Ruhango: Ivomo bahawe ijerekani yuzurira iminota 30, bagashoka ibishanga
Imibereho

Ruhango: Ivomo bahawe ijerekani yuzurira iminota 30, bagashoka ibishanga

Imvaho Nshya

October 22, 2023

Abaturage batuye mu Kagari ka Gitisi mu Murenge wa Bweramana baravuga ko bavoma amazi mabi bitewe n’uko ivomo rimwe bahawe amazi aza ari make cyane ku buryo ijerekani ishobora kuzurira iminota iri hagati ya 30 na 40.

Abo baturage barasaba ubuyobozi kubegereza amazi meza ahagije bakareka gukoresha amazi y’ibishanga abakururira indwara zituruka ku mwanda.

Bavuga ko muri aka Kagari hari iryo riba rimwe bafukuriwe n’umushinga wa Living Water International. Kuri iryo riba abantu baba batonze umurongo buri gihe ariko bujya kwira abarivomyeho ari bake cyane kuko amazi nta ngufu afite.

Ibyo bituma bamwe mu badashoboye gutegereza cyangwa bakeneye amazi yo gukoresha byihutirwa bashoka ibishanga ari na ho bakura amazi yo gutekesha no gukora indi mirimo yose yo mu rugo ikenera amazi.

Uwiragiye Marie Gorette avuga ko benshi mu baturage bavoma amazi mabi abatera inzoka akavuga, ko bakeneye amavomo menshi yagabanya ingendo bakora.

Yagize ati: “Benshi mu baturage duturanye bose bavoma amazi mabi mu gishanga. Dufite iriba rimwe ryuzuza ijerikani hashize iminota 40 yose, iyo tugezeyo tugasanga turi benshi tugana mu bishanga kudaha, ariko batwegereje amazi twanagabanya ingendo dukora tujya gushaka amazi meza”.

Murekatete Fortune avuga ko bajyaga kuvoma amazi yo kunywa ahitwa i Rwoga ariko udafite intege zo kujya kuyazana wese ngo birangira yinywereye ayo mu gishanga.

Yagize ati: “Twese kugira ngo tuzabone amazi meza bidusaba nibura gutegereza iminota irenga 30 kugira ngo ijerikani yuzure. Ariko ubusanzwe tujya kudaha mu gishanga hano i Nyarugenge iyo amazi yabuze ku muyoboro wo ku muhanda mugari ugana i Gitwe. Duhurira kuri iryo riba cyangwa tukajya kuvoma amazi yo kunywa hakurya mu misozi “.

Mujawimana Melanie avuga ko kutagira amazi bituma abana bajya kuvoma bagatinda kujya ku ishuri naho abandi bagahora barwaye indwara zikomoka ku mwanda.

Yagize ati: “Rwose kuba tudafite amazi meza bituma duhora turwaje inzoka kandi tunabanza gutuma abana amazi kubera gutegereza cyane hari igihe banatinda kugera ku ishuri nkaha i Nyamirama tuyavana kure rwose.”

Umuyobozi w’Akarere ka Ruhango Habarurema Valens, aherutse kubwira Imvaho Nshya ko aba baturage ba Bweramana bubakiwe umuyoboro munini uturuka i Mpanga-Gitwe ugakomeza i Ruhango ugamije kongera amazi aho asanzwe yarabuze.

Yavuze kandi ko mu Kagari ka Gitisi hasanzwe umuyoboro  ufite amavomero 6 ariko ngo ntabwo amazi aboneka buri munsi kuko hari iminsi bahawe yo kuvomeraho. Akomeza avuga ko abaturage bakwiye kujya bavoma amazi menshi mu gihe bayahawe gusa akibutsa abo atarageraho ko azabageraho vuba.

Yongeraho ko Akarere gafite gahunda yo kubaka imiyoboro mishya irimo  uwa Ruhango – Ntongwe w’ibilometero 74 uzaza usanga indi miyoboro mishya izaba ifite ibilometero 120 mu Mirenge ya Kinihira na Mwendo.

Yaboneyeho kwibutsa ko Living Water imaze kubaka amavomero arenga 60 mu Karere ka Ruhango ndetse ngo ibikorwa byabo biracyakomeza kandi ngo bibanda aho Inzego zishinzwe gukwirakwiza amazi zitaragera.

Kugeza ubu Akarere ka Ruhango mu kwegereza amazi abaturage kageze ku kigero cya 76.4%, ndetse ubuyobozi bwizeye ko mu mwaka wa 2024 intego yo kwegereza abaturage amavomero muri metero zitarenze 500 mu cyaro na metero 200 mu mujyi izaba yamaze kugerwaho.

Kutagira ivomo ribaha amazi meza bituma bashoka ibishanga

AKIMANA JEAN DE DIEU

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA