RIB yataye muri yombi umunyamakuru
Imibereho

RIB yataye muri yombi umunyamakuru

Imvaho Nshya

October 16, 2023

Urwego rw’Ubugenzacyaha (RIB) rumaze gutangaza ko rwafunze, Nkundineza Jean Paul, Umunyamakuru wigenga. Ni nyuma y’aho RIB imuhamagaje kuri uyu wa Mbere tariki 16 Ukwakira 2023. 

Nkundineza azwi cyane ku murongo wa YouTube aho akunze kugaragara akora isesengura ku nkuru z’ubutabera. 

RIB ibinyujije ku rubuga rwa X, yavuze Nkundineza akurikiranyweho ibyaha yakoreye ku murongo wa YouTube birimo gutukana mu ruhame, guhohotera uwatanze amakuru ku byaha no gukoresha ibikangisho.

Kugeza ubu Nkundineza Jean Paul afungiye kuri Sitasiyo ya RIB ya Kimihurura mu gihe iperereza rikomeje kugira ngo dosiye ye ishyikirizwe Ubushinjacyaha.

Urwego rw’Ubugenzacyaha rwongeye kusaba abakoresha imbuga nkoranyambaga kubahiriza amategeko azigenga kuko ngo uzayarengaho wese azakurikiranwa nk’uko biteganywa n’amategeko.

Umunyamakuru Nkundineza yakoreye ibinyamakuru bitandukanye nk’Umuseke, IGIHE, Jalas TV n’indi mirongo ya Youtube mu Rwanda.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA