Perezida Tshisekedi yiyunze ku bashinja u Rwanda gutera inkunga M23
Aamakuru Agezweho

Perezida Tshisekedi yiyunze ku bashinja u Rwanda gutera inkunga M23

NTAWITONDA JEAN CLAUDE

June 6, 2022

Abahanga mu bya Politiki yo mu Karere k’Ibiyaga Bigari bavuga ko iteka iyo ibibazo bya Politiki bikaze muri Repubulika Iharanira Demokarasi ya Congo (RDC), hhashakwa uruhande rwo hanze y’Igihugu rugerekwaho ibyo bibazo mu maguru mashya.

Izo mpuguke zitanga ingero zirimo ikibazocy’ubukene no kugenda buhoro mu iterambere gishyirwa ku bakoloni n’ibihugu bikomeye bishinjwa guteza umutekano muke bishakisha umutungo kamere w’icyo Gihugu.

U Rwanda ruri mu bihugu byasizwe icyasha igihe kinini kubera ibibazo byo muri RDC, nubwo rukora ibishoboka byose mu guharanira ubufatanye bugamije kugarura amahoro arambye mu baturanyi no mu Karere kose.

Ku Cyumweru, Perezida Repubulika Iharanira Demokarasi ya Congo Felix Antoine Tshisekedi Tsilombo, yavuze ko badashidikanya ko u Rwanda ari rwo rwateye inkunga inyeshyamba za M23 zikagaba ibitero ku butaka bw’icyo gihugu.

Kuri televiziyo y’Igihugu nyuma y’ibibazo by’umutekano bimaze iminsi gibugwa mu Ntara ya Kivu y’Amajyaruguru mu bice bihana imbibe n’u Rwanda, Perezida Tshisekedi yagize ati: “Iteka nkomeza kuvuga ko dukwiye kubaka ibiraro aho kubaka ibikuta. Ariko ku bw’amahirwe make yacu turi aha turi.”

Yakomeje avuga ko abaturanyi ba RDC badakwiye kwitiranya ubwo bushake bwo guharanira kubaka amahoro n’intege nkeya, ati: “Ibyo ntibiha abaturanyi bacu urwaho rwo kudukora mu jisho. Ndizera ko u Rwanda rwabonye isomo kuko uyu munsi, biragaragara nta gushidikanya, ko u Rwanda rwateye inkunga inyeshyamba za M23 zikagaba ibitero kuri M23.”

Perezida Tshisekedi yavuze ayo magambo nyuma y’uruzinduko yagiriye  muri Congo-Brazzaville, aho yagiranye ibiganiro na Perezida w’icyo Gihugu Denis Sassou Nguesso ku bibazo bitutumba hagati y’u Rwanda na RDC.

Perezida Tshisekedi yashinje u Rwanda mu gihe na rwo rwamagana ibyo birego bigamije kuyobya uburari no guhunga inshingano zo gukemura ibibazo by’imbere mu gihugu aho igice cy’abaturage bacyo bavuga Ikinyarwanda bifuza guhabwa uburenganzira bungana n’ubw’abandi benegihugu.

Leta ya Kinshasa yahagaritse ingendo zo mu kirere zihuza ibihugu byombi zakorwaga n’Isosiyete Nyarwanda RwandAir, ndetse inahamagaza Ambasaderi w’u Rwanda Vincent Karega ngo ahabwe amabwiriza ku buryo icyo higugu kibona ikibazo cya M23.

Umubano hagati y’u Rwanda na RDC wajemo igitotsi guhera muri Jenoside yakorewe Abatutsi mu 1994, aho abenshi mu basize bahekuye u Rwanda ari ho babonye izjuru rito ndetse bakanahashingira umutwe w’iterabwoba wa FDLRuhungabanya umutekano w’u Rwanda n’Akarere kose kugeza n’uyu munsi.

Umubano wari watangiye kuzahuka kuva Perezida Tshisekedi yajya ku butegetsi mu 2019, ariko ukongera kwisuganya kwa M23 kwatumye icyo gihugu cy’abaturanyi gisenya ingazi zari zimaze kubakwa mu myaka 3 ishize.

Umuryango w’Afurika Yunze Ubumwe (AU) n’Umuryango w’Abibumbye byose byavuze ko bihangayikishije n’umwiryane wongeye gufata indi ntera agati y’ibihugu byombi, iyo miryango isaba guharanira amahoro binyuze mu biganiro.

Abarwanyi ba M23 bongeye guteza umutekano muke mu Burasirazuba bwa RDC nyuma y’imyaka ikabakaba 10 wari umaze ucishije make uhereye igihe wotswaga igitutu, bamwe mu bari bawugize bagahungira mu Rwanda.

Abahungiye mu Rwanda bahise bamburwa intwaro berekezwa mu Ntara y’Iburasirazuba aho bahawe inkambi kugeza n’uyu munsi. U Rwanda ruvuga ko gushingira ku kuba rwarahaye ubuhungiro mu kwemeza ko rufasha uwo mutwe nta shingiro bifite, kuko abacumbikiwe byakozwe hubahirijwe ibikubiye mu mategeko mpuzamahanga.

Umutwe wa M23 washinzwe witwa CNDP mu giharanira uburenganzira bw’Abanyekongo bakoresha Ururimi rw’Ikinyarwanda kubera impamvu z’amateka, uvuga ko utazacika intege mu gukomeza guharanira ko abo baturage na bo babona ubwisanzure n’ijambo mu Gihugu cyababyaye nk’abandi Banyekongo bose.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA