Perezida wa Tanzania yongereye hafi 25% ku mushahara fatizo
Amakuru

Perezida wa Tanzania yongereye hafi 25% ku mushahara fatizo

Imvaho Nshya

May 16, 2022

Perezida wa Tanzania Samia Suluhu Hassan yemeje inyongera ya 23.3% ku mushahara fatizo, bikaba bifatwa nk’intambwe ikomeye mu guhangana n’ingaruka z’ihungabana ry’ubukungu by’umwihariko ku bakozi bahembwa amafaranga make kurusha abandi.

Uyu mwanzuro wafashwe nyuma y’imyigaragambyo y’abaturage bakomeje kugaragaza ko igiciro cyo kubaho gikomeje gutumbagira bityo hakwiye kurebwa ku ngamba zafasha abantu gukomeza kubaho muri ibi bihe bigoye.

Perezida Samia Suluhu yafashe umwanzuro wo kongera uyu mushahara fatizo, bijyanirana no kongera imishahara y’abakozi ba Leta nyuma y’imyaka itandatu ishize idahinduka kuko yaherukaga kuvugururwa mu 2016.

Itangazo ryaturutse mu Biro bya Perezida ku wa Gatandatu, riragira riti: “Inyongera ku mushahara yemejwe hagendewe ku Musaruro Mbumbe w’Igihugu (GDP), amafaranga yinjira mu gihugu ndetse n’impinduka zikomeje kugaragara mu bukungu bw’Igihugu no mu ruhando mpuzamahanga.”

Kuva yajya ku butegetsi nyuma y’urupfu rwa Dr. John Pombe Maghufuli, Perezida Samia Suluhu ntiyahwemye kugaragaza ubushake bwo guhindura politiki y’uwo yasimbuye atega amatwi ijwi ry’abatavuga rumwe n’ubutegetsi, guhindura imyumvire y’Igihugu kuri Koronavirusi n’ibindi.

Umushahara fatizo wongerewe muri Tanzania mu gihe Nyakwigendera Magufuli yari yaranze kuvugurura imishahara akimara gutorwa mu mwaka wa 2015, ahubwo we yikomereza imishinga yo kubaka ibikorwa remezo avugurura ibyambu, imihanda ya gari ya moshi, ubwikorezi bwo mu kirere, imihanda n’ibindi.

Ubukungu bwa Tanzania bwamanutse hasi ku kigero cya 4.8% mu mwaka wa 2020, buzamuka ku kigero cya 4.9% mu mwaka wakurikiyeho n’ubwo icyorezo cya COVID-19  cyibasiye inzego zirimo ubukerarugendo buri mu nzego zinjiriza akayaboTanzania.

Hagati aho, igiciro cya lisansi n’icy’ibiribwa gikomeje gutumbagira mu gihe ibicuruzwa bimwe na bimwe byagabanyutse bitewe n’intambara yo muri Ukraine, n’ingaruka z’icyorezo cya COVID-19.

Ku Munsi Mpuzamahanga w’Umurimo taliki ya 1 Gicurasi, amahuriro y’abacuruzi ndetse n’abakozi bo mu nzego zitandukanye, bakoze imyigaragambyo mu Murwa Mukuru wa Tanzania, Dodoma, basaba kongererwa umushahara fatizo.

Umubare munini muri bo wari ufite ibyapa byanditseho amagambo agira ati: “Imishahara n’ibigenerwa abakozi bivuguruye ni byo dusaba.”

Ikigega Mpuzamahanga cy’Ubukungu (IMF), mu mwaka ushize cyahaye Tanzania inguzanyo isaga kimwe cya kabiri cya miliyari y’amadolari y’Amerika mu kugoboka ubukungu bw’Igihugu, bivugwa ko azifashishwa mu rwego rw’ubuzima, ubukungu no mu kuziba icyuho cy’ikiguzi cy’ibikorwa by’ubutabazi mu gihe cy’icyorezo.

Magufuli yiswe Bulldozer akiriho kubera ubuyobozi bwe bwari bwamaze gutesha agaciro icyo cyorezo cyacaga ibintu mu bihugu bitandukanye, ndetse n’inzira yafashe mu guhangana na ruswa no kwigwizaho ubutunzi ku ruhande rw’abayobozi.

Magufuli yatesheje agaciro inkingo zakorewe mu mahanga n’andi mabwiriza yo guhangana n’icyo cyorezo, asaba abaturage kujya ku mavi bagasenga, avuga ko udupfukamunwa no kwimpisha bidakenewe.

Madamu Perezida Hassan we yafashe inzira inyuranye n’iyo, yimakaza ingamba zo gukumira ikwirakwira ry’icyo cyorezo, anatangiza gahunda yo gukingira muri Nyakanga umwaka ushize.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA