<strong>Ruhango: Imvura ni nziza turayikeneye ariko tutirinze yatwangiriza</strong>
Amakuru

Ruhango: Imvura ni nziza turayikeneye ariko tutirinze yatwangiriza

NTAWITONDA JEAN CLAUDE

April 23, 2022

Umuganda usoza ukwezi kwa Mata 2022 wabaye kuri uyu wa Gatandatu taliki ya 23, mu Gihugu hose ugamije kurwanya isuri, mu Midugudu yose igize Akarere ka Ruhango wakozwe wibanda ku bikorwa byo kurwanya isuri.

Muri uyu muganda, Ubuyobozi bw’Akarere bwifatanyije n’abaturage b’Umudugudu wa Mwali, Akagari ka Musamo mu Murenge wa Ruhango mu bikorwa byo gusibura imirwanyasuri no guhanga imishya.

Umuyobozi w’Akarere ka Ruhango, Habarurema Valens yabwiye abaturage ko imvura ari nziza, ariko nanone ko hari igihe iba nyinshi ikaba yagira ibyo yangiza, abibutsa ko ari ngombwa kurwanya ibiza byaterwa nayo.

Ati “Imvura ni nziza, turayikeneye; ariko tutirinze yatwangiriza, ikadusenyera”.

Nyuma y’umuganda kandi Umuyobozi w’Akarere yasobanuye ko umuganda rusange wagombaga kuba ku wa 30 Mata 2022 wimuriwe uyu munsi, kugira ngo abantu babashe gukora ibikorwa byo kwirinda isuri ishobora kuterwa n’imvura nyinshi iteganyijwe muri ibi byumweru, nk’uko iteganyagihe ribyerekana.

Meya yasabye abayobozi kuva ku rwego rw’Isibo kujya inama n’abaturage bakumvikana umunsi bazajya bakora umuganda mu cyumweru

Yasabye abayobozi kuva ku rwego rw’Isibo kujya inama n’abaturage bakumvikana umunsi bazajya bakora umuganda mu cyumweru, n’ibikorwa bazakora mu rwego rwo kurwanya no kurinda isuri aho batuye, bagakomeza gukumira ibiza.

Umuyobozi w’Akarere yanagarutse kuri iki gihe u Rwanda rurimo cy’iminsi 100 yo Kwibuka ku nshuro ya 28 Jenoside yakorewe Abatutsi mu 1994, ashimira abaturage muri rusange uko bitwaye muri gahunda n’ibikorwa byo kwibuka, abasaba gukomeza gufata mu mugongo abarokotse Jenoside yakorewe Abatutsi, kwitabira gahunda zose ziteganyijwe no kurwanya ingengabitekerezo ya Jenoside.

Izindi ngingo zagarutsweho mu biganiro bya nyuma y’umuganda ni ukwitabira gutanga umusanzu w’ubwisungane mu kwivuza kugira ngo umwaka utaha uzatangire buri wese abasha kwivuza, kwitabira Gahunda y’ubwizigame bw’igihe kirekire ya Ejo Heza ndetse akangurira abahawe inguzanyo zo gushyira mu bikorwa imishinga bahawe muri gahunda ya VUP, kwishyura neza kugira ngo inguzanyo zigere no ku bandi ndetse na bo zijye zibagarukira.

Meya w’Akarere ka Ruhango Habarurema Valens n’inzego z’umutekano bifatanyije n’abaturage mu muganda wo kurwanya isuri (Foto Akarere ka Ruhango)

Muri rusange hakozwe ibikorwa byo gusibura imirwanyasuri no guhanga imishya, gutinda amateme, gutera ibiti birimo n’iby’imbuto ziribwa, gusibura inzira z’amazi, gucukura ibyobo bifata amazi no gufata amazi ava ku bisenge by’inzu.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA