri ubu gifite ubushobozi bwisumbuye bwo gufasha umugabane kwihuza mu by’ubukungu nubwo hari imbogamizi z’icyorezo cya COVID-19 cyibasiye umugabane mu gihe cy’imyaka ibiri.

Yakomeje agira ati: “Byagaragaye ko dushobora kwishakamo ibisubizo by’ibibazo byacu. Nta magambo ahagije dufite twashimiramo Dr Ibrahim Mayaki [wayoboye uyu muryango mu gihe kirenga imyaka 10], kubw’imirimo amaze gukora.”

Perezida wa Senegal, Macky Sall, na we yashimiye Dr. Ibrahim Mayaki wayoboye icyo Kigo guhera mu mwaka wa 2009 kugeza mu mpera za 2020. Na we yavuze ko yakoze imirimo y’agatangaza mu gihe yamaze ayoboye icyo Kigo ndetse anemeza ko Igihugu cye cyamaze kwambika uyu mugabo ikamba ry’ishimwe rihawa intwari kuber ubwitange yagaragaje mu guharanira iterambere ry’Afurika.

Mu nama yayobowe na Perezida Kagame, byatangajwe ko AUDA-NEPAD yubatse ubushobozi bwo guhangana n’ingorane vuba, mu kwihangana no kwiyemeza,  mu mezi 12 ashize.

Dr Mayaki na we yashimangiye ko icyo AUDA-NEPAD yashyize imbere ari ugushaka ibisubizo bishya mu rwego rw’ubuzima, uburezi ndetse no kuvurura uruhererekane rw’ibiribwa.

Yagize ati; “Nk’ikigo twakomeje amavugurura nk’ikigo gishinzwe iterambere, by’umwihariko ku bo dukorera.”

Abakuru b’Ibihugu banashyizeho Umuyobozi (CEO) mushya, izina rye rikaba rizamenyekana mu Nteko Rusange ya AU kugira ngo yemezwe burundu.  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA