Rubavu: Abarera abana bavukiye muri gereza basabwe kutabavangura n’abo babyaye
Imibereho

Rubavu: Abarera abana bavukiye muri gereza basabwe kutabavangura n’abo babyaye

Imvaho Nshya

June 2, 2022

Umuyobozi w’Akarere ka Rubavu wungirije ushinzwe imibereho myiza y’abaturage Ishimwe Pacifique, yasabye ababyeyi bafashe inshingano zo kurera abana batari abo bibyariye kwirinda kubavangura n’abo babyaye kuko ari ukubangiza mu mitekerereze.

Yabivuze ahwitura ababyeyi barera abana bavutse ku babyeyi bafungiwe muri gereza zitandukanye mu biganiro byateguwe n’umuryango utegamiye kuri Leta ufasha abana barererwa mu yindi miryango mu gihe ababyeyi babo bafungiwe muri za gereza.

Yabasabye kudasanisha ibyo ababyeyi babo bakoze n’abana ubwabo, kuko bibagiraho ingaruka kandi baba bashaka kwisanga mu muryango ngo bahabwe uburere umwana wese akwiriye guhererwa mu muryango.

Yagize ati: “Umwana akwiye uburere bukwiye mubafate nk’abana banyu mwirinde kubatandukanya n’abo mwabyaye kuko byabagiraho ingaruka nyinshi. Hari ubwo bajya mu muhanda, n’ahandi ariko iyo ari mu rugo afashwe neza bimurinda kwitekerezaho. Iyo yigunze bimutera kwibaza ku babyeyi be n’aho bari n’impamvu yamusize, umwana ntabwo akwiye kuyoberwa yibaza byinshi.”

Yakomeje avuga ko bateganya ko abana bazasura ababyeyi babo muri gereza akameza kubasaba kugira umutima wo kurera kibyeyi abana.

Furaha  Adelphine, Umuyobozi Nshingwabikorwa w’Umuryango I C P O   (Integration  of Children Post Prison  Organization) ufasha abana bavukiye muri gereza, kwisanga no kuba mu muryango avuga ko bita ku babyeyi n’abana bari mu magereza  n’abana bujuje imyaka 3 basubijwe mu miryango ndetse bakagira n’umwihariko wo gufasha  abatishoboye.

Avuga ko bateguye igikorwa cyo gufasha abana bafite ababyeyi bari mu magereza bafashwa kubaho mu miryango no kubafasha kubona bimwe mu byo bakeneye by’ibanze.

Ubwo uyu muryango wabashyikirizaga ibiryamirwa birimo matela, ibiringiti, ibyo kurya, amakayi n’impuzankano ku batangiye kwiga yavuze ko iyi nkunga ari iyo kunganira ababyeyi babarera kugira ngo bumve ko batari bonyine mu nshingano zigamije gufasha umwana kubaho neza.

Agira ati: “Twabateguriye ibikoresho n’ibintu byinshi bifasha ababyeyi babarerera mu miryango kubona inyunganizi,turabizi kubonera umwana ibyo akeneye byose urera ukanabibonera abo wabyaye mu buryo buhagije ntabwo byoroshye, zimwe mu nshingano dufite nk’umuryango ICPO harimo guharanira ko umwana wese agomba gufatwa nk’undi, bimurinda kwigunga no kubaho yishinja icyaha ababyeyi bakoze.”

Uyu muyobozi avuga ko bafite na gahunda yo kujya bafata abana bakabajyana gusura ababyeyi babo muri gereza kugira rwa rukundo rwa kibyeyi rugumeho.

Zimwe mu nama Furaha agira ababyeyi harimo kwirinda kwishora mu byaha byatuma  bafungwa kuko ingaruka zijya kubana babo, imiryango yabo ndetse bikabera umutwaro ku gihugu.

Uwamahoro Delphine ni umwe mu babyeyi bafite umwana arera, ababyeyi be bose barafunzwe bakatiwe imyaka 25 kubera icyaha cy’ibiyobyabwenge; ashima uyu muryango wabahaye ibikoresho n’ibyo kurya kuko ngo bije  kubunganira.

Agira ati: “Ibyo baduhaye bigiye kutwunganira kwita ku mwana turera n’abana bacu kuko twasezeranye kutazabavangura umwana angana n’undi, muri iki gihe usanga ubushobozi ari buke ariko kuba batwunyaniye biradufasha cyane.”

Uyu mubyeyi n’abandi bagenzi be bavuga ko bimwe mu bibazo bakomeje guhura na byo harimo ukwigunga kw’abana barera kumenyera kubana n’abandi mu muryango bitinze, kugira ibyishimo bike ugereranyije n’abandi ariko bigenda bishira uko bamenyera babona bafatwa nk’abandi bana.

Mu Karere ka Rubavu habarizwa abana bakuwe muri gereza 20 barerwa n’imiryango 15 aho ababyeyi babo baba bakigororwa ariko bagatandukanywa n’abana kuko amategeko atabyemera.

Ubufasha aba bana bahawe bufite agaciro ka miliyoni ebyiri z’amafaranga y’u Rwanda.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA