Rukumberi: Abatuye kure y’amashanyarazi begerejwe amahirwe yo kuva mu icuraburindi
Amakuru

Rukumberi: Abatuye kure y’amashanyarazi begerejwe amahirwe yo kuva mu icuraburindi

NTAWITONDA JEAN CLAUDE

February 6, 2022

Sosiyete y’u Rwanda Ishinzwe Ingufu (REG) ikomeje kugenda ikora ubukangurambaga ku batuye ahataragera imiyoboro y’amashanyarazi igamije kubashishikariza kwitabira gukoresha amashanyarazi akomoka ku mirasire y’izuba, cyane ko hari umushinga Leta yashyizeho ubunganira ku giciro cy’ibikoresho bitanga aya amashanyarazi, bityo na bo bagatandukana no gukoresha agatadowa n’icuraburindi rya nijoro.

Ubwo abakozi b’iyi sosiyete bari mu Karere ka Ngoma mu Murenge wa Rukumberi kuri uyu wa Gatandatu taliki 05 Gashyantare 2022, basobanuriye abahahira ku isoko rya Rukumberi uburyo iyi nkunganire itangwa ndetse banabegereza sosiyete zitandukanye zikorera muri aka gace zigurisha ibikoresho by’imirasire y’izuba.

James Twesigye, Umuyobozi ushinzwe ingufu zitanga amashanyarazi adafatiye ku muyoboro rusange, avuga ko uyu mushinga wunganira abakeneye kugura ibikoresho bitanga amashanyarazi akomoka ku mirasire y’izuba, watangijwe na Leta y’u Rwanda mu rwego rwo kugera ku ntego y’amashanyarazi kuri bose.

Twesigye avuga ko mu gihe kugeza imiyoboro y’amashanyarazi mu duce twose mu gihugu bishobora gufata igihe, hari uduce twagenewe kuzahabwa amashanyarazi adafatiye ku muyoboro rusange, yiganjemo akomoka ku mirasire y’izuba.

Ati: “Twaje gusobanurira abaturage gahunda ya Leta yo kugeza amashanyarazi kuri bose, cyane cyane aho dukoresha amashanyarazi akomoka ku mirasire y’izuba ahataragezwa imiyoboro, kandi tunababwira inkuru nziza y’uko Leta yashyizemo nkunganire, kugira ngo abifuza imirasire babashe kuyibona badahenzwe, bunganiwe bijyanye nubushobozi bwabo”.

Avuga ko uyu mushinga uzakorera mu duce twose mu gihugu tutagerwamo n’imiyoboro twagenewe guhabwa amashanyarazi adafatiye ku muyoboro rusange.

Ati: “Hari igice cy’ikiguzi umushinga uzajya wishyurira umuturage uguze umurasire, hanyuma nawe asabwe kwishyura uruhare rwe rusigaye kandi ahitemo ubwoko bw’umurasire ashatse bitewe n’ubushobozi afite bwo kwishyura.”

Twesigye avuga ko iyi Nkunganire izajya itangwa ku bagenerwabikorwa bo mu cyiciro cya 1, icya 2, ndetse n’icya 3 cy’ubudehe. Ingano yayo ikazagenwa n’icyiciro cy’ubudehe umugenerwabikorwa abarizwamo. Avuga ko REG yagiranye amasezerano y’imikoranire n’ibigo bitandukanye mu Rwanda bicuruza ibikoresho bitanga aya amashanyarazi akomoka ku mirasire y’izuba, bikaba ari nabyo bizajya bigurisha ibi bikoresho ku bifuza guhabwa aya mashanyarazi.

Ati: “Nk’uko uyu mushinga ubiteganya, iyo umurasire utarengeje amafaranga 115,000, abo mu cyiciro cya mbere bahabwa nkunganire igera kuri 90% by’igiciro cy’umurasire, bakiyishyurira gusa 10%. Naho abo mu cyiciro cya 2, bahabwa nkunganire ya 70% by’ikiguzi bakiyishyurira gusa 30%.  Abo mu cyiciro cya 3 cy’ubudehe, bunganirwa 45% bakiyishyurira 55% by’ikiguzi.

Twesigye avuga ko iyo ikiguzi cy’ibikoresho kirenze ibihumbi 115, icyo gihe abo mu cyiciro cya mbere bunganirwa ku kiguzi amafaranga ibihumbi 100 hanyuma bakiyishyurira asigaye, abo mu cya kabiri bakunganirwa ibihumbi 80, naho abo mu cyiciro cya 3 bakunganirwa ibihumbi 50.”

Umunyamabanga Nshingwabikorwa w’Umurenge wa Rukumberi, Bwana Buhiga Rwumbuguza Josué, yavuze ko mu Murenge wa Rukumberi hakiri imidugudu itarageramo imiyoboro y’amashanyarazi bityo ko bishimiye ko abatuye uyu Murenge babonye amahirwe yo kuva mu icuraburindi.

Ati: “Turifuza ko abaturage bose b’uyu Murenge babona uko bacana bakava mu kizima bakajyana n’iterambere.  Abakoresha agatadowa bakakavaho, ukoresha peteroli akahihagarika ndetse n’ibindi byose bitakijyanye n’iterambere. Natwe tuzakomeza gushishikariza abaturage kuyibyaza umusaruro iyi gahunda, ndetse turebe n’uko twakomeza kubegereza ba rwiyemezamirimo bacuruza iyi mirasire kugira ngo bayibone mu buryo bwihuse.”

Imibare igaragazwa na REG yerekana ko ingo zifite amashanyarazi mu Rwanda ubu zisaga 68.17%. Muri izi ngo, izigera kuri 19.45% zifite amashanyarazi adafatiye ku muyoboro mugari, yiganjemo akomoka ku mirasire y’izuba.

Umunyamabanga Nshingwabikorwa w’Umurenge wa Rukumberi, Bwana Buhiga Rwumbuguza Josué
James Twesigye, Umuyobozi ushinzwe ingufu zitanga amashanyarazi adafatiye ku muyoboro rusange arimo kuganiriza abatuye Rukumberi

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA