Ruhango: Abaturage barashimirwa uruhare mu kwesa imihigo kuri 95,8%
Imibereho

Ruhango: Abaturage barashimirwa uruhare mu kwesa imihigo kuri 95,8%

NTAWITONDA JEAN CLAUDE

June 30, 2022

Ubuyobozi bw’Akarere ka Ruhango butangaza ko imihigo y’umwaka w’ingengo y’imari 2021/2022, ku mihigo 96 kari gafite kesejemo 92, ingana na 95,8%.

Mu kiganiro n’itangazamakuru kuri uyu wa Gatatu, Umuyobozi w’Akarere ka Ruhango Habarurema Valens yavuze ko Akarere keseje imihigo y’umwaka w’ingengo y’imari 2021/2022 mu buryo bwiza, aho kageze kuri 95,8%, agashimira abaturage kuko babigizemo uruhare runini.

Yagize ati: “Mu gihe hasozwa umwaka w’ingengo y’imari, aho tugomba guhigura imihigo tuba twarahize, imihigo dufatanyije n’abaturage. Tumurika ibyo Akarere kakoze, tumurikire abaturage ibyo baba barakoze, cyane cyane ko uruhare rw’abaturage ari rwo runini”.

Umunyamabanga Nshingwabikorwa w’Akarere ka Ruhango, Louis Muhoza Mbabazi yagaragaje uko ako Karere gahagaze mu kwesa imihigo y’umwaka wa 2021/2022.

Yavuze ko Akarere kahize imihigo 96, muri yo hafi ya yose ikaba yaragezweho. Yakomeje atangaza ko gushyira mu bikorwa imihigo yari iteganyijwe mu mihigo, Akarere kahize imihigo 96.

Harimo imihigo 25 mu rwego rw’Ubukungu, imihigo 53 yari mu nkingi y’Imibereho myiza naho imihigo 18 ni yo yari iteganyijwe mu Miyoborere myiza.

Mu nkingi y’ubukungu imihigo   23 kuri 25 yesejwe 100%, mu mibereho myiza imihigo 52/53 yagezweho naho mu Miyoborere myiza hagezweho 17/18.

Mu nkingi y’Ubukungu

Harimo umuhanda wa kaburimbo mu Mujyi wa Ruhango, gukwirakwiza amashanyarazi mu bice bitandukanye by’Akarere no kubungabunga ibikorwa remezo by’amashanyarazi, kubaka ibikorwa bitandukanye harimo ibagiro ry’amatungo magufi n’ivuriro ry’amatungo magufi, umuyoboro w’amazi mu Murenge wa Ntongwe i Kibero.

Mu nkingi y’Imibereho myiza

Muri iyi nkingi harimo gutanga imirimo ku baturage batishoboye ariko bafite imbaraga. bahabwa imirimo bakabona amafaranga abatunga umunsi ku wundi, hatanzwe imirimo 2669.

Hari abaturage 2975 b’abanyantege nke bahabwa imirimo yoroheje nko gukubura, guharura umuhanda maze Igihugu kikabaha ubushobozi butuma babasha kubaho bagatera imbere.

Inkunga y’ingoboka yahawe abantu b’abanyantege nke, umuntu agahabwa amafaranga ako kanya ntacyo akoze bagera ku 4361, hubatswe amacumbi 60 y’abagenerwabikorwa barokotse Jenoside yakorewe Abatutsi mu 1994, inkunga y’ingoboka ku barokotse Jenoside yakorewe Abatutsi mu 1994 bagera ku 1800, hanakomeza gutangwa inkunga y’ingoboka ku bafite ibibazo byihariye, Akarere kandi kagize uruhare muri gahunda yo kubagurira abana ku ishuri no gusana TVT (G.S Mutara muri Mwendo).

Uyu ni umuhanda urimo gushyirwamo kaburimbo ugana ku Biro by’Akarere ka Ruhango (Foto Akarere ka Ruhango)

Mu nkingi y’Imiyoborere myiza

Mu miyoborere myiza hubatswe Ibiro by’Imidugudu 118, hasanwe Utugari 18 muri 59 twaratunganyijwe utundi natwo tumeze neza. Twateguye ibikorwa by’imyidagaduro bitandukanye bifasha abaturage barushaho kugira ibyishimo no gusobanurirwa gahunda za Leta.

Imihigo 4 itaresejwe

Ngarutse ku mihigo ine itaragerwaho ijana ku ijana ariko igeze aheza ni umuhigo ujyanye n’umuhanda wa kaburimbo twahize kugeza kuri 80% ubwo 100/% rizagerwaho mu ngengo y’imari y’umwaka utaha wa 20022/2023.

Kugaruza inguzanyo zatanzwe muri gahunda y’inguzanyo ihabwa abaturage bakoze imishinga yo kubazamura nayo ntitagerwaho 100%.

Mu mibereho myiza, gahunda y’Ubwisungane mu kwivuza nayo igeze kuri 97.5%

Mu Miyoborere myiza umuhigo utarashoboye kugerwaho neza 100% ni uwo kwinjiza imisoro n’amahoro, kuko habonetse 1,265,000,000 kuri 1,321,593,783 angana na 95%.

Imihigo iteganyijwe mu mwaka w’ingengo y’imari 2022/2023

Mu nkingi y’Ubukungu hakomeza ibikorwa byo kurangiza iyo mihanda yatangiye kubakwa, hazanatangizwa ibindi bikorwa by’umuhanda, ikindi gice cy’umuhanda uzatangira muri iyi ngengo y’imari Kibingo-Karambo-Buhoro, kubaka ibiraro 2, ikiraro cy’Akabebya hagati ya Mbyuye na Kinazi kimwe na Migurano muri Mwendo.

Mu ngufu hazakomeza ibikorwa byo gukwirakwiza amashanyarazi mu muhora wa Bunyeshwa- Gahunga- Gishegesha- Joma-Rusizi- Karambi no gukomeza kubungabunga ibikorwa remezo bisanzwe.

Mu buhinzi hazakorwa amaterasi y’indinganire, hazuhirwa imyaka ku buso buto na gahunda ya Gira inka izakomeza, hari no gutera intanga amatungo hagamijwe kongera umusaruro abaturage bakazamuka, kunganira abaturage kubona inyongeramusaruro na gahunda ya nkunganire ku bigori.

Mu nkingi y’Imibereho myiza y’abaturage hazakomeza gahunda yo gutanga imirimo mu kurengera abatishoboye ariko bafite imbaraga ku baturage 1942 naho bafite imbaraga nke hatangwe 2575.

Hazakomeza gutangwa inkunga y’ingoboka no kubaka amacumbi y’abarokotse Jenoside batishoboye kimwe n’ibikorwa byo gufasha abaturage batishoboye mu byiciro byihariye n’izindi nkunga zigamije guteza imbere abaturage.

Mu burezi hazubakwa ibyumba by’amashuri bishya 18 n’ibikoni n’ubwiherero bijyanye nabyo. Hazakomeza bya bikorwa byo kugaburira abanyeshuri haba mu mashuri abanza, ayisumbuye na TVET.

Mu rwego rw’ubuzima, ari amavuriro aciriritse azakomeza kubakwa kuko hari atari yuzura ariko hari n’amashya azubakwa.

Hazakomeza bya bikorwa bijyanye n’ubukangurambaga mu gushyigikira gahunda z’Abunzi, guteza imbere umuco w’Ubumwe n’Ubwiyunge, gahunda ya Ndi Umunyarwanda izakomeza gushyigikirwa ndetse n’imikoranire n’abafatanyabikorwa binyuze muri DJAF bizakomeza gushyirwamo imbaraga, hazanakomeza kubaho ukwezi kw’imiyoborere.

Uyu muhanda uzarangira neza 100% mu ngengo y’imari y’umwaka wa 20222-2023 (Foto Nyiraneza J.)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA