Perezida Ndayishimiye yashyikirijwe ubutumwa bwa Perezida Paul Kagame
Amakuru

Perezida Ndayishimiye yashyikirijwe ubutumwa bwa Perezida Paul Kagame

NTAWITONDA JEAN CLAUDE

March 15, 2022

Kuri uyu wa Kabiri taliki 15 Werurwe 2022, Perezida w’u Burundi Ndayishimiye Evariste yashyikirijwe ubutumwa bwa mugenzi we w’u Rwanda Perezida Paul Kagame.

Nkuko bimaze gutangazwa n’ibiro by’Umukuru w’Igihugu cy’u Burundi, Perezida Ndayishimiye yakiriye itsinda riyobowe na Minisitiri w’Ingabo Gen Maj Murasira Albert. 

Ubutumwa bwashyizwe ku mbuga nkoranyambaga z’ibiro by’Umukuru w’Igihugu, bugira buti “Perezida Ndayishimiye Evariste yakiriye mu biro bye itsinda riyobowe na Minisitiri w’ingabo z’u Rwanda Gen Maj Murasira Albert, rizanye ubutumwa bwa mugenzi we Perezida Paul Kagame”.

Perezida Kagame yoherereje ubutumwa mugenzi we w’u Burundi mu gihe umubano w’ibihugu byombi ukomeje gutera intambwe nziza yo kongera gusubira ku murongo.

Mu ntangiriro z’ukwezi kwa Gashyatare uyu mwaka, Perezida Kagame yavuze ko intambwe irimo guterwa mu kuzahura umubano w’u Rwanda n’u Burundi itanga icyizere ko umubano w’ibihugu byombi uzarushaho kugenda urushaho kuba mwiza.

Yagize ati: “Ngira ngo mu bihe biri imbere umubano uraza kugenda urushaho kuba mwiza n’Abarundi n’Abanyarwanda babane uko byari bisanzwe. N’ibyajyaga bitera ibibazo bindi by’umutekano ku mupaka muri za Kibira na Nyungwe, hari abantu bitwaje intwaro bambuka batera u Rwanda, ibyo turagenda tubyumvikanaho n’Abarundi uko tuzagenza icyo kibazo kugira ngo kiveho burundu. Ubwo ababiri inyuma bazarushaho kugira ibyago.”

Mu mwaka ushize ubwo yagiranaga ikiganiro n’abanyamakuru hamwe n’abaturage, na bwo Perezida Kagame yavuze ku mubano w’u Rwanda n’u Burundi ugenda urushaho kunozwa hashingiwe ku bushake n’imbaraga byashyizwe mu kuvugurura uwo mubano ku mpande z’ibihugu byombi.

Yashimangiye ko hari intambwe nziza yatewe mu mibanire y’u Burundi n’u Rwanda, avuga ko hatekerezwa ku kurushaho kuzamura umubano n’imikoranire hagati y’ibyo bihugu byombi, kandi ko ibiganiro byatangiye, igisigaye ari ukubinoza hakarebwa icyakorwa kugira ngo uwo mubano ukomeze kugenda neza.

Yagize ati: “Ku Burundi, dushaka kunoza umubano wacu kandi n’u Burundi burabishaka, duhereye ku byo twumvise n’ibyo twabonye. Ba Minisitiri bacu n’abayobozi b’inzego z’umutekano barahuye kandi bakomeje guhura. Umubano urarushaho kugenda neza kandi ni ko tubyifuza. Biri mu nyungu z’u Rwanda n’u Burundi kandi tuzakomeza kubishyiramo imbaraga.”

Umubano w’u Rwanda n’u Burundi nk’ibihugu bisangiye byinshi mu muco n’amateka, wajemo agatotsi mu mwaka wa 2015 ubwo muri icyo gihugu cy’abaturanyi havukaga imivurungano yaturutse ku matora ya Perezida. Ibyo byatumye Abarundi benshi bahungira mu bihugu by’abaturanyi birimo n’u Rwanda, abafite ubushobozi berekeza mu bihugu byo hanze y’Afurika.

Icyo gihe u Burundi bwashinje u Rwanda rwakiriye abaturage b’impunzi, gucumbikira ababurwanya nubwo rwakiraga abiganjemo abagore n’abana bahungaga bakiza amagara yabo. Icyo gihe Abanyarwanda bari mu Burundi barahohotewe bashinjwa kuba ibyitso by’u Rwanda nk’igihugu bwabonaga nk’igicumbikiye abanzi.

Umubano watangiye kongera kuvugururwa mu mwaka ushize nyuma y’aho u Burundi buboneye Perezida mushya, Evariste Ndayishimiye. Kuva ubwo kugeza ubu ibiganiro birakomeje mu rugendo rwo kurushaho kunoza umubano no gushakira hamwe ibisubizo by’ibibazo bibangamiye amahoro n’umutekano w’Akarere.

Mu ntangiriro za Nyakanga 2021, Minisitiri w’Intebe w’u Rwanda Dr. Ngirente Edouard yifatanyije n’Abarundi kwizihiza isabukuru ya 59 y’Umunsi w’Ubwigenge bw’u Burundi, akaba ari n’amateka icyo gihugu gihuriyeho n’u Rwanda. Urwo ruzinduko rwafashwe nk’ikimenyetso ntakuka cy’intambwe imaze guterwa mu rugendo rwo kunoza ubutwererane bw’ibihugu byombi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA