Umunyarwanda Prof. Romain Murenzi wabaye Minisitiri w’Uburezi mu Rwanda, akaba n’inzobere mu bugenge, yatoranyijwe mu rugaga rw’abahanga mu birebana n’ubugenge, anahabwa ishimwe ku ruhare yagize mu bikorwa biteza imbere siyansi.

Umuryango w’Abanyamerika APS, [American Physical society] washyize ahagaragara itangazo kuri icyo gihembo yahawe, hashingiwe ku ruhare yagize mu guteza imbere siyansi, uburezi n’ubufatanye mpuzamahanga mu byerekeranye n’ubushakashatsi.

Nkuko APS ibivuga Prof. Murenzi yashimiwe uruhare yagize mu kuyobora ibikorwa bya siyansi, guteza imbere uburezi n’ubufatanye hagati y’abashakashatsi baba ari abo mu Bihugu by’Akarere, Umugabane Afurika n’ahandi.

APS ati: ‘’Umunyarwanda Prof. Murenzi yakoresheje ubumenyi n’ubunararibonye afite mu byerekeranye n’urwego rwa siyansi mu bikorwa bigamije guteza imbere umuco w’amahoro, imibereho myiza y’abaturage n’iterambere ry’ibihugu.’’

Itangazo ry’uwo muryango rivuga ko mu byo ashimirwa harimo ko yafashije abagore n’abakobwa kubona amahirwe muri siyansi, kuba yarashyigikiye urwego rw’uburezi mu bya siyansi, n’ikoranabuhanga, mu Rwanda no mu bindi bihugu biri mu nzira y’iterambere.

Prof. Murenzi yagize uruhare mu gutangiza gahunda zitandukanye zifasha abahanga mu bijyanye na siyansi bo hirya no hino ku Isi gukorera hamwe, guhererekanya ubumenyi no guteza imbere ubushakashatsi, muri urwo rwego bituma ashimirwa nk’umwe mu bahanga bagize uruhare rugaragara mu guteza imbere siyansi no kuyikoresha mu gukemura ibibazo bibangamiye sosiyete.

Ubusanzwe Prof. Romain Murenzi atanga amasomo mu ishuri Worcester Polytechnic Institute, ishuri rikuru ryigisha ibyerekeranye n’ubumenyi n’ikoranabuhanga rikorera muri Leta Zunze Ubumwe z’Amerika, akaba afite ubunararibonye mu bushakashatsi, mu buyobozi bw’Inzego za Leta no mu gutegura politiki mpuzamahanga zigamije guteza imbere siyansi n’ikoranabuhanga.

Prof. Murenzi yabaye Minisitiri w’Uburezi kuva mu 2001 kugeza mu 2006, aho yagize uruhare mu bikorwa bitandukanye byo guteza imbere urwego rw’uburezi, guhera mu mwaka wa 2006 kugeza mu 2009, yabaye Minisitiri muri Perezidansi ushinzwe Siyansi, Ikoranabuhanga n’Ubushakashatsi mu nshingano zari zikubiyemo no guteza imbere ikoranabuhanga mu itumanaho.

Yakoreye imiryango itandukanye irimo umuryango w’Abanyamerika ushinzwe Guteza Imbere Siyansi, American Association for the Advancement of Science (AAAS), aho yabaye Umuyobozi w’Ikigo gishinzwe Siyansi, Ikoranabuhanga n’Iterambere Rirambye.

Yanakoze mu Ishami ry’Umuryango w’Abibumbye ryita ku Burezi, Siyansi n’Umuco (UNESCO), aho yayoboye ishami rishinzwe Politiki za Siyansi no Kongerera Abahanga Ubushobozi mu bijyanye na Siyansi Kamere, inshingano yakoze mu gihe cy’umwaka umwe.

Ba uwa mbere mu kumenya amakuru agezweho!!!