RDB iri gutegura inama izahuza abacuruzi ba Commonwealth
Amakuru

RDB iri gutegura inama izahuza abacuruzi ba Commonwealth

NTAWITONDA JEAN CLAUDE

March 22, 2022

Urwego rw’Igihugu rw’Iterambere (RDB), rwatangaje ko hateganyijwe inama izahuza abanyemari bo mu bihugu bikoresha ururimi rw’icyongereza (Commonwealth Business Forum ‘CBF’).

Byagarutsweho ku gicamunsi cyo kuri uyu wa Kabiri taliki 22 Werurwe 2022 muri Kigali Convention Center, mu nama yahuje RDB n’abikorera mu by’ubwikorezi n’ikoranabuhanga.

Biteganyijwe ko inama izaba guhera taliki 22-24 Kamena 2022, ikazahuza abanyemari basaga 400 n’Abakuru b’Ibihugu na Guverinoma.

CBF izaba ibaye inama ya mbere ibereye muri Afurika mu myaka 12 ishize, ikaba ari ubwa mbere izaba inabereye mu Rwanda.

Philip Lucky, Umuyobozi w’ishami ry’ishoramari muri RDB, ahamya ko iyi nama izitabirwa n’abakuru b’Ibihugu na Guverinoma, Abikorera bo mu Rwanda, abanyenganda banini n’abikorera bo mu karere u Rwanda ruherereyemo.

Abahagarariye amabanki na bo byitezwe ko bazitabira.

Impamvu y’iyi nama, RDB itangaza ko ari uguhuza abakora ibikorwa by’ubucuruzi kugira ngo bashobore kumenyana.

Ni umwanya mwiza wo kwerekana ibicuruzwa byo mu Rwanda na serivisi zihatangirwa.

Philip, Umuyobozi w’ishami ry’ishoramari muri RDB, asobanura ko Abikorera bagaragarijwe amahirwe ari muri CHOGM nko mu buhinzi, ubukerarugendo, imyidagaduro, ubwikorezi, inganda n’ubwubatsi, ingufu n’ubucukuzi bw’amabuye y’agaciro.

Kugeza ubu RDB irimo guhura n’amatsinda atandukanye arimo abikorera kugira ngo bahabwe amakuru ajyanye na CBF izabera mu Rwanda mu kwezi kwa Kamena 2022.

Philip yagize ati: “Ni ukubategura bakamenya amahirwe azazana n’inama no kureba uko bazabyaza umusaruro CBF izaba ibereye mu Rwanda bwa mbere.

Ni no kubaha amakuru ashingiye ku mahirwe azazana n’iyi nama mu buryo bw’ubucuruzi mu gihugu ariko no mu rwego rw’ishoramari mu bikorera”.

RDB imaze guhura n’amatsinda atandatu, abikorera bari mu nganda, mu buhinzi, mu bukerarugendo, mu mabanki no mu ikoranabuhanga.

Kuri uyu wa Kabiri yari yahuye n’Abakora iby’ubwikorezi n’abari mu rwego rw’Ubwubatsi.

RDB itangaza ko CBF izatuma habaho ubufatanye mu by’ubucuruzi hagati y’abikorera bo mu Rwanda n’abo mu mahanga.

“Ikindi ni uko dushaka gusagurira amasoko. Tumaze kubona ko hari abantu bishimiye kugura ibintu byo mu Rwanda, haba imyenda, ibihingwa n’ibindi”.

CBF izatanga amahirwe ku bantu bashaka kugura ibintu byaguriwe mu Rwanda.

Andi mahirwe ahari ni uko ngo ari umwanya wo kwerekana ibyo bakorera mu Rwanda kugira ngo babone amahirwe yo kubyohereza mu mahanga.

Eng Papias D. Kazawadi, Perezida w’Urugaga Nyafurika rw’Abenjeniyeri, ashimangira ko amahirwe ku bikorera muri iyi nama ya CBF, ari uburyo bwo guhura n’abantu benshi kandi bakora ibintu byinshi ku Isi, bisa nk’ibyo n’abikorera bo mu Rwanda bakora.

Yagize ati: “Ni uburyo bwiza bw’abantu kwiga no gusangira ubumenyi bigatuma ibyo bakoraga n’ibyo barimo babikora neza ndetse bikanoga.

Numva rero amahirwe arimo Abanyarwanda badakwiye kuyitesha kubera yuko ibintu bigusanze mu rugo, ubundi abantu barabyishyurira, bakajya kubishaka ahandi ariko mu gihe byaje hano i Kigali, ni byiza ko tubifatira umwanya”.

RDB itangaza ko abazitabira CBF baziyandikisha bakoresheje uburyo bw’ikoranabuhanga, italiki yo gutangira kwiyandikisha izatangazwa vuba.

Abazitabira CBF bo mu Rwanda basabwa kuzishyura amadolari ya Amerika 250.

Ni mu gihe abanyemari b’abanyamahanga bakora ubucuruzi mpuzamahanga, bazishyura amadolari ya Amerika 450.

Byamaze kwemezwa ko CHOGM izatangira mu cyumweru cya mbere taliki 20 Kamena 2022.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA