Ruhango: Abaturage bakanguriwe kugira isuku igihe cyose na hose
Imibereho

Ruhango: Abaturage bakanguriwe kugira isuku igihe cyose na hose

NTAWITONDA JEAN CLAUDE

May 4, 2022

Abatuye mu Murenge wa Nyamagana mu Karere ka Ruhango bongeye gukangurirwa kugira isuku igihe cyose kandi aho ari ho hose kuko ari isoko y’ubuzima. Ni ubutumwa bwagarutsweho muri gahunda y’Igitondo cy’isuku iba buri wa kabiri.

Umuyobozi w’Akarere wungirije ushinzwe imibereho myiza y’abaturage, Mukangenzi Alphonsine, yabikanguriye abaturage nyuma y’ibikorwa by’isuku byakozwe mu Midugudu ya Mujyejuru I&II mu Kagali ka Nyamagana, Umurenge wa Ruhango, ashimira abaturage uburyo bitabiriye.

Yagize ati: “Turabasaba kuzirikana isuku igihe cyose, kuko isuku ari ubuzima”.

Yongeyeho ati: “Ndabasaba ko aho umuntu akorera hagomba kurangwa n’isuku buri gihe, buri muntu aho anyuze akazirikana gutoragura imyanda yatakaye, igashyirwa ahabigenewe”.

Visi Meya yasabye buri wese kugira ubwiherero buhora busukuye hagamijwe kurwanya indwara ziterwa n’umwanda ukwirakwizwa n’isazi, kandi agaharanira kugira aho yiherera hadateye ipfunwe.

Ati: “Muri Ruhango turashaka ubwiherero bumeze neza, hahandi uwo ari we wese ugukomangiye agusaba aho yiherera umujya imbere ukabumwereka wemye”.

Visi Meya Mukangenzi ndetse yagarutse ku butumwa bushishikariza abagize imiryango kwirinda amakimbirane, bakabana mu mahoro.

Ati: “Murabizi turi muri gahunda ya Ruhango icyeye. Twifuza rero no kugira umuryango ucyeye. Buri wese nashakishe uko umuryango we wacya, yirinde icyamuteza amakimbirane n’abandi, aharanire kubana n’abandi amahoro. […]  Buri wese nakore ibyo ashoboye ku ruhande rwe, aharanire amahoro mu muryango we.  By’umwihariko abagabo buri wese aharanire ko umuryango we uba mwiza kugira ngo n’ababa bawukuriramo babashe kugira za ndangagaciro. […]”. 

Yibukije abashakanye ko bagomba kugena umwanya wo kuganira kugira ngo bashakire hamwe uko ibibazo byaba bihari byakemurwa birinda amakimbirane.

Ati: “Abashakanye mujye mushaka umwanya wo kuganira mwiherereye mushakire umuti ibyashobora kubyara amakimbirane. Ndabasabye rero ngo muharanire kugira amahoro mu miryango yanyu”. 

Visi Meya Mukangenzi kandi yagarutse ku minsi 100 yo Kwibuka ku nshuro ya 28 Jenoside yakorewe Abatutsi mu Rwanda mu 1994, ashishikariza abaturage gukomeza gufata mu mugongo abarokotse Jenoside no kwitabira gahunda zo kwibuka ziteganyijwe mu Mirenge itandukanye y’Akarere ka Ruhango.

Gahunda y’igitondo cy’Isuku igamije kubaka no kwimakaza umuco w’isuku mu baturage, ikaba ifite insanganyamatsiko igira iti “Isuku, isoko y’ubuzima bwiza n’iterambere”. 

Yashimye uburyo abantu bitabira igitondo cy’isuku, anasaba ko umuco w’isuku ukomeza gushimangirwa muri byose.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA