Ruhango: Amateme 10 yatwaye miliyoni 36 Frw yanogeje ubuhahirane
Amakuru

Ruhango: Amateme 10 yatwaye miliyoni 36 Frw yanogeje ubuhahirane

Imvaho Nshya

October 22, 2023

Bamwe mu baturage bo mu Karere ka Ruhango mu Murenge wa Kinihira, barashimira ubuyobozi bw’Akarere n’abafatanyabikorwa bubatse amateme 10 yari yarangiritse agatuma ubuhahirane n’indi Mirenge bwari bumaze imyaka ibiri bugenda biguru ntege.

Ayo mateme yubatswe n’Akarere ka Ruhango ku nkunga y’umufatanyabikorwa witwa Abaline Limited byuzura bitwaye asaga miliyoni zisaga 36 z’Amafaranga y’u Rwanda.

Abaturage bo muri uwo Murenge babwiye Imvaho Nshya ko byo ayo mateme yari yarangiritse ku buryo arashoboraga kunyuraho imodoka kandi ari yo afasha guhahirana n’imirenge ya Kabagali na Mwendo yo mu Karere ka Ruhango ndetse na Murundi na Murambi yo mu Karere ka Karongi ho mu Ntara y’Uburengerazuba.

Rukundo Didace wo muri uyu Murenge wa Kinihira, avuga ko iyubakwa ry’aya mateme rije rikenewe kuko babonye uko bageza umusaruro wabo ku Isoko rya Buhanda cyangwa irya Gitwe mu Ruhango

Yagize ati: “Duhawe amateme tuyakeneye kandi turashimira Akarere n’ababafashije kuko iki gice turi abahinzi kandi tugira umusaruro mwinshi iyo tutarumbije, ariko mu myaka 2 ishize twagize igihombo gituruka kukuba nta mateme twagiraga yose yari yarangiritse ugasanga imodoka irinyuzeho yagwamo. Kandi hari igihe tubona umusaruro nk’inanasi tukazijyana ku Isoko rya Buhanda cyangwa Isoko rya Gitwe ndetse hari n’abajyaga mu Gafunzo cyangwa bakagemurira abacuruzi b’i Muhanga ariko hari abatarabishoboraga ukangirika.”

Yongeyeho ko amateme yari yarateye  ikibazo gikomeye harimo ayahuzaga umuhanda Muyunzwe-Karambo-Gasiza, dore ko uyu muhanda utari ukiri nyabagendwa kubera amateme yangiritse.

Ntawigenera Jean Pierre utuye mu Murenge wa Kinihira, avuga ko bishimye cyane kubera kubakirwa ikiraro cya Nyakambu gihuza Utugari twa Rukina na Muyunzwe byasabaga ufite imodoka kuzenguruka ahantu hari nk’ibilometero 6, kandi uciye kuri iri teme bimusaba  kugenda ibilometero 2 gusa.

Amateme yubakiwe na za rigore

Yongeyeho ko ahubatswe icyo kiraro habaga hateye ubwoba kuko iyo imvura yagwaga ntawahambukaga, ndetse n’amazi akarenga agatwara imyaka ihinzwe mu gishanga

Uretse icyo kiraro ngo bubakiwe n’iteme rya Kiryango. Ati: “Turishimye cyane kuko ubuhahirane bwacu bwari bwrajemo agatotsi kubera ikiraro gihuza Utugari twa Rukina na Muyunzwe cyari cyarangitse… Ariko kandi banadusaniye iteme rya Kiryango riri ku muhanda munini uhuza Uturere twa Ruhango-Karongi na Nyamagabe, aho ryari ryaracitse bityo imodoka nyinshi zirimo na bisi zitwara abagenzi za RITCO n’izitwara imizigo ziva cyangwa zijya muri utu Turere  ntizibashe kuhaca”.

Mukamurenzi Peteronille utuye i Muyunzwe, avuga ko hashize igihe hari iteme ryangiritse ryatumaga imbangukiragutabara zijyana cyangwa zikanakura abarwayi ku kigo Nderabuzima cya Muyunzwe zitabasha kuhanyura.

Yagize ati: “Turanezerewe kuko hashize igihe dufite iteme ryo mu Kagari ka Rukina rihuza Umudugudu wa Dusenyi na Kabacuzi ryari ryarangiritse ariko ubu umuhanda wongeye kuba nyabagendwa abantu barahita rwose.”

Umuyobozi bw’Akarere ka Ruhango Habarurema Valens, avuga ko Akarere gafite inshingano zo guteza imbere imibereho myiza y’abaturage no kubegereza ibikorwa rusange birimo amazi, amashanyarazi, amashuri, amavuriro no kubakorera imihanda yoroshya ubuhahirane.

Avuga ko aya mateme yuzuye bakwiye kuyarinda ntazangizwe kuko kuyangiza byabasubiza mu bibazo bahozemo birimo kuba batarabashakga kugeza umusaruro wabo ku masoko.

Yabijeje ko Akarere kazakomeza gukorana n’abafatanyabikorwa bako mu kurandura inzitizi zikigaragara mu bikorwa byabo bya buri munsi, kandi bakirinda kubyangiza kuko baba bakora ibyaha bishora kubageza mu butabera bagahanwa.

Abaturage bashimira impanuro bahawe n’ubuyobozi bubibutsa ko ibyo bikorwa remezo bikwiye kuba ibyabo bakabicungira umutekano kugira ngo bikomeze kubahereza umusaruro bifuza.

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA