RDC na Uganda byakuyeho Visa ku baturage babyo
Amakuru

RDC na Uganda byakuyeho Visa ku baturage babyo

Imvaho Nshya

October 16, 2023

Igihugu cya Repubulika Iharanira Demokarasi ya Congo (RDC) n’icya Uganda byemeranyijwe ko bikura Visa ku baturage bava mu gihugu bajya mu kindi.

Ni umwanzuro wafatiwe mu nama ya Komisiyo yaguye ihuriweho n’ibihugu byombi yabereye i Kinshasa muri RDC, hagamijwe guteza imbere urujya n’uruza rw’abantu muri ibi bihugu byombi by’umwihariko abaturiye imipaka.

Ikinyamakuru The New Vision cyo muri Uganda, mu  itangazo ryashyizweho umukono na ba Minisitiri b’ibihugu byombi, hagaragaramo ko ibihugu byombi byemeye gukuraho amafaranga ya Viza hagamijwe koroshya ubwisanzure mu rujya n’uruza rw’abaturage.

Abo baminisitiri ni Minisitiri wa Uganda ushinzwe Umuryango wa Afurika y’Iburasirazuba, Rebecca Kadaga na mugenzi we uwushinzwe muri Repubulika Ihanira Demokarasi ya Congo, Antipas Mbusa Nyamwisi,

Minisitiri Mbusa Nyamwisi wa RDC ushinzwe Umuryango wa Afurika y’Iburasirazuba yagize ati: “Mu myanzuro y’iyi nama ya 8 isanzwe ya Komisiyo ihuriweho hagati ya DRC na Uganda, turavuga  ikurwaho rya Viza, hagamijwe guteza imbere urujya n’uruza rw’abantu ku bw’ineza rusange y’abaturage b’ibihugu byacu byombi”.

Yongeyeho ati: “Ibi ni ingenzi cyane haba ku bihugu byombi ndetse no mu Karere kacu, kubera ko impamvu zo kutumvikana zigihari, ariko tugomba gushyira ingufu mu guhinduramo ibyo byose imbaraga zo kwiyubaka no kwiteza imbere. Ibi ni byo abaturage bacu bakeneye, kuko n’urugendo rwa kilometero rutangirira ku ntambwe imwe”.

Impande zombi zasuzumye ibibazo zifitanye isano cyane cyane n’umutekano no kugaragaza imbago z’imipaka bahuriyeho, ubufatanye mu bya gisirikare n’umutekano, guhagarika imitwe yitwaje intwaro ibangamiye ibihugu byombi, ndetse no kurwanya ikwirakwizwa ry’intwaro nto, ndetse no gucyura impunzi.

Mu gihugu cya Repubulika iharanira Demokarasi ya Congo hari umutwe wa ADF urwanya Leta ya Uganda wakunze guhungabanya umutekano muri iki gihugu  kandi ukaba unakomeje kwica abatari bake mu ntara ya Ituri ya Repubulika Iharanira Demokarasi ya Congo (RDC).

Mu bufatanye bw’Ingabo za Congo (FARDC) n’iza Uganda (UPDF) bamaze iminsi bahiga bukware aba barwanyi aho Perezida wa Uganda Yuweri Kaguta Museveni aherutse gutangaza ko bishe bamwe mu barwanyi bakomeye bo buri uyu mutwe wa ADF kandi ko bakomeje guhiga n’abandi.

ZIGAMA THEONESTE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA